ХХV Кыһыҥҥы Олимпиада түмүктэннэ

Эдэр саас, успуорт саамай муҥутуур бырааһынньыга – ХХV Кыһыҥҥы олимпийскай оонньуулар Италияҕа түмүктэннилэр. Олимпиада аһыллыытын, күрэхтэһиилэри ОККО сервис нөҥүө “күөх экраҥҥа” холботон көрдүм.

Италияҕа икки куоратынан барда, Кортина д*Ампеццо уонна Милан. 1956 с. Кыһыҥҥы оонньуулар Кортина д*Ампеццо куоракка Италияҕа ыытыллыбыттарын 70 сылыгар ананна.

Түмүк хайдаҕый?

Тэҥнээн көрүөххэ дуу. 2022 сыллаахха Пекиҥҥэ ыытыллыбыт Олимпиадаҕа хамаанданан официальнайа суох көрдөрүү түмүгүнэн Норвегия бастакы, Германия иккис, Китай үһүс, АХШ төрдүс, Швеция бэһис,  Арассыыйа тохсус миэстэлэри ылбыттара.

Бу Олимпиадаҕа түмүк маннык буолла: Норвегия бастакы, АХШ иккис, Голландия үһүс, Италия төрдүс, Германия бэһис. 25-тэ ыытыллыбыт Олимпиадаттан Норвегия 11 төгүл бастаата! Италияҕа 41 мэтээллээх: 18 кыһыл көмүс, 12 үрүҥ көмүс, 11 боруонса. Дьэ, чаҕылхай ситиһии!

Иккис, үһүс буолбут АХШ (12-12-9), Голландия (10-7-3) мэтээллэрдээхтэр.

94 судаарыстыба кытынна, онтон 30 хамаанда эрэ мэтээлгэ тигистэ. Индия курдук 1,5 миллиард нэһилиэнньэлээх дойдуга бириистээх миэстэ суох. Өйдөнөр, Индия хаара суох сылаас дойду. Ол быыһыгар Норвегияҕа баара-суоҕа 5,5 мөлүйүөн киһи олохсуйан олорорун санаан ааһыахха.

Арассыыйаттан баара-суоҕа 13 киһи кытынна. Ону даҕаны кэлин тиһэҕэр эрэ биллэн. Ски-альпинизм диэн саҥа көрүҥ киирэн, Никита Филиппов диэн күрэсчит иккис буолан үөртэ.

Олимпиада дьоруойунан хайыһардьыт Йоханнес Клебо буолла. 29 саастаах күрэсчит дойдутугар 6 кыһыл көмүс мэтээли аҕалла. Бу туһунан рекорд! Кини уопсайа, олимпиадалартан 11 кыһыл көмүстээх. Ураты хатарыылаах киһи буолла!

Түмүккэ, санаалар, толкуйдар

Үс олимпиада утуу-субуу биһигиттэн кэм чугас, Азия континеныгар ыытыллыбыттара. 2018 с. Пченчхан, 2021 с. Токио-20, Пекин-2022 с. бэрт үчүгэйдик ааспыттара, төһө да уустук балаһыанньа (ыарахан дьаҥ саҕана) кэнники оонньууларга бүрүүкээбитин үрдүнэн. Азияҕа эрэ буолбатах, аан дойду сайдыылаах дойдулара Япония, Кытай эрэ буоланнар бу саҕана тэрээһиннээхтик ыыттылар диэн бэлиэтээбиттэрэ.

“Күөх экранынан” көрө олорон Кыһыҥҥы олимпиада көрүҥнэрэ улам уустугуран иһэллэрин,  баһыйар үгүс өттүн ылбычча эдэр, кыанар, тэтиэнэх да киһи кыайан толорбот, дьарыктанар баҕалаах да буоллаҕына ыарахан. Аны эчэйиилээх (травма), кутталлаах да курдуктар. Арай, стандартка эппиэттир анал тутуулар, оҥоһуктар баар буоллахтарына.

Аны кулун тутар 6 күнүттэн – 16 күнүгэр диэри Паралимпиада ыытылларын кэтэһэбит. Кыттааччыларынан олох ыарахан өрүттэрин көрсүбүт, сынтарыйбат кытаанах санаалаах, дьулуурдаах дьон буоллахтара, барахсаттар! Арассыыйаттан 20-тэн тахса киһи кыттара күүтүллэр.

2030 сыллаахха Олимпиада Франция судаарыстыбатыгар баар аатырбыт Альпа хайаларыгар, 2034 сылга – АХШ-ка Солт-Лейк-Сити куоракка ыытыллаллара быһаарыллыбыт.

Степан АНДРЕЕВ.

Майа с.