Учууталбыт аата үйэтитиллэр

Аҕа сүбэтин төрүттээбит чулуу учууталбыт Николай Викторович Андреев сырдык аатынан Уол, Аҕа, Учуутал кыттыылаах спортинг күрэхтэһиитэ “Бэргэн” ытыы комплексыгар буолан ааста.

Биһиги оскуолабытыгар аҕалар түмсүүлэрэ сыл ахсын «Үс кыттааччы» бырайыак иһинэн уол оҕо иитиитигэр араас хайысхалаах үлэлэри ыытар. Олортон биирдэрэ үгэскэ кубулуйбут спортинг күрэһэ буолар.

Бу күрэхтэһиини биһиги убаастыыр учууталбыт Николай Викторович Андреев, ОБЖ учуутала ылсан саҕалаан тэрийбитэ. Кини оскуолаҕа үлэлиир кэмнэригэр олус элбэх үлэни ыытан, уолаттарга аналлаах араас бырайыактары үлэлэппитэ. Кини аатын үйэтитэн биһиги учууталларбыт, төрөппүттэрбит бу күрэхтэһиини тэрийэллэр.

Быйыл бу спортинг күрэхтэһиитэ уол, аҕа, учуутал кыттыылаах “Бэргэн” стрелковай комплекска буолан ааста. Кыттааччылар үс бөлөххө арахсан күрэхтэстилэр.

Күрэхтэһии түмүгүнэн бастакы бөлөххө 22 саастарыгар диэри сүрүн кыайыылааҕынан Никитин Владислав буолла, иккис үрдэлгэ Шамаев Эркин, үһүс бириистээх миэстэҕэ  Никитин Артем таҕыстылар.  Иккис бөлөххө 40 саастарыгар диэри бастакы миэстэ  Тумусов Анатолий, иккис миэстэ  Марков Кирилл, үһүс миэстэ Лебедев Игорь буоллулар. Үһүс бөлөххө 40 саастарыттан үөһээ кытыннылар. Бастакы миэстэни  Сергеев Лев, иккис миэстэни Оконешников Яков, үһүс миэстэни Григорьев Николай ыллылар.

Күрэхтэһии олус көхтөөхтүк ааста. Кыттааччыларга анал номинациялар туттарыллыннылар. Ол курдук, “Күүстээх санаалаах Кэрэ аҥаар” анал ааты оскуолабыт выпускницата (Евсеева) Софронеева Ксения, “Кыайыыга дьулуурдаах” анал аат Осипов Михаил, “Опыттаах ытааччы” Филиппов Игнатий, “Көхтөөх кыттааччы” анал ааты Павлов Евгений, “Биһирэбиллээх ытааччы” аат Поскачин Дмитрий, “Кэскиллээх ытааччы” анал ааты Лукин Дьулустаан, “Бастакы саҕалааччы” Сунхалыров Илья, Махмуд, “Эдэр ытааччы”анал ааты Марков Сахаян ылан үөрэн тарҕастылар.

Күрэхтэһии кыайыылаахтарыгар анал бириистэри Николай Викторович дьиэ-кэргэнэ, аймахтара, биир идэлээхтэрэ, бииргэ үөрэммит доҕотторо, куорат Аҕа сүбэтэ  туруордулар.

Бу күрэхтэһиигэ бары сүүрбүт-көппүт дьоммутугар, кыттааччыларга, спонсордарга барҕа махтал тылларын тиэрдэллэр! Маннык тэрээһиннэр сылын аайы ыытыллан, өссө кэҥээн иһэригэр баҕарабыт.

Сандаара НЕУСТРОЕВА, Айыы Кыһатын 9 в кылааһын үөрэнээччитэ.