“Дьулурҕан” 25 сыллаах дьулурҕа айана бэлиэтэннэ

Спорду сэҥээрээччилэр бу хаһыаты сүрүн көмөлөһөөччү оҥостоллоругар саарбахтааһын суох. Саха сирин спордугар сыһыаннааҕы, чуолаан тустуу туһунан, мантан элбэҕи булуохха сөп.

Дьэ, ол хаһыат үйэ чиэппэрин устатыгар ханнык да моһоллортон бохсон хаалбакка, дьулурҕатык айаннаан ааҕааччыларыныын аргыстаһан кэллэ. Хаһыат 25 сыла өрөспүүбүлүкэ таһымыгар киэҥник бэлиэтэннэ.

Оттон бүгүн Бороҕоҥҥо “Дьулурҕан” хаһыат бирииһигэр оҕолорго көҥүл тустууга улуустааҕы күрэхтэһии аһыллыытыгар хаһыат “аҕатын” – Саха Өрөспүүбүлүкэтин үтүөлээх суруналыыһын Петр Павловы чиэстээтилэр. Үөрүүлээх тэрээһиҥҥэ улуус баһылыгын солбуйааччы Анатолий Сторожев, РФ уонна СР үтүөлээх тренерэ Степан Сивцев, норуоттар икки ардыларынааҕы кылаастаах спорт маастара Афанасий Заболоцкай, улуустааҕы оҕо спортивнай оскуолатын дириэктэрин солбуйааччы Семен Черкашин, “Забота-Арчы” хаһыат кылаабынай эрэдээктэрэ Виктор Эверстов, күрэхтэһии сүрүн судьуйата Петр Соловьев уо.д.а. кыттыыны ыллылар.

Элбэх үтүө тыл этилиннэ. Олортон Степан Петрович этиитин ордук чорбото санаатым. Кини Петры спорт суруналыыһын, чопчулаан тустууну ырытааччы быһыытынан аан дойду да таһымыгар турар диэххэ сөп диэн бэлиэтээтэ. Ол курдук, кини тустууну ымпыктаан-чымпыктаан суруйан тренердэр, чулуу тустууктар таба көрбөтөхтөрүн суруйан сэҥээрдэрин астынан туран эттэ.

Тустууга Мүрү алаас иһинээҕи оскуолалары таһынан Суотту, Танда, Бэйдиҥэ, Балыктаах эдэр бөҕөстөрө кэлэн сытыы хапсыһыылары аастылар. Барыта уон ыйааһыҥҥа кыайыылаахтарыгар мэтээллэри грамоталары, харчынан бириистэри таһынан анал бириистэр хаһаайыннара баар буоллулар. Маны барытын СӨ Суруналыыстарын сойууһа, “Сахабэчээт” тэрилтэ уонна “Дьулурҕан” хаһыат туруорда.

Улуус спордун салалтата бу күрэхтэһиини салгыы ыытар былааннааҕын биллэрдэ. Онон кыра саастаах уолаттарга дьоһун күрэхтэһии аартыга арылынна диэххэ сөп. Күрэхтэһии ыытылларын тухары “Дьулурҕан” тэҥҥэ айаннаһан иһиэҕэ.

Афанасий КОПЫРИН, «Мүрү саһарҕата» хаһыат, Уус Алдан.