Далааһыннаах, инникигэ элбэҕи толкуйдатар тэрээһин

Кулун тутар 16 күнүгэр сарсыарда чуумпу турбут паарка иһэ 12 чаастан массыына тыаһынан, оҕо аймах саҥатынан, сылаас салгын устун сахалыы музыка тыастарынан туола түстэ. Хаары бүрүнэн турбут мастар сиккиэр тыалга үрдэрэн сэмэйдик үҥкүүлээн эрэрдии хоҥкуннаһа турдулар. Урут сэбиэскэй былаас саҕана дьон-сэргэ сөбүлээн тоҕуоруһар паарката чөлүгэр түһэн, араас тэрээһиннэр ыытыллар буолбуттара кэрэхсэбиллээх.

ССРС спордун маастарыгар кандидат, РСФСР спордун маастара, Саха Республикатын спорка маастара, Саха Республикатын бастыҥ учуутала ааттаах, ХХ үйэ спорка лауреата, ССРС уонна РСФСР үөрэҕириитин туйгуна Иван Михайлович Жирков 85 үтүө сылыгар, Улуу Кыайыы 80 сылын көрсө бэрт сэргэх уонна сэдэх тэрээһин буолан ааста.

Хайыһар суола дыргыллан, трибуна киэргэнэн, былаахтар ыйанан, палааткалар тардыллан, олоппос бөҕө кэчигирээн, өссө сымнаҕас сылаас буоллун диэн поролоннаах. Субу аһыллаары тыҥаан турар бириэмэҕэ биһиги спорт ветераннара анал массыыналарынан тиэллэн тиийэн кэллибит.

Күрэхтэһиини тэрийээччилэр анал бэлиэ көстүүм кэтэн биһигини көрсөн, били бэлэмнээбит олоппосторугар олоттулар. Анал хамаанда бэриллэн, параадтаан киирэр сиргэ мустан, бары чемпионскай лентэлэрин иилинэн, кытыастар кыһыл былаах кэнниттэн ветераннар турдулар. Былааҕы улууска, республикага биллэр спортсмен Прокопий Харитоновка туттардылар. Кинилэр кэннилэриттэн судьуйалар, оттон түөлбэлэр сэлэлии бэйэлэрин формаларын кэтэн турдулар. Параадтаан киирэн гимнэри истэн бүгүҥҥү программаны билсэн эҕэрдэлэр саҕаланнылар.

Уус Алдан дьаһалтстын балыһыгын солбуйааччы Анатолий Алексеев,  Мүрү баһылыгын солбуйааччы Вероника Сивцева, Мүрү иккис нүөмэрдээх оскуолатын дириэктэрэ Алексей Мигалкин эҕэрдэлээтилэр уонна бэйэлэрин анал бириистэрин Прокопий Харитоновка, саамай эдэр кыттааччыга диэн оскуола дириэктэрэ туттарда. Мүрү нэһилиэгин депутата, тэрийээччи Валентина Шадрина истиҥ иһирэх эҕэрдэтин эттэ, ветераннарга уонна Иван Жирков огдооботугар Мария  Никоновнаҕа махтал суруктары, сэмэй бэлэхтэрин туттаран биһигини соһутта даҕаны, үөртэ даҕаны.

Аһыллыы кэнниттэн хайыһарынан биир эргиири сүүрүү, 8 киһилээх эстафета, хаалыктаах хаамыы, көрдөөх эстафета дьон болҕомтотун тарта. Төҕө да сылаас күн буоллар, тымныы син биир баарын биллэрэр эбит. Хата палаатка иһигэр, сылаас сиргэ киирэн ип-итии чэй, кофе, саламаат, итии ис миинэ, хортуоскалаах соккуой барыта буруолуу сылдьара биһигини сөхтөрдө. Дуоһуйан туран аһаан ирэн күрэхтэһии көрө бардыбыт. Наһаа да түмсүүлээх, тэрээһиннээх түөлбэ эбит диэн өссө төгүл бэлиэтээтибит, үлэ да бөҕөнү көрсүбүттэр диэн өссө астынан көрө олордубут. Хаартыскаҕа түһэрэр фотограф, видеоҕа устар анал оператор, ыытыллар бары дьайыылары устан үйэтиттилэр.

Наҕараада туттарыыта бэйэтэ туспа бэлиэ түгэн буолла. Наһаа сиэдэрэй, Иван Михайлович хаартыскалаах мэтээллэри анаан оҥорторбуттар. Дипломнара эмиэ олус тупсаҕайдык оҥоһуллубуттар уонна Иван Михайлович оҕолоро, аймахтара туруорбут харчынан бириистэр: 1 миэстэҕэ – 5 тыһ. солк, иккискэ – 3 тыһ. солк, үһүскэ – 2 тыһ. солк. сэбиэскэй кэмнээҕи конверт оҥорторбуттарыгар уган биэрдилэр. хамаанданан күрэхтэһиигэ эмиэ бастакыларга 2 тыһ. солк, иккис-үһүс миэстэлэргэ – 1-дии тыһ. солк. хамаанда чилиэннэрэ ыллылар.

Оттон биһиги, спорт ветераннарын анал бирииспитин аҕам саастаах кыттааччыларга анаатыбыт. Эр дьоҥҥо спорт ветерана, республикаҕа биллэр хайыһардьыт Варвара Новогодина диплому 5 тыһ. солк. харчыны – Прокопий Харитоновка, дьахталларга сүүрүк, хайыһардьыт, куораттан анаан кэлбит Матрена Сивцева диплому уонна 5 тыһ. солк. харчыны – Раиса Троеваҕа туттарда. Дүпсүн орто оскуолатын 1966 с. бүтэрбит выпускниктар ааттарынан анал бирииһи спорт ветерана Светлана Старостина диплому, куубагы уонна 4 тыһ. солк. харчыны – Рожина Марина Николаевнаҕа туттарда. Бу бары, учуутал-тренер Иван Михайлович ииппит, эрчийбит, үөрэппит оҕолоро.

Түмүктээн эттэххэ, Валентина Николаевна далааһыннаах, элбэҕи инникигэ толкуйдатар тэрээһини ыыппытыгар, бэйэтин тула элбэх дьону түмэн тэрийбитигэр, улуус спорка ветераннарын ыҥыран, дойдубут мүөттээх салгынынан дуоһуйа тыыммыппытынан улахан махталбытын тиэрдэбит. Кэлин бу күрэхтэһии өссө тэнийэн нэһилиэктэринэн, улуус да таһымыгар ыытыллар күрэхтэһии буолуо, Иван Михайлович аата үйэлэр тухары ааттана, кини саҕалаабыт үлэтэ хас улуус оскуолатын аайы киириэ диэн эрэнэбит. Уус Алдан улууһа – спортивнай улуус аатын төнүннэриэ диэн эрэлбитин этэбит.

Уус Алдан спорка ветераннарын аатарыттан Анна БУРНАШЕВА.