Саха тустуута инникилээҕин көрдүбүт

Дьэ, күүтүүлээх, сороҕор хабыр хапсыһыылары көрдүбүт. Уонна саха тустуута бу кэмҥэ инникилээҕин көрдүбүт. Бүтэһик сөкүүндэлэргэ диэри уолаттар үлэлээн, ордук Александр Авелов атыттарга холобур буолар тустууну көрдөрдө.

Бүтүн Саха сирэ бу күннэргэ ыраах да буоллар, тустууктарбытыгар ,,ыалдьан, көрдөһөн,, бөҕө буоллубут. Трибуналарга саха былааҕа күөрэйэн тахсара, сахалыы ыһыы-хаһыы иһиллэрэ барыбытыгар да долгутуулаах, санааны күүһүрдэр. Салгыы эмиэ кыайыылары күүтэбит, эрэнэбит!

Мин Иван Ярыгин күрэҕин 2015, 2019, 2024 сс. Красноярскайга тиийэн көрбүтүм. Тэрээһинэ сыл аайы тупсан иһэр. Быйылгы үөрүүлээх аһыллыы үрдүк таһымҥа ааста, таҥастарыгар тиийэ. Уонна бүтүүтүгэр тэрээһиҥҥэ кимнээх үлэлэспиттэрин, кыттыбыттары ааттаабыттара кэрэхсэнэр эрэ. Улахан толкуйтан, сыраттан, түбүктэн таҕыстаҕа дии. Биһиги эмиэ маны туһаныахпытын сөп. Итиэннэ анал үлэһиттэр туохха болҕомто ууруохтаахтарын, сыыһаларын ырытыахтара буоллаҕа.

Бары биир ситимҥэ үлэлэһэн эрэллэрэ көстөр, быйылгы дьарык атыҥҥы кэмнэртэн уратылааҕын тустуук уолаттарбыт этинэллэр. Дьарык, аһылык, күннээҕи таҥыллыбыт наардал, туохха барытыгар истиҥ сыһыан, сөпкө утуйуу, сынньалаҥ, махталлаах буолуу уонна сүрүнэ сиэри-туому тутуһуу, итэҕэл, Аар Айыыларга сүгүрүйүү – барыта Кыайыыга эрэ тиэрдэр!

Сахаларга Кыайыы кэлэ турдун.

Варвара НИКОЛАЕВА.