“Азия оҕолорун” быыстапката аһылынна

Бүгүн – Оҕо көмүскэлин күнүгэр «Мин Арассыыйам» устуоруйа пааркатыгар «Дети Азии – от идеи к истории» диэн Саха Өрөспүүбүлүкэтин бастакы бэрэсидьиэнэ Михаил Ефимович Николаевка аналлаах быыстапка үөрүүлээхтик аһылынна.

Бу тэрээһин “Азия оҕолоро” норуоттар икки ардыларынааҕы VIII спортивнай оонньуу култуурунай бырагырааматын чэрчитинэн ыытылынна.

Бэлиэ түгэҥҥэ «Азия оҕолоро» оонньуу уус уран салайааччыта, Арассыыйа народнай артыыһа Андрей Борисов, Саха Өрөспүүбүлүкэтин духуобунай сайдыыга уонна култуураҕа министрэ Афанасий Ноев, СӨ физическэй култуураҕа уонна успуорка министиирин бастакы солбуйааччы Александр Бугаев, СӨ норуотун хаһаайыстыбатын үтүөлээх үлэһитэ Матвей Мучин, Саха сирин бастакы бэрэсэдьиэнин библиотекатын салайааччы Юрий Семенов, өрөспүүбүлүкэ волейболга сүүмэрдэммит хамаандатын оонньооччута Алтан Афанасьев кыттыыны ыллылар, быыстапка аһыллыбытынан эҕэрдэлээтилэр.

«Азия оҕолоро» бастакы оонньуу чэпчэки атлетикаҕа күрэхтэһиитигэр үһүс бириистээх миэстэлээх Александр Бугаев бэйэтин оччотооҕу наҕараадаларын: кубогы уонна мэтээлин быыстапкаҕа көрдөрүүгэ туруорарга туттарбыта кэрэхсэннэ.

Быыстапка «Азия оҕолоро» оонньуу устуоруйатын толору аһан көрдөрөр. Бастакы түһүмэх, оонньууну төрүттээччи Михаил Ефимович Николаевка анаммыт. Манна кини үлэлээбит остуола, кэппит көстүүмэ, тус маллара, кинигэлэрэ, наҕараадалара, архыып докумуоннара бааллар.

Салгыы түһүмэхтэргэ «Азия оҕолоро» хайдах сайдан, кэҥээн барбытын көрдөрөр докумуоннар, наҕараадалар, мэтээллэр, кинигэлэр, хаартыскалар… көрдөрүүгэ туруоруллубуттар. Биир кэрэхсэнэр экспонатынан, бастакы оонньуу (1996) кыайыылааҕа, Олимпиада боруонса призера Георгий Балакшин боксаласпыт бэрчээккэтэ уонна шлема буолар.

Быыстапка, “Мин Арассыыйам” паарка иккис этээһигэр алтынньыга диэри үлэлиир. Куорат олохтоохторун уонна ыалдьыттары кэлэн көрөргүтүгэр, сыаналыыргытыгар ыҥырабыт. Аадырыһа: Дьокуускай, К.Д. Уткин уул. 5.

Петр ПАВЛОВ.

Ааптар хаартыскаҕа түһэриитэ.