Н.Н. Тарскай төрөөбүтэ 100 сыла: Туох, ханна, хаһан?

Ыам ыйын 8 күнүгэр – Саха сиригэр спорт уонна физическэй култуура сайдыытыгар бэйэтин сүҥкэн кылаатын киллэрбит салайааччы Николай Николаевич Тарскай төрөөбүтэ 100 сылын республика киин куоратыгар уонна Уус Алдан улууһугар киэҥник бэлиэтиэхтэрэ.

Ол курдук, Дьокуускайга, бу күн сарсыарда “Саха” национальнай көрдөрөр-иһитиннэрэр хампаанньа “Саҥа күн” диэн “күөх экранынан” биэриитигэр ыалдьыттар кэлэн, Н.Н. Тарскай туһунан уонна бу күн суолтатын, былаанын билиһиннэриэхтэрэ, кэпсиэхтэрэ.

Эмиэ сарсыарда 07:00 чаастан, Кыайыы болуоссатыгар “Зелёный фитнес” бырайыак чэрчитинэн Дьокуускай куорат баһылыга Евгений Григорьев, “ГТО оонньуулара-2024” кыайыылаахтара кыттыылаах эти-хааны чэбдигирдэр дьарык, маастар-кылаас ыытыллар.

Күнүс 12:00 чааска, “Туймаада” стадионун аттыгар, Н.Н. Тарскай бюһун иннигэр үгэс быһыытынан үөрүүлээх кэрэ бэлиэ түгэни бэлиэтээн, миитин уонна сибэкки дьөрбөтүн ууруу буолуо.

Эбиэттэн киэһэ 15:00 чаастан Саха Республикатын Правительствотын 2 №-дээх дьиэтин актовай саалатыгар Н.Н. Тарскай төрөөбүтэ 100 сылыгар аналлаах “төгүрүк остуол” уонна саҥа бэчээттэнэн тахсыбыт кинигэ сүрэхтэниитэ тэриллэр.

Киэһэ 19:15 чаастан “Саха” национальнай көрдөрөр-иһитиннэрэр хампаанньа “Олох үөһүгэр” биэриитэ эмиэ Н.Н. Тарскайга ананыаҕа.

Ити курдук, Н.Н. Тарскай төрөөбүт улууһугар Уус Алдаҥҥа эмиэ кэрэ бэлиэ күнү киэҥник бэлиэтиэхтэрэ. Ол курдук, улуус киинигэр Бороҕоҥҥо “Майаҕатта Бэрт Хара” стадиоҥҥа сарсыардааҥҥы сэрээккэ, улуус оскуолаларыгар Н.Н. Тарскайга аналлаах кылаас чаастара итиэннэ саамай көһүтүүлээх түгэнинэн – саҥа тутуллан үлэҕэ киллэриллибит спортивнай комплекс иннигэр Н.Н. Тарскай пааматынньыгын үөрүүлээхтик аһыы буолуоҕа.

Онтон төрөөбүт Баатаҕайын нэһилиэгэр олохтоохтор эмиэ мустан биир дойдулаахтарын ахтан-санаан ааһыахтара, бюһугар сибэкки дьөрбөтүн ууруохтара.

Бу, биллиилээх государственнай уонна общественнай деятель, Саха сиригэр физическэй култуура уонна спорт хамсааһынын тэрийбит Николай Николаевич Тарскай үбүлүөйүгэр ыытыллар тэрээһиннэргэ бары көхтөөхтүк кыттаргытыгар ыҥырабыт!

Дьулурҕан.