Сонуннар

Борцовка тиҥилэҕин имэрийиини тохтотуҥ

Мин тустуу күрэхтэһиилэрин 60 сылтан ордук кэм көрөн кэллим: орто оскуола чемпионатыттан саҕалаан, аан дойду таһымнаах тустуулары. Аҕыйах сылтан саҕалаан саха тустууктара, ордук хапсаҕайдьыттар, борцовкаларын тиҥилэҕин ытыстарынан имэрийэн баран, ол ытыстарын тылларынан салаан ылар үгэстэннилэр.

Тустууктар борцовка кэтэн баран, кирдээх-хахтаах муостанан хааман кэлэн көбүөргэ тахсаллар. Эбиитин, ол борцовка тиҥилэҕин имэрийбит кирдээх ытыстарынан утарсааччыларын, арбитры уонна секунданы кытта илии тутуһаллар. Итинник быһыыланыы санитарнай-гигиеническай ирдэбиллэри куруубайдык кэһии курдук сыаналаныан наада.

Сорох көрөөччүлэр таһырдьаттан кири-хоҕу үктээн киирэллэр, тустуу буолар саалаларыгар туалеттар муостаҕа халыйар түбэлтэлэрэ аҕыйаҕа суох. Тустууктарбыт ону үктээн түһүлгэҕэ тахсаллар. Аны, Кэбээйиттэн төрүттээх хапсаҕайдьыттар кыайдахтарына, көбүөрү ытыстарынан сотон баран, утараһааччыларын секунданын илиитин бобо туталлар.

Урут тустууктартан көлөһүнү, сыыҥы соттор былатыак ирдииллэрэ. Билиҥҥи тустууктар сыыҥтарын өрө сыҥаллар, хаанырдахтарына тарбахтарынан, ытыстарынан дьууххаланаллар, ол түмүгэр сыыҥҥа-хааҥҥа биһиллэн, көрүөхтэн түктэри көрүҥнэнэллэр.

Мин этиим: Успуорт министерствота, көҥүл тустуу уонна хапсаҕай федерациялара тустуук уонна хапсаҕайдьыт тустар кэмнэригэр этическай, ол иһигэр санитарнай-гигиеническай нуормалары тутуһар ирдэбиллэрин киллэрэллэрэ уолдьаста.

Максим АФАНАСЬЕВ, үлэ бэтэрээнэ.

Дьокуускай, Марха.

Добавить комментарий

Ваш адрес email не будет опубликован. Обязательные поля помечены *

196901
Бүгүн : 274