Санааларбын этиниэхпин баҕардым

// Суруллубуту сэҥээрии

«Дьулурҕан» хаһыат эрэдээктэрэ, спорт туһунан суруйар биллиилээх суруналыыс Петр Павлов “Тыгын тойон өйдөбүнньүгэ Сайсары эбэҕэ” диэн төбөлөөх ыстатыйатын ааҕан баран, куорат биир олохтооҕо буоларым быһыытынан бэйэм тус санааларбын этиниэхпин баҕардым.

Петр Семенович cуруйбутунан «Дети Азии» улахан тэрээһин буоларынан, Сайсары эбэ тула үгүс элбэх киэргэтии, тупсарыы үлэлэр бараллара чопчуламмыттара – биһигини үөрдэр. Саха омук былыргы дьыллар мындааларыттан, урукку дьыллар улаҕаларыттан таптаан Сайсары эбэ тула тоҕуоруһан, түөлбэлээн олорбуттара, билигин даҕаны Сайсары эбэ тула сахалар сөбүлээн олорор түөлбэлэринэн буолар диэтэхпинэ сыыспатым буолуо. Онон Ытык сирбит – Сайсары эбэ ыраас чэбдик салгынынан илгийэрин туһугар араас тэрээһиннэр буоллахтарына эрэ түбүгүрбэккэ куруутун кыһаллыахтаахпыт дии саныыбын.

Сэбиэскэй кэмнэргэ кэлии дьон аахайбакка куорат тутуутун ыытаннар, Сайсарыттан чугас Ытык булгунньаҕы олохтоох дьонтон ыйыппакка күртэрэн, ол оннугар дьиэ тутуутун ыыппыттара олус хомолтолоох. Куорат хорук тымырын Шестаковка үрэх куорат ортотунан сүүрүгүрбэт гына бөҕүнэн бүөлүү кутаннар, сытыйбыт-ымыйбыт сыт куораты тунуйара. Айсен Сергеевич мэр эрдэҕинэ саха дьоно тыл көтөҕөн ыраастыыр, дириҥэтэр элбэх үлэни ыытаннар, Сайсары эбэҕэ, Таалай күөлгэ Шестаковка уутун киллэрэн, сайҕаан ааһар буолан, куорат салгына син ырааһырар курдук. Үрэх Сайсарыттан тахсан Каландарашвили уулуссаҕа (аатын уларытыахха баар этэ) барар өттүн тупсаҕай гына оҥоруохха. Хайдах эрэ танканы аһарбат ханаабаны санатар.

Ити Петр Семенович этэр Тыгын тойон өйдөбүнньүгүн, Лермонтов уулусса кытыытыгар Сайсары Эбэ үрдүк кытылыгар хабыллар хаба ортотун булан, Күн тахсарын кэтэһиннэрэ илин диэки хайыһыннаран туруорар бэрт буолуо этэ дии саныыбын. Төһө кыалларынан үрдүк булгунньах курдук үрдэтэн баран, Үрдүк булгунньах үрдүттэн Үрүҥ Күн тахсыытын кэтэһэн үҥээри-сүктээри Аан дайдытын анаара көрө турарын курдук моһуоннаан.

Ити мин тус санааларым, кимиэхэ да соҥнообоппун. Үтүө буолуҥ.

Николай МЕСТНИКОВ.