Ярыгин-2024: Кыайыыга сирдиир хапсыһыылар

Красноярскай. Спортивнай тустууга «Иван Ярыгин Кубога» норуоттар икки ардыларынааҕы XXXV турнир бастакы күнэ.

Дьулурҕан сайтыгар саха тустууктарын киирсиилэрин билиһиннэриини салгыыбыт. Бу таһаарыыларга эһиги, саха тустууктарын бары хапсыһыыларын түмүгүн билиэххит.

Бу үһүс түһүмэххэ, Амма ыччата Андрей Мидловец үчүгэй өйдөбүлү хаалларда. Кини Россия чемпионатын призера, опыттаах бөҕөс Динислам Тахтаровы кытта олус табыллан туһунна. Олох куттаммакка, толлубакка кииристэ. Бастакы түһүмэххэ 2:0 ахсаанынан баһыйда. Онтон иккискэ киирэн биир түгэҥҥэ стойкаттан туора садьыйтаран, ахсааны тэҥнэтэн кэбистэ. Маннык түгэҥҥэ 2:2 ахсааҥҥа дагестанец кыайан испитэ. Ол эрээри, хапсыһыы бүтэрэ олох аҕыйах сөкүүндэ хаалбытын кэннэ Мидловец утарсааччытын үөһэттэн хам кууһан ылан «лампочка» диэн албаһы туттан, эбии икки баалы ылла. Итиэннэ кылбар кыайыыны ситистэ. Аны кини финал чиэппэригэр дагестанец Башир Магомедовы кытта киирсиэҕэ.

Аан дойду чемпионатын призера Арыйаан Тютрин, Ярыгин турнирын былырыыҥҥы призера Александра Карамзина, республика чемпионнара Олег Фомин, Айсен Потапов иккис тустууларыгар эмиэ кыайыыны ситистилэр. Тютрин аныгыскы эргииргэ бэйэтин киһитэ Александр Авеловы кытта киирсэр буолла.

Саха бөҕөстөрүн тустуулара:

59 кг С.Васильева – Бат Орших (Монголия) 0:9

50 кг Александра Карамзина – О.Рехметуллова (Чувашия) 13:2

50 кг Александра Копылова – М.Мунхбат (Монголия) 0:10

57 кг Яков Павлов – Заур Угуев (Дагестан) 0:6

61 кг Андрей Мидловец – Д.Тахтаров (Дагестан) 4:2

55 кг Севиль Назарова – М.Гулида (Беларусь) 10:0

57 кг Арыйан Тютрин – Н.Жуманазаров (Узбекистан) 6:0

57 кг Александр Авелов – К.Седен (Тыва) +3:3

57 кг Артём Слепцов – Н.Монгуш (Тыва) 2:14

70 кг Олег Фомин – М.Евлоев (Азербайджан) 2:1

70 кг Айсен Потапов – З.Бугулов (Хотугу Осетия) 10:3

57 кг Лев Павлов – Р.Гамзатов (Ставрополь) 1:2.

Күрэхтэһии салҕанар.

Петр ПАВЛОВ.