Ярыгин-2024: Бастакы тустуулар

Дьэ, өр кэтэспит күрэхтэһиибит саҕаланна. Бастакы күн эр дьон 3, дьахталлар 4 ыйааһыҥҥа тусталлар. Тустуу Иван Ярыгин аатынан Спорт дыбарыаһыгар үс көбүөрүнэн ыытыллар. Билиҥҥитэ трибунаҕа көрөөччү аҕыйах курдук.

Хапсыһыылар саҕаламмыттара чаас курдук буолла. Бу бириэмэҕэ биһиэннэриттэн 5 спортсмен номнуо туһунна.

Биһиги бөҕөстөрбүтүттэн көбүөргэ бастакынан республика чемпиона Уйгулан Иванов таҕыста. Кини Красноярскай уолун эрэллээхтик хотон, күрэхтэһиини кыайыынан саҕалаата. Онтон Федор Постников дагестанец Муса Мехтихановы бастакы түһүмэх түмүгүнэн 1:0 хотон иһэн, иккискэ киирэн баал биэртэлээн, түмүккэ 1:6 ахсаанынан хотторон кэбистэ.

Ол кэмҥэ аттынааҕы көбүөргэ аны Владимир Бояновскай таджик Мустафа Ахмедовка тугу да оҥорбото. Чэ, бу хотторууну Таджикистаҥҥа саҥа көспүт Виктор Рассадин иэстэһэр ини диэххэ. Олунньу саҥата Таджикистан чемпионата ыытыллыахтаах. Онно биһигиттэн Айаал Белолюбскай уонна Виктор Рассадин кыттыахтаахтар.

Сахалартан төрдүс киһинэн көбүөргэ былырыыҥҥы Ярыгин турнирын боруонса призера Александра Карамзина таҕыста. Кини Бурятия кыыһын, атахха киирэн истэҕинэн хонноҕун анныттан ылан тиэрэ саайн, устунан ыраас кыайыыны ситистэ.

Онтон Оренбургтан тустар Томпо ыччата Яков Павлов уруккута биллиилээх бөҕөс Руслан Караев төрөппүт уолун Тамерлан Караевы кытта туһунна. Итиэннэ 8:2 ахсаанынан эрэллээхтик кыайда. Бу иннинэ Яков наар 61 киилэҕэ тустубутун санатар тоҕоостоох.

Сахалар тустуулара:

57 кг Уйгулан Иванов – А.Кочевойу (Красноярскай) 5:1

57 кг Федор Постников – М. Мехтихановка (Дагестан) 1:6

70 кг Владимир Бояновскай – М.Ахмедовка (Таджикистан) 0:5

50 кг Александра Карамзина – А.Ухееваны (Бурятия) ыраас кыайыы.

57 кг Яков Павлов – Т.Караевы (Ставрополь) 8:2.

Чэ, билиҥҥитэ саҕалааһын итинник. Биһиги сайтпытын кэтээн көрө сылдьыҥ.

Петр ПАВЛОВ.