Сонуннар

Европа чемпионатыгар кимнээх кыттыахтарай?

Билигин Красноярскайга ыытылла турар «Иван Ярыгин Кубога» спортивнай тустууга норуоттар икки ардыларынааҕы турнир биир сыала – олунньу ортотугар Бухарестка (Румыния) буолуохтаах Европа чемпионатыгар Россия хамаандатын састаабын талыы этэ.

Ол эрээри, балаһыанньаҕа олоҕуран, Россия спортивнай тустууга федерацията өссө эрдэ, Красноярскайдааҕы турнир быдан иннинэ, Тустуу аан дойдутааҕы холбоһугар (UWW) Россия хамаандатын састааба хайдах буолуохтааҕын сайаапка быһыытынан ыыппыта.

Ол барыллааһын састаап UWW сайтыгар номнуо тахсыбыта. Онно олоҕуран Россияттан – Заур Угуев (57 кг), Абасгаджи Магомедов (61 кг), Шамиль Мамедов (65 кг), Иналбек Шериев (70 кг), Тимур Бижоев (74 кг), Ахмед Усманов (79 кг), Артур Найфонов (86 кг), Магомед Курбанов (92 кг), Абдулрашид Садулаев (97 кг), Абдулла Курбанов (125 кг) ааттарыгар сайаапка түһэриллибитэ.

Онтон Красноярскайдааҕы турниртан көрдөххө, Ахмед Усманов, Абдулла Курбанов бэйэлэрин тустар таһымнарыгар өссө киирбэккэ сылдьаллара көһүннэ. Онтон Ярыгин турнирын көтүппүт Шамиль Мамедов эмиэ хайдах таһымнааҕа биллибэт. Онон мин тус санаабар, сүүмэрдээһин эрдэттэн буолбакка, күрэхтэһии түмүгүнэн оҥоһуллара, талыллара ордук этэ.

Бу састаап эрдэттэн МОК уонна UWW бэрэбиэркэтин барбытынан, эрдэ талыллыбыт буолуон сөп диэн сэрэйиллэр. Бары билэ-көрө сылдьаргыт курдук, билигин Россия спортсменнара аан дойдутааҕы күрэхтэһиилэргэ улахан бэрэбиэркэни баран эрэ баран кытталларын курдук балаһыанньа үөскээтэ.

Балаһыанньа быһыытынан Европа чемпионатыгар Россия хамаандата «Россия» аатыттан буолбакка, AIN диэн көҥүл дойду аатыттан кыттыахтаах.

Итинник эрдэттэн быһаарыыны эһиги туох дии саныыгыт?

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

137694
Бүгүн : 158