Күрэхтэһии судьуйата суох ыытыллыбат

Хабаровскайга Россия эр дьоҥҥо боксаҕа чемпионата ыытыллан ортолоото. Рингэҕэ киирсиилэр улам сытыырхайан иһэллэр. Спорт бу көрүҥэр дойду чемпионата – сыл быһаарыылаах уонна эппиэттээх күрэхтэһиитэ.

Биһиги, күрэхтэһии буолла да, бу аҥардас спортсменнар эрэ курдук өйдүүбүт, онтон ол күрэхтэһии тренердэрэ, судьуйалара, медиктэрэ, суруналыыстара, волонтердара… суох ыытыллыбат ээ.

Хабаровскайга биһигиттэн, Саха сириттэн Бүтүн Россиятааҕы категориялаах судьуйалар Ариан Монастырев (Мэҥэ Хаҥалас) уонна Александр Мынта (Нерюнгри) үлэлээн, рингэҕэ киирсиилэри сууттууллар. Ону тэҥэ Марианна Монастырева секретариакка көмөлөһөөччүнэн үлэлиир.

Судьуйаларбыт маннык улахан таһымнаах күрэхтэһиигэ үлэлэһэ сылдьаллара үөрүүлээх гынан баран, кэпсэтэн биллэххэ, кинилэр бэйэлэрин суоттарыгар сылдьаллара хомолтолоох эбит.

Хаартыскаҕа: Ариан Монастырев киирсии кыайыылааҕын илиитин өрө көтөҕөр. Кыайыылаах – Габил Мамедов (Оренбург).

«Дьулурҕан».

Хаартыска Россия боксаҕа сайтыттан ылылынна.