Каспийскай-2023: Чемпионат иккис күнүгэр…

Чемпионат бастакы күнүн түмүгүнэн дьахталларга да, эр дьоҥҥо даҕаны финалга кимнээх тусталлара билиннэ. Онуоха олохтоохтор 4, буряттар 3 финалистаахтар. Оттон биһиги?..  

Бэҕэһээ, ылан көрдөххө, саамай эрэнэр ыйааһыннарбытыгар уолаттарбыт мөлтөхтүк туһуннулар. Константин Капрынов (70 кг) бастаан чечен Джохар Джабаевы 5:1 ахсаанынан хотон баран, салгыы күрэхтэһиигэ көбүөр хаһаайына Азнаур Таваевтыын тустуутугар бастаан утаа хотон иһэн, биир түгэҥҥэ тиэрэ көттөрөн 4 баалга түһэн баран, хаалбыт бириэмэҕэ бэлэмэ суох түһүөлүү сылдьан, бэйэтэ кииртэлээн биэртэлээтэ. Ыгылыйар, ыксыыр эбит. Онон 3:9 ахсаанынан хотторон кэбистэ.

Оттон биир эмиэ эрэммит киһибит Петр Копылов (57 кг) – И.Шахбановы (Краснодар) хотон баран, москвич О.Султановтыын тустуутугар эмиэ кыайан иһэн, биир түгэҥҥэ бэйэтэ кимэ сылдьан тэмтэрийбитигэр, киһитэ саба түһэн ахсааны тэҥнээн кэбистэ (3:3) уонна устунан кыайыыны ситистэ.

Дьэ, бастыҥнар дии санаабыт уолаттарбыт итинник хобдохтук хоттордулар. Эдэрдэртэн Россия чемпионатыгар аан бастаан күүһүн холонор Дьулусхан Тотоновы (65 кг) бэлиэтиэххэ сөп. Кини Ш.Гусейновы (ХМАО) 4:0 уонна Д.Амирхановы (Москва) 5:0 ахсааннарынан кыайан баран, дагестанецтар эрэллэрэ, олимпийскай призёр, спорт үтүөлээх маастара Гаджимурад Рашидовы син аҕылатта, 0:3 хоттордо. Онон санаатын түһэрбэккэ, салгыы өссө дьаныардаахтык дьарыктаннаҕына, сайдыан сөп эбит диэн сыаналаатым.

Бу күн атыттарбыт үөтэлээбэтилэр.

Онон, бүгүн «уоскутар» диэн санааны көтөҕөр хапсыһыыларга икки бөҕөспүт кыттар буолла. Финалга тахсыбыттарга хотторбут Федор Постников уонна Харысхал Григорьев. Постников – А.Чамзын/Ю.Явбатыров пааратын кыайыылааҕын кытта киирсиэ. Григорьев – Муса Мехтихановтыын (Дагестан) тустуоҕа.

Оттон кыргыттарга 59 киилэҕэ Светлана Васильева уонна Евгения Огородникова иккиэн бэйэ-бэйэлэрин кытта тусталлар. Хайалара кыайбыта салгыы А.Сидельникованы (Кемерово) кытта, боруонса мэтээли ким ыларын быһаарсыаҕа.

Бүгүн, Россия чемпионатын иккис күнүгэр эр дьоҥҥо 61 уонна 74 кг ыйааһыннаахтар күрэхтэһиини саҕалыыллар.

Онуоха биһигиттэн 61 кг – Авелов Александр, Иванов Уйгулаан, Константинов Петр, Павлов Яков, Терентьев Ньургун; 74 кг – Свинобоев Станислав, Сивцев Николай, оттон дьахталларга 57 кг Севиль Назарова тусталлар. Спортсменнарбытыгар ситиһиилээх кыттыыны баҕарабыт уонна сэмээр мэтээл кэтэһэбит. Онон түмүк оҥорор эрдэ дии саныыбын, күрэхтэһии салҕанар…

PS: чемпионат биирдиилээн хапсыһыыларын Дьулурҕан ютуб каналыгар көрүөххүтүн сөп.

Бүгүҥҥү, бэс ыйын 21 күннээҕи чемпионат программата:

17:00 – 57, 65, 70 кг «уоскутар» бөлөх тустуулара. 61, 74 кг барыллааһын хапсыһыылар.

00:00 – 61, 74 кг финалга тахсар иһин киирсиилэр.

01:00 – 57, 65, 70 кг финаллар.

Бүгүҥҥү финаллар:

50 кг: Елизавета Смирнова (Дагестан) – Полина Лукина (Ростов)

55 кг: Екатерина Полещук (Краснодар) – Ирина Ологонова (Бурятия)

59 кг: Зельфира Садраддинова (Кемерово) – Жаргалма Цыремпилова (Бурятия)

57 кг: Заур Угуев (Дагестан) – Артём Гобаев (РСО-Алания/Москва)

65 кг: Ибрагим Ибрагимов (Дагестан) – Шамиль Мамедов (Дагестан/Москва)

70 кг: Иналбек Шериев (Москва) – Евгений Жербаев (Бурятия).

«Дьулурҕан».