Спортивнай оскуола быйылгы хараҥаччылара

Муус устар 25 күнүгэр Дьокуускай куорат 1 №-дээх оҕо спортивнай оскуолатыгар үгэс буолбут үөрэҕи түмүктүүр үөрүүлээх тэрээһин буолан ааста. Араас өҥнөөх салгын шаардарынан бырааһынньыктыы киэргэтиллибит сааланы толору оскуоланы бүтэрэр эдэр спортсменнар, кинилэр уһуйааччылара, тренердэр уонна төрөппүттэр мустубуттар.

Бырааһынньыгы иилиир-саҕалыыр “Саха” НКИК эдэр ыытааччыта Антон Васильев, эҕэрдэ тылынан үөрүүлээх сиэри-туому арыйар. Мустубут дьону эҕэрдэлээн, спортивнай гимнастика салаатын бүтэрбит оҕолор кыттыылаах «Тетрис» аныгы үҥкүү ансаамбыла кэрэ нүөмэрин бэлэхтиир.

Дириэктэр Иван Прокопьевич Белолюбскай спорт олоҕор саҥардыы үктэнэн эрэр оҕолору истиҥник эҕэрдэлээн туран, кинилэргэ спорт оскуолатын бүтэрбиттэрин туһунан сибидиэтистибэлэри туттарар.

Ол курдук, бастакынан үөрэҕи бүтэрбиттэрин туоһулуур докумуоннары чэпчэки атлетика салаатын спортсменнара, Уһук Илин федеральнай уокуругун барьердаах сүүрүүгэ призердара: Храмова Анастасия, Левин Сергей уонна Ощепков Илья, Саха сирин спринтерскай сүүрүүгэ призердара Павлов Станислав уонна Макарова Диана, СР барьердаах сүүрүүгэ призера Тюрин Андрей туталлар. Бу кэскиллээх спортсменнары иитэн-такайан таһаарбыт СР үтүөлээх тренерэ, СР үөрэҕириитин уонна Россия физкультуратын туйгуна Нечаев Петр Александрович махтал суругунан уонна өйдөбүнньүк бэлэҕинэн наҕараадаланар.

Чэпчэки атлетикаҕа уонна сахалыы ыстаныыларга республикатааҕы турнирдарга үгүстүк кыайбыт уонна бириистээх миэстэлэргэ тиксибит Ляшеев Марат (кини маны таһынан өссө сахалыы остуол оонньууларыгар СР спордун маастара үрдүк ааттаах) уонна Федорова Ярослава бу оскуолаҕа РФ уопсай үөрэхтээһинин бочуоттаах үлэһитэ, СР үөрэҕириитин, физкультураҕа уонна спорка туйгуна Алексеев Василий Романович салалтатынан дьарыктаммыттара. Оскуоланы ситиһиилээхтик бүтэрбит республика уонна куорат турнирдарын призера Гуляев Артур чэпчэки атлетика салаатын старшай тренерэ Гуляев Сергей Васильевичка дьарыктаммыта.

Дьокуускай куоракка бастыыр иһин күрэхтэһиилэр кыайыылаахтара Герасемчук Адилер, республикатааҕы турнирдарга кыайбыт, миэстэлэспит Егоров Александр уонна Гуляев Алексей бокса салаатыгар Саха сирин үөрэҕириитин, физкультураҕа уонна спорка туйгуна Батура Андрей Николаевичка дьарыктанан, үөрэхтэрин ситиһиилээхтик түмүктээтилэр.

Соторутааҕыта арыллыбыт, оскуола биир кэскиллээх салаата – мас тардыһыытын отделениета буолар. Манна СР үөрэҕириитин, физкультураҕа уонна спорка туйгуна Иван Иванович Копыриҥҥа эрчиллэн Винокуров Артем, Яковлев Игорь, Куприянов Иннокентий үгүс ахсааннаах республикатааҕы уонна куораттааҕы күрэхтэһиилэргэ кыайталаабыттара.

Онтон гиирэ спордун салаатын старшай тренер, Россия спордун маастара Иванова Елена Николаевна салайар. Кини бэлэмнээбит оҕолоро Солдатов Эрчимэн уонна Филиппов Яков республикаҕа миэстэлэспиттэрэ, куорат күрэхтэһиитигэр бастаабыттара, онтон Гурулуева Юлия куорат күрэхтэһиилэригэр миэстэлэспитэ, Алимкулова Альбина элбэх күрэхтэргэ кыттыбыта.

Гузеева Ксения, Кондратьева Алина, Саввина Анастасия, Семенова Айта, Шомоева Анастасия, Варейките Анна, Липовка Доминика, Власова Кристина, Матюшкина Анастасия, Раздьяконова Диана, Синцова Софья – спортивнай гимнастика салаатыгар РФ уопсай үөрэхтээһинин, СР үөрэҕириитин, физкультураҕа уонна спорка туйгуна Качановская Ольга Евгеньевна ииппитэ-үөрэппитэ.

Оскуоланы бүтэрээччилэр бары үөрүүлээх быһыыга-майгыга сибидиэтилистибэлэрин туттулар, кинилэри эрчийбит, спорт кистэлэҥнэрин арыйбыт тренердэрэ эмиэ наҕараадаланнылар.

Махтал суругу уонна сэмэй бэлэҕи чэпчэки атлетика салаатын саамай актыыбынай төрөппүтэ Захарова Татьяна Христофоровна тутан үөрдэ-көттө.

Түмүккэ бу оскуола иитиллээччитэ, мадьыны, республика турнирын кыайыылааҕа, СР бастыыр иһин күрэхтэһии призера, Саха сиринээҕи ырыа күрэхтэрин Гран-притын хаһаайына Сулустаан Копырин ылбаҕай ырыатынан эҕэрдэлээтэ, онтон чэпчэки атлетикаҕа тренер Василий Романович Алексеев оскуоланы бүтэрэр иитиллээччилэргэ кэс тылын тиэртэ.

Бу оскуолаҕа кыра саастарыттан эрчиллибит оҕолор бу түгэҥҥэ аан бастаан спорт оскуолатыгар кэлбит кэмнэрин, манна аҕалыы-ийэлии истиҥник көрсүбүт уһуйааччылара бу сыллар усталарыгар кинилэри спорт эйгэтигэр сиэтэн киллэрэн, үктэлтэн үктэлгэ таһаарбыттарын, мэлдьи чиэһинэй киирсиигэ кыайарга, өрүү бэйэ-бэйэҕэ көмөлөсүһэргэ үөрэппиттэрин-ииппиттэрин уйадыйа уонна махтана санаатылар.

Спорт өрө күүрүүлээх, кыайыы көтөллөөх, сороҕор хотторуу хомолтолоох суолугар ситиһиилэнэ туруҥ, Дьокуускай Бастакы нүөмэрдээх спортивнай оскуолатын 2023 сыллаах хараҥаччылара!

Анжела СИВЦЕВА, дириэктэри иитии-үөрэтии чааһыгар солбуйааччы.