Сонуннар

Үс Хатыҥ ипподрома тугу күүтэрий?

Самаан сайыммыт кэлэн, кыратык ат сүүрүүбүт тула санаабын суруйаары. “Дьулурҕан” ааҕааччылара, бэс ыйын 12 күнүгэр дьэ, Ил Дархан бирииһин сүүмэрдээһин сүүрүүлэр буолуохтаахтар. Сүүрэр сирдэрэ – Иннокетний Свинобоев-Тыыннаахап аатынан Үс Хатыҥ ипподрома.

Сэрэйдэххэ, быһа холоон 12-15 сүүрүүк сүүрэр суолга тахсара былааннанар. Ол эбэтэр, ити күн 3 бөлөҕүнэн сүүрэн, 9 путевканы боксаҕа былдьаһыахтара. Былырыыҥҥы кыайыылаах, мэҥэлэр Криттара быһа миэстэлээх. Дьэ, ис иһигэр киирдэххэ кимнээх бу 9 бокса миэстэтин иһин киирсэллэр?

Бастатан туран былырыыҥҥы миэстэлэспит уус алданнар Эйр Бен Барстарын, ньурбалар Эллизиумнарын уонна улуу сылгыбытын, Чурапчы аатааҕын Мэйн Кониг ааттыыбыт. Ньурбалар биллэн туран, Саха сирин кырдьаҕас сүүрдээччитигэр, 63 сааһыгар сылдьар, ол да буоллар эдэрдии эрчимнээх Сэмэн Лихановка эрэнэллэр. Уус алданнар, Виталий Петров саҥа саҕалыыр тренер диэтэххэ, былырыын атын хайдахтаах курдук турукка киллэрэн, Ил Дархан бирииһигэр призердаабытай!? Быйыл да ол сыалын, сорудаҕын толорор санаалаах.

Баларга кимнээх утарсыы оҥороллор? Өссө былырыын сайыҥҥыттан намнар, аммалар, горнайдар оҥостон, бэлэмнэнэн саҥа аттары уонна тириэнньэрдэрин уларыппыттара. Сергей Ядреев салатлталаах Нам тренотделениета Аутлендер диэн былырыын Саха сиригэр кэлиэн аҕай иннинэ соҕуруу икки күүстээх, бастакы группалаах сүүрүүлэри кыайбыта.  Кини аҕата Паландер, 2008 сыллаахха Россия Президенин бирииһин кыайан турар. Онон хаан, кылаас баар сылгыта. Манна Сергей Петрович улахан уопутун эбэн кэбиһиэххэйиҥ.

Аммалар, абаҕалар, тренер Николай Громов хаһыс да сылын Ил Дархан бирииһин кубогар чугаһыы сылдьыбыта. Инники хаста да 2-3 буолуталаабыта, ол кыайыы буолбатах. Республикабыт бу кэмҥэ биир тутаах тренерин баҕа санаата – Ил Дархан бирииһин кыайыыта. Ламан Леча, аҕата Майншафт. Бу атыыр аата элбэҕи этэр. Биир баар-суох оҕото Мэйн Кониг, Ил Дархан бирииһин 3 төгүллээх кыайыылааҕа. Онон быйыл табылыннаҕына Үс Хатыҥ ипподромугар Майншафт икки оҕотун көрүөхпүт. Бу атыыр оҕолоро Мономах 2009 уонна Палех 2012 сыллардаахха Россия Президенин бирииһин кыайан тураллар.

Горнайдар, быйыл Райзинг Кингы уонна Максимус Таймы тренер Василий Игнатьев бэлэмнээтэ. Биир уопуттаах, соҕурууннан үлэлээбит тренер, Ил Дархан бирииһин элбэхтэ кыайбыта, бу ыллыгы үчүгэйдик билэр. Эбиитин, соҕурууттан анаан-минээн кылаастаах сүүрдээччини ыҥыран аҕалан, Үс Хатыҥ ипподромун боруобалатаары сылдьар.

Онон биһигини олус күүрээннээх, илин-кэлин түһүүлээх сүүрүүлэр күүтэллэр. Бэс ыйын 12 күнэ, Үс Хатыҥ ипподрома.

Михаил МОРДОВСКОЙ – Михута.

Добавить комментарий

Ваш адрес email не будет опубликован. Обязательные поля помечены *

186576
Бүгүн : 280