Альбом-кинигэ сүрэхтэннэ

Муус устар 21 күнүгэр Чурапчытааҕы библиотечнай ситим киин библиотекатын ааҕар саалатыгар “Байбал тэлбит суолунан” диэн альбом-кинигэ сүрэхтэннэ. Кинигэни Саха Өрөспүүбүлүкэтин култууратын туйгуна, Чурапчы улууһун, Чурапчы уонна Алаҕар нэһилиэктэрин бочуоттаах гражданина, Россия суруналыыстарын сойууһун чилиэнэ, РФ айар сойуустарын чилиэнэ, норуот маастара, кыраайы үөрэтээччи, спорт, үлэ бэтэрээнэ Григорий Турантаев-Чолбон таҥан оҥордо, олимпийскай чемпион Павел Пинигин 70 сааһын туолуутугар анаата.

Бу хаартысканан дьүһүйүү Чурапчы тустууктара 2018, 2023 сылларга Н.Н. Тарскай бирииһин турнирдарыгар дьоһун кыттыыларын көрдөрөр. “Сайдыы” кинигэ кыһатыгар 400 экземплярынан бэчээттэммит, 52 страницалаах, 337 хаартыска киирбит.

Кинигэ сүрэхтэниитигэр мустубуттары библиотекарь Марфа Кузьмина сандал саас кэлбитинэн, Григорий Турантаев альбом-кинигэтэ сүрэхтэнэринэн эҕэрдэлээтэ, айымньыны сиһилии ырытта. Киирии ыстатыйаны “Саха боотура, Чурапчы чулуута Павел Пинигин” диэн төбөлөөн Чурапчы улууһун баһылыга Степан Саргыдаев суруйбутун бэлиэтээтэ.

Эҕэрдэ тылы улуус дьаһалтатын спорка уонна физическэй култуураҕа управлениетын специалиһа Ольга Попова, Чурапчы нэһилиэгин дьаһалтатын нэһилиэнньэни кытары үлэҕэ сүрүннүүр специалиһа Мария Матвеева,  Д.П. Коркин аатынан спортивнай албан аат мусуойун дириэктэрэ Егор Пудов, Чурапчытааҕы спортивнай интернат-оскуола кылаабынай тренерэ Альберт Макаров, ветеран-спортсмен, биллиилээх тустуук Семен Морфунов, киин библиотека сэбиэдиссэйэ Вера Платонова, табаарыстара Гаврил Макаров, Алексей Слепцов, Иван Парфенов эттилэр.

Кинилэр Григорий Григорьевич ураты талаанын – фотограф, худуоһунньук, скульптор, кыраайы үөрэтээччи, уус быһыытынан элбэҕи оҥорбутун, төрөөбүт-үөскээбит Чурапчытын патриота буоларын эттилэр. Киһи, табаарыс быһыытынан сэмэйин бэлиэтээтилэр, өссө даҕаны айа-тута, үлэлии сылдьарыгар баҕардылар. Онлайн режиминэн экраҥҥа биллиилээх тустуук, кыраайы үөрэтээччи Михаил Друзьянов эҕэрдэтэ көһүннэ.

Бырааһынньыгы Григорий Григорьевичка анаммыт тойук, спорка анаммыт ырыаларынан эҕэрдэлэр тупсардылар.

Түмүккэ Григорий Турантаев бэйэтин айар үлэтиттэн кэпсээтэ, быыстапкаҕа туруоруллубут айымньыларын быһааран биэрдэ, кэлэн кыттыбыттарыгар махтанна.

Алексей СЛЕПЦОВ.

Чурапчы.

Добавить комментарий

Ваш адрес email не будет опубликован. Обязательные поля помечены *

051035
Бүгүн : 212