Сардаананан киэн туттабыт

Кытай Ханчжоу куоратыгар ыытыллыбыт Азия норуоттарын XIX спортивнай оонньуулара биһиги туспутугар ситиһиилээх буолбута. Ол курдук, бу орто дойдуга киһи-аймах сүрүннээн тоҕуоруһан олорор континенын күрэс былдьаһыытыгар саха спордун икки иитиллээччитэ: сүүрүк Сардаана Трофимова уонна тустуук Айаал Лазарев күүстэрин холоһон – иккиэн боруонса мэтээл хаһаайыннарынан буолбуттара.

Онон этэргэ дылы, улахан аан дойдутааҕы таһымнаах түһүлгэттэн илии тутуурдаах, өттүк харалаах кэллилэр. Бу ситиһиилэринэн биир дойдулаахтарын сүргэлэрин көтөхтүлэр, сахалар даҕаны кыахтаахтарын көрдөрдүлэр.

Үрдүк таһымҥа сылдьарын итэҕэттэ

Дьахталлар марафоннарыгар Кытай, Корея, Бахрейн, Япония курдук Азия континенын бары күүстээх чэпчэки атлеттара кыттыбыттара. Сардаана сүүрүүнү үчүгэйдик саҕалаан, дистанция ортотугар диэри инникилии сылдьыбыта. Отутус километрга кини Непал уонна Кытай кыргыттарын кытта уопсай бөлөхтөн арахсан, уһулу тахсан сүүрбүтэ. Ол эрээри, сотору кэминэн, ити утарсааччылара инники түспүттэрэ.

Түмүккэ дьахталлар марафоннарыгар кыайыылааҕынан Бахрейнтан кыттыбыт кенийка Эуниче Чумба (көрдөрүүтэ – 2 чаас 26 мүн. 12 сөк.) буолбута. Иккис миэстэни олохтоохтор эрэллэрэ Дешун Жан (2 чаас 27 мүн. 57 сөк.) ылбыта. Онтон, быйылгы сылга киирэн баран маннык улахан таһымнаах аан дойдутааҕы күрэхтэһиигэ маҥнайгытын сүрэхтэммит биһиги кыыспыт Сардаана Трофимова биэтэккэ үһүс киһинэн кэлбитэ. Кини бириэмэтэ – 2 чаас 28 мүн. 39 сөк.

Экспресс-интервьюлар

В.П. Ларионов аатынан Майа орто оскуолатын дириэктэрэ, чэпчэки атлетикаҕа Бүтүн Россиятааҕы категориялаах судьуйа Павел Васильев:

– Сардаана бу бастакы официальнай международнай старта. Хара бастакыттан 3 иһигэр киирбитэ сүрдээх улахан ситиһии. Япония, Кытай марафонкалара Африка сүүрүктэрин кэнниттэн иккис күөҥҥэ сылдьаллар. Иннигэр биир китаянка эрэ түстэ. Бу Сардаана үрдүк таһымҥа сылдьарын көрдөрөр. Баҕар бириэмэтэ олус үчүгэйэ суох диэхтэрэ. Марафон трассата, сүүрэр усулуобуйата, салгына араас буолар. “Түргэн” суоллаах трассаларга анаан арыаллыыр, көмөлөһөр дьонноох марафоннарга үчүгэй бириэмэ көрдөрүллэр. Бу иннинэ хас эмэ сылы быһа итинник күрэҕэ суох үрдүк форматын тута сылдьыбытын дьиҥнээх геройство курдук сыаналыыбын. Үрдүк таһымнаах күрэхтэһиитэ суох ханнык баҕарар мотивация сүтэн оһон барар.

Олимпиадаҕа диэри Европаҕа “түргэн” суоллаах, күүстээх конкуренциялаах биир марафоҥҥа табыллан сүүрдэҕинэ, бэйэтигэр эрэл киириэ, толору аһыллыа дии саныыбын.

Билигин рейтининэн эҥин диэн кэпсэтиилэр бааллар. Оннук буоллаҕына, континент призера киирэрэ буолуо. Бириэмэнэн буоллаҕына, лицензионнай марафоҥҥа сүүрэн нормативы холкутук толоруо. Олимпиадаҕа биир көрүҥҥэ 3 киһиттэн ордук киһи киирбэт. Холобур, Кенияҕа биир таһымнаах 10 сүүрүк баар буоллаҕына, үһэ эрэ киирэр

Олимпийскай норматив 2:26.50 сөк. Барыта 80 киһи киирэр.

Биллиилээх спортсмен, тренер уонна педагог Афанасий Илларионов:

-Сардаананы, тренерин Татьяна Юрьевна Жиркованы Азиатскай оонньууларга ситиһиилээхтик кыттыбыттарынан эҕэрдэлиибин! Улахан ситиһии! Бириэмэтэ да куһаҕана суох. Китаянканы кыайыан сөп эбит.

Кэлиҥҥи икки сылга Сардаанаҕа биһиги, Мэҥэ Хаҥаластар сүүрүкпүт Константин Драгунов дьарыгар көмөлөһөр, пейсмеркерынан сылдьр. Онон К.Драгунов эмиэ бу ситиһиигэ улахан өҥөлөөх. Кини эмиэ Татьяна Юрьевнаҕа дьарыктанар. Олимпиадаҕа диэри өссө да сылдьыстар диибит.

Сардаана урукку бириэмэтигэр, бастыҥ көрдөрүүтүгэр тиийэр кыахтаах эбит диэн үөрдүм.

Саха сирин чэпчэки атлетикаҕа федерациятын президенэ Анатолий Кырджагасов:

–Сардаана Трофимова бу ситиһиитэ – саха дьонугар хаһан да буолбатах саҥа саҕахтары арыйар ситиһии. Холобур, тустууттан, боксаттан элбэх харчы, күүс республика өттүттэн угуллар көрүҥнэргэ саха дьоно үрдүкү ситиһиилэри эрэйиэн эрэйэр буоллаҕына, чэпчэки атлетика ситиһиилэрэ экономика да өттүттэн көрдөххө лаппа эппиэттэһэр. Иккиһинэн, сүрдээх элбэх (маассабай) киһи сүүрэр хаамар буолбута саха омугун уопсай доруобуйата тупсарыгар сүрдээх улахан төһүү буолар уонна кэскиллээҕин түстүүр. Онон саха правительствота бу чэпчэки атлетика курдук маассабай, элбэх киһини угуттуур, дьон доруобуйатын тупсарар көрүҥэр өссө элбэх күүһүн уурдаҕына, сахалар полумарафонтан саҕалаан бары уһун дистанциялары “саха көрүҥэ” оҥоруохпутун сөп. Ити айылҕаттан бэриллибит тулуурдаах дьон спорка көрүҥнэрэ. Биһиги тыйыс айылҕабыт, элбэҕи уһуннук тулуйар кыахтаах дьоммутугар сөп түбэһэр спорт көрүҥэ буоларын туоһулуур.

ххх

Түмүктээн эттэххэ, Сардаана Трофимова – Азия оонньууларыгар ситиһиилээхтик кыттан, спорка уһун үйэлэнии, кыайыыга дьулуур үтүө холобурун көрдөрдө.

Петр ПАВЛОВ.