Киэн туттар тренербит

Амма улууһун саамай кэрэ айылҕалаах сирэ – Амма-Наахара олус баай историялаах, элбэх биллэр үлэһит дьонноох. Олортон биирдэстэрэ П.И. Яковлев аатынан орто оскуола дуобакка тренерэ, Саха Республикатын үөрэхтээһинин туйгуна, «За вклад в развитие семейной политике», «Ветеран физической культуры РС (Я)» уонна «За вклад в развитие физической культуре и спорта в Амгинском улусе» бэлиэлэр хаһаайыннара, Амма улууһун спорка бочуоттаах бэтэрээнэ, «Урожай» спортивнай уопсастыба бочуоттаах үлэһитэ, Амма улууһун бастыҥ тренерэ, Амма-Наахара бочуоттаах олохтооҕо – Гаврильев Валерий Иванович.

Төрдө-ууһа

Валерий Иванович Болугурга күн сирин көрбүт. Аҕата Болугуртан төрүттээх Иван Иванович Гаврильев, ийэтэ Өнньүөстэн төрүттээх Александрова Зинаида Лаврентьевна буолаллар.

Бииргэ төрөөбүт 5 оҕоттон 2-с оҕонон төрөөбүт. Аҕата Петр Ионович Яковлевы кытта учууталлыы сылдьан, иккиэн Валентина Гаганова бачыымынан совхозка үлэлии тахсыбыттар, кэнники салайар үлэҕэ сылдьыбыт. Ийэтэ олоҕун тухары библиотекарынан үлэлээбит. Валерий Иванович бииргэ төрөөбүттэрэ бары үлэһит буолан, Саха сиригэр үлэлии-хамсыы сылдьаллар. Элбэх оҕо, сиэн төрөппүттэрин төрдүлэрин салгыыллар.

Дьиэ кэргэнэ
Валерий Иванович Өнньүөскэ Филиппова Нина Романовналыын ыал буолбуттара 40-тан тахса сыл буолбут. Нина Романовна оҕо уһуйааныгар үлэлээбит, билигин бочуоттаах сынньалаҥҥа олорор. Кинилэр 4 оҕолоохтор, бары ыал буолан үлэлии-хамныы сылдьаллар. Зина – начальнай кылаас учуутала, Рома – полицияҕа ГАИ-га үлэлиир, Виктор – землеустроитель уонна оҕолору тустууга дьарыктыыр, тренер, Валера – тутааччы. Оҕолор бары сиэн бэлэхтээн, эбээ-эһээ үөрүүлэрэ үгүс.

Дуобат кэрэ эйгэтэ
Валерий Иванович 1993-с сыллаахтан оҕолору дуобакка дьарыктаан саҕалаабыт. Бэйэтэ баҕа өттүнэн общественнай тренер диэнинэн үлэлии сылдьыбыт, куруһуок курдук ыытар эбит. Онтон 2013 сыллаахтан ДЮСШ тренерэ. Элбэх оҕону дьарыктаан, ситиһиилэрэ үгүс.

«Барыта төһө оҕону үөрэттиӊ, уһуйдуӊ?» диэн ыйытыыга маннык хоруйдаата:

– 1993 сылтан киһи кыайан аахпат буолуохпар дылы элбэх оҕону дьарыктаабытым» – диэн баран, мичээрдээн кэбистэ. Холобура Аан дойду призера баар, Европа призера, Россия чемпионката, Саха сирин чемпионкалара бааллар. Улууска өрүү миэстэлэһэллэр, чемпионнууллар. Ону таһынан Россия элбэх куоратын кэрийэн, үгүс ситиһиилэнэн кэлэллэр. Ону оскуолаҕа баар элбэх кубоктар, грамоталар туоһулууллар. Биһиги оскуолабытыгар чопчу Валерий Ивановичка дьарыктанаары атын улуустан оҕолор кэлэн, баҕаран туран үөрэнэллэр.

Дуобаттыыр оҕо хайдах буоларый?
«Дуобатынан дьарыктаммыт оҕо уһуну-киэҥи толкуйдуурга үөрэнэр. Кэлэр кэнэҕэскитигэр, олох олороругар туһалыыр буоллаҕа. Дуобаттан бары үчүгэй дьоннор тахсаллар. Син биир тугу эрэ толкуйдуур, өйдөөх оҕолор буолаллар, дуобаты боростуой киһи сатаабат. Дуобатынан дьарыктаммыт оҕолор үөрэхтэригэр үчүгэйдик үөрэнэллэр. Билигин ыарахан-уустук бириэмэ дии. Онон бэйэлэрин баҕаларынан дьарыктаналлара, сайдаллара үчүгэй. Инниккитин үчүгэй, патриот дьон буолуохтарын наада» – диэн Валерий Иванович санаатын үллэстэр.

Баҕа санаа
Мин үөрэппит-ииппит оҕолорум бары үөрэхтээх, дьоллоох, ситиһиилээх дьон буолуохтарын баҕарабын.

Кэпсэттэ Яна ЕГОРОВА, 7-с кылаас, «Аартык» пост.

Амма-Наахара.