Аҕам саастаах тустууктар ким күүстээҕин быһаарыстылар

ХИФУ профессора, ССРС спордун маастара, Саха АССР үтүөлээх тренерэ Николай Кириллович Алексеев – Матбор кэриэһигэр көҥүл тустууга аҕам саастаахтар республикаҕа биирдиилээн бастыыр иһин чемпионаттарыгар быйыл отучча бөҕөс күүһүн холосто.

Күрэхтэһиини Дьокуускай куорат спортивнай тустууга федерацията (Р.М. Платонов), СР физическэй культураҕа уонна маассабай спорка управлениета (Р.И. Оконешников), В.П. Керемясов аатынан Дьокуускай куорат 3 №-дээх спортивнай оскуолата (дириэктэр В.В. Уйгуров) бэлэмнээн, тэрийэн ыыттылар.

Бөҕөстөр саастарынан араарыллыбыт 7 бөлөҕүнэн барыта алта ыйааһыҥҥа (62, 70, 78, 88, 100 уонна 100-тэн үөһэ кг) туһуннулар.

Чемпионат үөрүүлээх аһыллыытыгар Саха Республикатын физическэй культураҕа уонна спорка миниистирэ Леонид Спиридонов, СР физическэй культураҕа уонна маассабай спорка управлениетын начальнига Роман Оконешников, СР спортсменнарын сойууһун салайааччыта, спорт миниистиринэн үлэлии сылдьыбыт Виктор Ноговицын, Дьокуускай куорат спортивнай тустууга федерациятын салайааччыта Руслан Платонов кыттыыны ыллылар.

Леонид Спиридонов кыттааччылары эҕэрдэлээн туран, соторутааҕыта Дагестаҥҥа ыытыллыбыт Россия бэтэрээннэргэ чемпионатыгар ситиһиилээхтик кыттыбыт Прокопий Петровка уонна Вадим Даниловка өйдөбүнньүк бэлэхтэри туттарда.

Оттон Руслан Платонов «Тустуу сайдыытыгар көмөтүн иһин» диэн куорат федерациятын түөскэ анньыллар бэлиэтин уонна ону туоһулуур дастабырыанньаны – Леонид Спиридоновка, Андрей Каженкиҥҥа туттарда.

Дьэ, ол кэнниттэн көбүөргэ хапсыһыылар саҕаланнылар. Кыайыылаахтар ортолоругар Александр Птицын, Прокопий Петров, Михаил Тихонов, Василий Стручков, Вадим Данилов, Ефрем Ефремов, Василий Шепелев курдук, Россия уонна аан дойду таһымнаах күрэхтэһиилэргэ ситиһиилээхтик кыттан, төрөөбүт Сахаларын сирин дорҕоонноохтук ааттаппыт биллиилээх бөҕөстөр бааллар.

Күрэхтэһии күүрээнин биллиилээх спортивнай комментатор Александр Васильев – Көрдүгэн биллэрэн, кэпсээн-ипсээн күүһүрдэн биэрдэ. Оттон көбүөргэ хабыр хапсыһыылары СР үтүөлээх тренерэ, бэтэрээннэргэ аан дойду икки төгүллээх чемпиона Иннокентий Кочкин кылаабынай судьуйалаах коллегия сыысхала суох сууттаан ыыппытын бэлиэтиир оруннаах.

Кыайыылаахтар уонна иккис-үһүс миэстэлэри ылбыттар грамоталарынан, мэтээллэринэн уонна IRON (Макар Зырянов) спортивнай таҥас маҕаһыына олохтообут өйдөбүнньүк бириистэринэн наҕараадаланнылар.

PS: Биирдиилээн хапсыһыылар хайдах барбыттарын «Дьулурҕан» хаһыат ютуб каналыгар киирэн көрүөххүтүн сөп.

Петр ПАВЛОВ.

Ааптар хаартыскаҕа түһэриилэрэ.   

 

Добавить комментарий

Ваш адрес email не будет опубликован. Обязательные поля помечены *