Студеннар спорт сэттэ көрүҥэр күрэхтэһиэхтэрэ

Кулун тутар 28 күнүттэн республикабыт киин куоратыгар студеннар XI спортивнай оонньууларын күрэхтэһиилэрэ саҕаланар. Быйылгы тэрээһин Саха сиригэр физкультурнай хамсааһын 100 сылыгар ананар. Универсиада-2023 муус устар 1 күнүгэр диэри ыытыллар.

Бу күрэхтэһии туһунан dzulurgan.ru сайтка анаан М.К. Аммосов аатынан Хотугулуу Илиҥҥи федеральнай университет ыччаты эт-хаан өртүнэн иитиигэ уонна студеннар спортарын сайыннарыыга киинин салайааччыта, Саха сиринээҕи студеннар спортивнай союзтарын бэрэссэдээтэлэ Александр Черкашинтан, кылгастык билиһиннэрэригэр көрдөстүбүт.

-Быйылгы Универсиадаҕа үрдүкү уонна орто анал үөрэх кыһаларын күрэхтэһиилэригэр спорт кыһыҥҥы көрүҥнэрин киллэрбэтибит. Кыһыҥҥы туспа, сайыҥҥы туспа буолуохтаахтар диэн санааттан. Бу иннинээҕи Универсиада спорт сайыҥҥы уонна кыһыҥҥы көрүҥнэрэ бииргэ тутуллан ыытыллаллара. Ол курдук, быйылгы Универсиадаҕа спорт 7 көрүҥэ: волейбол, стритбол (баскетбол), чэпчэки атлетика, остуол тенниһэ, мини-футбол, ГТО многоборьета, көҥүл тустуу киирдэ. Ону тэҥэ бадминтон көрдөрүүлээх көрүҥ быһыытынан киллэриллэн биэрдэ.

Спорт кыһыҥҥы көрүҥнэригэр студеннар оонньууларын эһиил ыытар былааннаахпыт.

-Универсиадаҕа хас хамаандаттан төһө спортсмен кыттар буолла?

-Орто үөрэх кыһаларыгар барыта 9, оттон үрдүк үөрэх кыһаларыгар 5 хамаанда сүүмэрдэнэн кэллэ. Ол курдук, университет физическэй культураҕа уонна спорка института, ону таһынан Чурапчытааҕы институт, Агротехнологическай университет, АГИКИ уонна уу транспорын института, барыта биэс хамаанда күөн көрсөр. Мандатнай хамыыһыйа үлэтин түмүгүнэн быйылгы Универсиадаҕа барыта 722 кыттааччы күрэхтэһэр. Хамаанданан түмүк үрдүк уонна орто анал үөрэх кыһаларыгар тус-туспа таһаарыллар. Манна барыта тыһыынчаттан тахса студент күрэхтэһэр.

-Дьэ, маннык улахан таһымнаах күрэхтэһиини ханна тэрийэн ыытаҕыт?

-Көрүҥнэринэн күрэхтэһиилэр сүрүннээн университет базатыгар ыытыллаллар. ХИФУ, КФЕН, АГАТУ спорка саалаларыгар, «Юность», «Туймаада» стадионнар манежтарыгар буолаллар. Бу иннинэ маннык Универсиада 2019 сыллаахха буолбута.

Петр Павлов.