Павел Обутов – Россия волейболга чемпионатыгар сүрэхтэнэр

Биир дойдулаахпыт Павел Обутов Соҕуруу Сахалин “Элвари-Сахалин” волейболга кулуубун кытта дуогабар түһэрсэн, сахалартан спорт историятыгар волейболга Россия чемпионатыгар бастакы хараҥаччынан буолбутун урут хаста да иһитиннэрэн, суруйан турабыт.

Бу сайыны уонна күһүнү быһа Павел хамаандатын кытта бастаан Соҕуруу Сахалиҥҥа, онтон Москваҕа анал үөрэтэр-эрчийэр түмсүүгэ сылдьыста. Итиэннэ бэйэтин үчүгэй өттүттэн көрдөрөн, хамаанда сүрүн састаабыгар киирдэ. Онон уолбут Россия чемпионатыгар оонньуур быраабы ылла.

Сарсын, алтынньы 5 күнүгэр “Элвари-Сахалин” Россия волейболга чемпионатын, бэйэтин дьиэтигэр оонньуунан саҕалыаҕа. Санатан эттэххэ, ааспыт өрөбүл күннэртэн эр дьоҥҥо Россия волейболга хамаандатын үрдүкү “Б” лигатын чемпионата саҕаламмыта. Хамаандалар кыайыылааҕы иккилии оонньуу түмүгүнэн быһаарсаллар.

Быйылгы турнирга 12 хамаанда кыттар: «Кристалл-Черкизово» (Воронеж), «Элвари-Сахалин» (Соҕуруу Сахалин), «Динамо-МГТУ» (Майкоп), «Ростов-Волей» (Ростов), «Динамо» (Краснодар), «ИжГТУ-Динамо» (Ижевскэй), «Нефтяник-УОР» (Оренбург), «Грозный-2-ЧГПУ» (Грознай), «Дагестан» (Махачкала), «Волжанин» (Кострома), «Кама» (Пермьскэй кыраай), «Зорькай» (Красногорск).
Сэрэбиэй быһыытынан, «Элвари-Сахалин» алтынньы 5 уонна 6 күннэригэр бэйэтин оонньуур былаһааккатыгар «Нефтяник-УОР» (Оренбург) хамаанданы кытта киирсиэҕэ. Дьиэлээхтэргэ кыайыыны, биир дойдулаахпытыгар Павел Обутовка ситиһиилээх оонньууну баҕарыаҕыҥ!

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *