Амма оонньууларга бэлэмнэнэр

///Хаартысканан репортаж

Биллэрин курдук, от ыйын 3-7 күннэригэр Аммаҕа, Саха сирин норуоттарын VII спортивнай оонньуулара ыытыллар. Республика быйылгы сыллааҕы олоҕор биир бэлиэ түгэни ылар бу тэрээһин иннинэ, олохтоммут үгэс быһыытынан, оонньуу Пресс-киинин салайааччы Прокопий Бубякин, Амма улууһун Дьокуускай куоракка официальнай бэрэстэбиитэлэ Афанасий Матвеев уонна Амма улууһун дьаһалтатын пресс-сэкиритээрэ Мария Ким көҕүлээһиннэринэн – оонньуулар бэлэмнэниилэрин билсэр суруналыыстар Аммаҕа сырыылара тэрилиннэ.

Стадиоҥҥа

Суруналыыстар – Саха сирин норуоттарын VII спортивнай оонньууларын ыытыллар тутууларын кэрийэн көрдүлэр. Ол курдук, Амма сэлиэнньэтигэр киириигэ, суолтан уҥа өттүгэр саҥа стадион дьэндэйэн көстөрүгэр тиийдибит. Биһигини, Амма улууһун баһылыга Николай Архипов, баһылыгы тутууга солбуйааччы Дмитрий Иванов, оҕо спортивнай оскуолатын дириэктэрэ Ньургун Иванов уонна улуус дьаһалтатын исписэлиистэрэ, олохтоох суруналыыстар көрүстүлэр.

Тута чэпчэки атлетика манеһын уонна стадиону көрүү буолла. Манеж былырыын үлэҕэ киирэн, тигинэччи үлэлии турар эбит. Сыгынньахтанар хостор, дууш, туалет… барыта аныгы ирдэбилгэ эппиэттиир баараҕай тутуу эбит. Манна оҕолор спорт 11 көрүҥэр дьарыктаналлар. Дириэктэр Ньургун Валерьевич эппитинэн, быһа холуйан күҥҥэ 120-130 оҕо дьарыктанар, оттон киэһэтин эдэр ыччаттар уонна улахан дьон эттэрин-сииннэрин чэбдигирдэллэр. Дьарыктаныы – төлөбүрэ суох. Манежка да, стадиоҥҥа даҕаны бастакы бэрэбиэркэлиир күрэхтэһиилэр ыытыллыбыттар.

Манна сыһыары тутан эттэххэ, стадион үс тыһыынча олорор миэстэлээх. Оонньуу кэмигэр өссө балтараа тыһыынча олорор сири бэлэмниэхпит, диир улуус баһылыга. Стадион иһигэр билигин быстах үлэлэр ыытылла тураллар. Өссө стадиоҥҥа киириигэ плиткаларынан тротуар оҥоһулла турар. Итиэннэ, суол өрөмүөнэ ыытыллар…

Уопсайынан, Амма сиригэр-уотугар киириэхпититтэн, суол оҥоһуутугар элбэх техника, дьон үлэлии сылдьарын бэлиэтии көрүөххэ сөп. Барыта, оонньууларга бэлэмнэнии сүпсүлгэнэ. Биллэн турар, суруналыыстар бастатан туран, бэйэлэрин үлэлиир усулуобуйаларын туоһулаһан, сибээс, интернет туһунан ыйытыылары биэрдилэр уонна Николай Архиповичтан толору хоруйдары ыллылар. Кырдьык, баһылык иһитиннэрбитинэн, саамай кылаабынайа, суол-иис уонна сибээс өттүгэр улахан болҕомто ууруллубут. Оонньуулар ыытыллар сирдэригэр интернет номнуо киллэриллибит. Стадиоҥҥа киирбэккэ хаалбыт дьоҥҥо үөрүүлээх аһыллыыны уонна күрэхтэһиилэри сэлиэнньэ киинигэр улахан экраҥҥа быһа көрдөрөргө эмиэ былаанныыллар.

Биир тылынан, стадион уонна манеж – оонньуулары тэрийэн ыытыыга толору бэлэмнэр диэн бигэтик этиэххэ сөп.

Элбэх функциялаах спортивнай комплекс

Номох буолбут бөҕөс Николай Захаров – Сахаачча аатынан элбэх функциялаах спортивнай комплекска оонньуулар бырагыраамаларынан волейболга уонна буулдьанан ытыыга күрэхтэһиилэр былааннаналлар. Оттон пляж волейболун быласаакката – комплекс таһыгар таһырдьа оҥоһулла сылдьар.

Манна даҕатан эттэххэ, улуус баһылыга иһитиннэбитинэн, оонньууларга киллэриллибит көрүҥнэри таһынан өссө, оонньуулар кэмнэригэр бильярдка, мас тардыһыытыгар, хапсаҕайга, Аркадий Алексеев бирииһигэр копьены быраҕыыга күрэхтэһиилэр тэриллэллэр эбит.

Оонньуу Пресс-киинэ манна, иккис этээскэ, дуобат-саахымат көрүҥнэрин саалатыгар тэриллэрин, сырдыгын, киэҥин көрөн-истэн баран, Пресс-киин салайааччыта Прокопий Бубякин эппиэтинэстээх киһи быһыытынан:

-Үчүгэй! Суруналыыстар үлэлииллэригэр үчүгэй усулуобуйа олохтоммут, – диэн санаата көтөҕүлүннэ.

“Дружба” спортивнай комплекс

Салгыы бөлөх “Дружба” спортивнай комплекска тиийдэ. Киирбиппит, олорон эрэн волейболга эрчиллии буола турар эбит. Бу, Амма улууһун хамаандата үөрэтэр-эрчиллэр түмсүүтэ. Тренердэрэ этэринэн, састаап күүстээх, бу иннинээҕи күрэхтэһиилэргэ көрдөрүүтэ эриэ-дэхси буолан, бэйэлэрин дьиэлэригэр-уоттарыгар тэриллэр оонньууларга ситиһиилээхтик кыттарга суоттаналлар.

Бу, 2005 сыллаахха тутуллубут саала урукку кэмҥэ Аммаҕа эргэ стадиону кытта соҕотох спортивнай тутуу эбит. Туох баар улуустааҕы спорт тэрээһинэ манна ыытыллан кэлбит. Этэргэ дылы, улуус бастыҥ спортсменнара бары кэриэтэ бу саалаҕа эрчиллэн, күрэхтэһэн, буһан-хатан тахсыбыттар. Сэттис спортивнай оонньуулар кэмнэригэр манна остуол тенниһэ уонна мини-футбол күрэхтэһиилэрэ буолуохтара диэтилэр.

Суруналыыстар болҕомтолорун – саала ортотугар туруоруллубут оонньуу ымыылара (эмблемалара) тартылар. Ону спортивнай оскуола дириэктэрэ, бэйэтин кэмигэр Иван Ярыгин аатынан турнир кыайыылааҕа буола сылдьыбыт көҥүл тустууга норуоттар икки ардыларынааҕы кылаастаах спорт маастара Ньургун Иванов быһааран-кэпсээн биэрдэ.

-Бу Дьэдьэн, бу Таммах, ити Сэлиэһинэй, оттон бу Сардаана – бары, биһиэхэ өлгөм дьэдьэннээх, ыраас уулаах, сэлиэһинэй бурдуктаах, сардаана сибэккилээх төрөөбүт Аммабыт улууһун санаталлар, — диир, киэн тутта Ньургун Валерьевич.

Кырдьык, да оннук. Биһиги Амма диэтибит да, бастатан туран, ити үөһэ ахтыллыбыт ымыылары саныы түһэбит. Ити курдук, билиһиннэрии кэнниттэн, суруналыыстар ымыылары хайгыы көрөн, өйдүү-саныы сылдьар гына хаартыскаҕа түһэргэ үмүөрүстүлэр.

“Кыыс Амма” сквер

Амма улууһун Амма сэлиэнньэтин биир кэрэ-бэлиэ миэстэтэ. Этэргэ дылы, Аммаҕа тиийбит киһи, бу сквергэ сылдьыбакка эрэ ааһыа суохтаах. Бу бэйэтэ ытык сир. Хоһооҥҥо хоһуллубут, ырыаҕа ылламмыт аатырбыт Амма эбэни өҥөйө турар. Былырыын алдьархайдаах, алдьатыылаах халаан уута Аммаҕа халыйбытыгар, олохтоохтор этэллэринэн, бу “Кыыс Амма” сквер эрэ ууга ылларбатах, кураанах хаалбыт.

Манна эмиэ улахан үлэ ыытылла турар эбит. Биһигини үлэлиир бөлөх салайааччыта Саргылана Филиппова мичээрдии көрүстэ, туох үлэ ыытылла турарын билиһиннэрдэ. Дьону-сэргэни, ыалдьыттары – ырааска, кэрэҕэ, сырдыкка, олоххо, тапталга ыҥырар, угуйар сквер сотору кэминэн чыҥха атын буолуо, киэркэйиэ, сибэккинэн симэниэ, ону хайаан да кэлэн көрөөрүҥ дии хааллылар үлэһиттэр. Биһиги кинилэргэ эрэнэбит, уонна хайаан да кэлэн көрүөхпүт, урукку уонна билиҥҥи хаартыскаларбытын тэҥниэхпит.

Ити курдук, ханна да сырыттарбыт, биһигини эйэҕэстик көрүстүлэр. Амма оонньууларга бэлэмнэнэн, этэргэ дылы, ханна да тиий, үлэ күөстүү оргуйан олорор. Үлэ таҥастаах дьон тиэтэйэ-саарайа хаамаллара, транспордар сыбыытыыллара, көҕөрдүүгэ, ырааһырдыыга, кырааскалааһыҥҥа оҕолор, тэрилтэлэр субуотунньуктуу сылдьалларын хардыы аайы көрүөххэ сөп.

Петр ПАВЛОВ.

Ааптар хаартыскаҕа түһэриитэ.

PS: Бөтүҥҥэ, Чапчылҕаҥҥа, “Олимп” лааҕырга сырыыбыт, саҥа тутуулары көрүүбүт, үлэһиттэри кытта кэпсэтиибит туһунан dzulurgan.ru сайтка аныгыскы сырдатыыга ааҕаарыҥ.

Добавить комментарий

Ваш e-mail не будет опубликован. Обязательные поля помечены *