Владимир Егоровы Аммаҕа чиэстээтилэр

Амма улууһуттан төрүттээх Македония аатыттан кыттар көҥүл тустууга Европа чемпионатын боруонса призера Владимир Егоровы төрөөбүт дойдутугар Бөтүҥҥэ чиэстээтилэр. Бу кэрэ бэлиэ түгэҥҥэ Амма улууһун дьаһалтатын баһылыга Николай Архипов, улуус спорка общественноһа уонна биллэн турар, Бөтүҥ нэһилиэгин салалтата (баһылык Саргылана Борисова), нэһилиэнньэ көхтөөхтүк кытыннылар.

Кинилэр уолларын сыанаҕа таһааран тойон олбоххо олордон, бу ситиһиититтэн үөрэллэрин, астыналларын, киэн тутталларын биллэрдилэр. Элбэх эҕэрдэ тылларын эттилэр. Европа боруонса мэтээлиттэн кини санаата өссө күүһүрэн, спорт үрдүк дабааннарын эрэлээхтик дабайарыгар баҕардылар. Үөрүүлээх быһыыга-майгыга чиэстээтилэр, бочуоттаатылар. Ол курдук, бөтүҥнэр – Владимир Егоровка убаһа уонна дьиэ туттарыгар уһаайба анаатылар, доҕотторо саа ыллыҥ диэн харчынан көмөлөстүлэр, оттон Амма улууһун дьаһалтата “Нива” массыына ыларыгар туоһу сурук туттарда.

Санатан эттэххэ, муус устар 14-15 күннэригэр Румыния киин куоратыгар – Бухарестка ыытыллыбыт көҥүл тустууга Европа чемпионатыгар Владимир Егоров 57 киилэҕэ тустубута. Бастакы эргииргэ кини россиянин Муслим Садулаевка 2:5 ахсаанынан хотторон кэбиспитэ. Онтон салгыы эргиирдэргэ Садулаев утарсааччыларын кыайталаан финалга тахсыбыта, онон биһиги бөҕөспүт боруонса мэтээл иһин тустааччылар “уоскутар” диэн ааттыыр бөлөхтөрүгэр киирбитэ. Онно Владимир бастаан Леван Метревелины (Испания) ыраастык уонна үһүс бириистээх миэстэ иһин Андрей Дуковы (Румыния) 7:4 ахсаанынан кыайан, Европа чемпионатын боруонса мэтээлинэн наҕараадаламмыта.

Билэргит курдук, Владимир Егоров билигин Саха сирин үтүөлээх тренерэ, Сэбиэскэй Сойуус көҥүл тустууга маастара Николай Николаевич Рожин салалтатынан дьарыктанар. Сотору кэминэн бөҕөс уонна тренер үөрэтэр-эрчийэр түмсүүгэ бараллар уонна устунан Минскэйгэ ыытыллар Европа оонньууларыгар кыттар соруктаахтар. Кинилэргэ ситиһиилэри баҕарыаҕыҥ!

Петр ПАВЛОВ.            

Добавить комментарий

Ваш e-mail не будет опубликован. Обязательные поля помечены *