Спортсменнар ситиһиилэрэ дьоһуннук бэлиэтэннэ

Бүгүн, “Модун” спорт төрүт көрүҥнэрин сайыннарыы киинигэр бастыҥ көрдөрүүлээх спортсменнары чиэстээһин тэрилиннэ. Саха сирин Спорка уонна физическэй култуураҕа миниистирэ Иннокентий Григорьев, өрөспүүбүлүкэбит спортсменнара чугастааҕы кэмҥэ араас таһымнаах күрэхтэһиилэргэ ситиһиилээхтик кыттыбыттарын аҕынна.

Ол курдук, Владимир Егоров көҥүл тустууга Европа чемпионатын боруонса призерунан буолла. Кикбоксиҥҥа Россия чемпионатыгар Вадим Колтовскай кыһыл көмүс, Николай Винокуров, Петр Васильев, Айаал Местников боруонса мэтээллэри ылары ситистилэр. Спорт үтүөлээх маастара, охчут Степанида Артахинова Россия күрэхтэһиититтэн, Россия уонна Европа Кубогыттан барыта аҕыс мэтээли ылла. Ол иһигэр Европа кубогар үс кыһыл көмүс мэтээли. Кинини тэҥэ оҕунан ытыыга Виктор Скрыбыкин, Асим Павлов, Дайаана Винокурова, Юля Маркова – үрүҥ көмүс мэтээлинэн наҕараадаланнылар. Ити курдук, мас тардыһааччыларбыт Россия чемпионатыттан кыайыы көтөллөөх кэллилэр. Василий Андросов, Сергей Константинов, Дмитрий Попов, Наталья Черноградская, Екатерина Белолюбская – бастакы, Иннокентий Федоров, Денис Слепцов, Эрчим Баппаҕай, Дьулустаан Андреев, Саина Седалищева, Юлия Михайлова – иккис, Александр Пшенников, Борис Степанов, Данил Моисеев, Юрий Протопопов, Татьяна Дьячковская, Ирина Христофорова – үһүс миэстэлэргэ таҕыстылар. Өссө Сардаана Трофимова марафоҥҥа Россия чемпиона буолла.

Көрсүһүүгэ тустуук Владимир Егоров тус тренерэ, СӨ үтүөлээх тренерэ Николай Рожин: “Володя Европа чемпионатыгар үчүгэй бэлэмнээх, тустарга улахан санаалаах барбыта. Мин киниэхэ эрэммитим. Ону кини боруонса мэтээли ылан үөртэ. Владимир өссө да үүнэр-сайдар кыахтаах уонна кылаабынайа, тустарга улахан баҕалаах. Бу мэтээл – улахан ситиһиилэргэ бастакы хардыы. Сүрүн сорукпут – аан дойду чемпионатыгар ситиһиилээхтик кыттан, олимпийскай путевка ылыы. Түгэнинэн туһанан, биһигини өрүү өйүү, күүс-көмө буола сылдьар Р.М. Дмитриев аатынан Олимпийскай эрэл училищетын дириэктэрэ, Ил Түмэн депутата Алексей Алексеевич Филипповка улаханнык махтанабыт!”, — диэтэ.

Оттон олимпийскай чемпион, Ил Түмэн депутата Павел Пинигин, Владимир Егоров Европа чемпионатыгар үһүс миэстэҕэ тахсан, санаата өссө күүһүрэн, ситэн-хотон, инники күрэхтэһиилэргэ ситиһиилээхтик кыттарыгар баҕарда. Итиэннэ көрсүһүүгэ кэлэн олорор Өрөспүүбүлүкэ сүүмэрдэммит хамаандаларын бэлэмниир спортивнай киин (ЦСП) дириэктэрин эбээһинэһин толорооччу Леонид Спиридонов уонна кини бастакы солбуйааччыта Михаил Пахомов – саха спортсменнара инникитин да ситиһиилээхтик кытталларыгар сөптөөх үлэни ыыталларыгар эрэнэрин биллэрдэ.

Бу көрсүһүүгэ, 2021 сылга Дьокуускайга Россия кикбоксиҥҥа чемпионата ыытылларын туһунан эмиэ ахтылынна. Бу улахан таһымнаах күрэхтэһии Александр Иванов аан дойду чемпиона буолбута 30 сылыгар ананан ыытыллара этилиннэ. Биллэрин курдук, Россия кикбоксиҥҥа чемпионатын кыайыылаахтара ити сыл Москваҕа буолар аан дойду чемпионатыгар сүүмэрдэниэхтэрэ. Өрөспүүбүлүкэ кикбоксиҥҥа хамаандатын кылаабынай тренерэ Андрей Алексеев бэйэтин этиитигэр, маннык чиэстээһин тэриллибитигэр махтанан туран, Россия чемпионата Саха сиригэр ыытылларынан улахан эппиэтинэс уонна күүстээх үлэ күүтүллэрин эттэ.

Спорт миниистирэ Иннокентий Григорьев – үөһэ ааттаммыт ситиһиилээх спортсменнарга уонна кинилэр тренердэригэр махтал суруктары туттартаата. Кикбоксинг федерациятын вице-президенэ, биллиилээх боксер Александр Михайлов, Россия чемпионатыттан кыайан-хотон кэлбит спортсменнарга харчынан бириэмийэлэнэллэрин туһунан туоһу суруктары  туттарда. Ол курдук, чемпион Вадим Колтовскайга 100, үһүс миэстэлээх Николай Винокуровка, Петр Васильевка, Айаал Местниковка 50-нии, тренер Андрей Алексеевка 80 тыһ. солк. бириэмийэ бэриллэрин биллэрдэ.

Оттон Павел Пинигин СӨ спортивнай тустууга федерациятын аатыттан Владимир Егоровка 125, кини тус тренерэ Николай Николаевич Рожиҥҥа 31 тыһыынча солкуобайдаах сертификаттары туттарда.

Ити курдук, Р.М. Дмитриев аатынан Олимпийскай эрэл училищетын дириэктэрэ Алексей Филиппов – тустуук Владимир Егоровка уонна охчут Дайаана Винокуроваҕа харчынан сертификаттары туттарда.

Дьэ, онон, саха спортсменнарын ситиһиилэрэ – дьоһуннук бэлиэтэннэ. Биллэн турар, маннык тэрээһин спортсменнары уонна тренердэри өссө дьаныһан туран дьарыктанан, саха спордун былааҕын өрүү өрө тута сылдьалларыгар, оттон атыттары, маннык чиэстээһиҥҥэ-бочуоттааһыҥҥа көҕүлүүр сыаллаах-соруктаах диэххэ сөп.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш e-mail не будет опубликован. Обязательные поля помечены *