Волейболга тандалар инники күөҥҥэ!

Бу дьыл тохсунньу 20-22 күннэригэр Чурапчы улууһун Хадаар нэһилиэгэр улахан күрэхтэһиилэргэ толору эппиэттиир, нэһилиэк саҥа улахан заалыгар, Саха сирин 700-н кыра ахсааннаах нэһилиэктэрин икки ардыларыгар волейболга IX республикатааҕы күрэхтэһии ыытыллан түмүктэннэ.

Эр дьоҥҥо 13, кыргыттарга 6 хамаанда күөн көрүстэ. Биһиги улууспутуттан Байаҕантай нэһилиэгин кыргыттарга уонна уолаттарга толору хамаандата кыттыыны ылла. Түмүккэ кыыска да, уолга даҕаны бастакы миэстэни ылан, Муҥутуур кыайыылаах аатын ыллыбыт. Күрэхтэһии быраабылатынан, нэһилиэккэ постояннай пропискалаах, тустаах нэһилиэккэ төрөөбүт, онно оскуоланы бүтэрбит, дьарыктаммыт волейбол оонньуутун сөбүлээччилэр кыттыыны ыллыллар. Санатан эттэххэ, хамсык ыарыы иннинэ Үөһээ Бүлүүгэ маннык күрэхтэһиигэ эмиэ тандалар кыргыттарга бастаан, уолаттарга иккис буоланнар, уопсай түмүккэ бастаан турабыт.

Күрэхтэһии түмүгэ

Уолаттарга: 1 миэстэ – Танда, 2 миэстэ – Бэдьимэ, 3 миэстэ – Сулҕаччы (Амма).

Кыргыттарга: 1 миэстэ – Танда, 2 миэстэ – Алтан (Амма), 3 миэстэ – Бэдьимэ.

Кыайыылаах хамаандалар састааптара

Уолаттарга: Готовцев Алексей – капитан, Неустроев Коля, Петухов Андрей, Семён Атласов, Саша Колодезников, Ньургун Колодезников, Артем Сивцев, Степан Прядезников, Алексей Никифоров.

Кыргыттарга: Аня Аммосова, Уруйдаана Аммосова, Ника Аммосова, Мичийэ Калининская, Марина Заболоцкая, Виргиния Евдокимова, Аня Готовцева.

Күрэхтэһии бастыҥ оонньооччуларынан буоллулар: кыргыттарга Аня Готовцева, уолаттарга Степан Прядезников (“Бастыҥ оонньооччулар”), Аня Аммосова (“Бастыҥ сибээстээччи”), Алеша Готовцев (“Бастыҥ капитан”), Николай Неустроев. Кинилэр анал бириистэри туттулар, бары тандалар.

Түгэнинэн туһанан, кэлиигэ-барыыга көмөлөспүт нэһилиэкпит баһылыгар, улуус волейболга федерациятын председателигэр, биир дойдулаахпыт Иннокентий Иннокентьевич Аммосовка улахан махталбытын биллэрэбит.

Максим АММОСОВ, кыайыылаах хамаандалар тренердэрэ.

Уус Алдан.