Виктор Алексеев: “Тустууну таптааҥ, тустуу туһугар ыалдьыҥ”

Красноярскайга, Иван Ярыгин кубогар, уруккутун курдук наһаа элбэх да буолбатар, тустууну таптааччылар кэлэн көрдүлэр-иһиттилэр. Тустуу биир бэриниилээх ыалдьааччыта, спорт күрэхтэһиилэрин көтүппэккэ кере сатыыр саастаах киһини эрдэттэн бэлиэтии көрөммүн, күрэхтэһии туһунан санаатын үллэстэригэр көрдөстүм.

-Алексеев Виктор Дмитриевич диэммин. Бэйэм Сунтаар улууһун Бүлүүчээн нэһилиэгэр олоробун. Билигин 83 саастаахпын. Спорка оҕо эрдэхпиттэн сыстаҕаспын. Тренердэргэ көмөлөһөн оҕолору тустууга эрчийэ сылдьыбытым, общественнай тренер быһыытынан, төлөбүрэ суох. Бэйэм оробуочайбын.

-Дьэ, Красноярскайга кэлэн, күрэхтэһии хайдах эбитий?

-Тэрээһин аьара үчүгэй эбит. Бу, Ярыгин тустуутугар иккис сырыым. Бу иннинэ 2006 сыллаахха кэлэ сылдьыбытым. Саха сиригэр ыытыллар тустууну көрө сатыыбын. Красноярскайдааҕы күрэхтэһии, бэйэтин тэрээһининэн син биир аан дойду күрэхтэһиитин курдук. Улахан таһымнаах. Уонна ити аатырбыт бөҕөстөр тустууларын киһи көрдөҕүнэ санаата көтөҕүллэр, астынар. Холобура, Заурбек Сидаков, Заур Угуев, Евгений Жербаев… Үчүгэй тустууну көрөн наһаа үөрдүм. Итинник тустууну көрөн киһи дуоһуйууну ылар, күүһүгэр күүс эбиллэр. Саха тустууктара кинилэр курдук буолуохтарын олуһун баҕарабын.

Манна кэлэн Саха сирин тустууга ыалдьааччыларын кытта көрүстүм. Бары аһара ыалдьабыт. Түмсүүлээхпит. Бары бииргэ буоллуохха наада. Сүбэлэһэн. Уонна киһи быһыытынан, киһи киһилии сылдьыахтаах. Барытын тулуйан, көрөн-истэн. Саха дьонун тустууну таптаан, тустуу туһугар ыалдьыҥ диэн баҕарабын.

-Уолаттарбыт тустууларын туох дии санаатыҥ?

-Ээ, бэйэм уолаттарбын улаханнык туох да диэбэппин. Сэмэлээбэппин. Баардарынан, кыахтарынан туһуннулар. Күрэхтэһиигэ сүрдээх күүстээх тустууктар кэлбиттэр. Кыра сабырыттарыы баар уонна дьиҥинэн улахан тустууга киһи ыгылыйар эбит. Ону тулуйар киһи тулуйар буоллаҕа. Уолаттарбыт бэйэлэрин кыахтарынан туста сатаатылар.

Сэһэргэстэ Петр ПАВЛОВ.