Уолаттарбыт Беларусь чемпионнара

Минскэй уобалас Молодечно куоратыгар Беларусь Республикатын көҥүл тустууга 2023 сылга чемпионата ыытыллан түмүктэннэ. Манна саха тустууга кыһатын иитиллээччилэрэ ситиһиилээхтик кытыннылар.

Аан дойду чемпионатын боруонса призёра, норуоттар икки ардыларынааҕы кылаастаах спорт маастара Арыйаан Тютрин бу сырыыга бэйэтин ыйааһыныгар (57 кг) тустан тэҥнээҕин булбата. (Былырыын 61 кг кыттан, А.Бекренев кэнниттэн иккистээбитин санатабын). Кини барыллааһын хапсыһыыларга икки утарсааччытын очконан ыраастык кыайан баран, быһаарыылаах хапсыһыыга Димчик Батомункуевы-Ринчиновы 5:5 ахсааҥҥа хаачыстыбанан хотто. Манна, Арыйаан бастакы түһүмэххэ утарсааччытын 4 баалга быраҕан түһэрбитэ быһаарыылаах буолла.

Европа чемпионатын үрүҥ көмүс призера, норуоттар икки ардыларынааҕы кылаастаах спорт маастара Ньургун Скрябин (65 кг) үчүгэй тустууну көрдөрдө. Кини эмиэ барыллааһын хапсыһыыларга утарсааччыларын илиилээх-атахтаах оҥорбото. Финалга Дагестантан төрүттээх Ислам Гусейновы, тустар маастарыстыбата уонна опыта үрдүгүнэн баһыйа тутан 8:6 ахсаанынан кыайда.

Үһүс бөҕөспүт – Поддубнай лигатын призёра, норуоттар икки ардыларынааҕы кылаастаах спорт маастара Андрей Бекренев (61 кг) эмиэ утарсааччыларын тулуппата. Тустар таһыма үрдүгэ харахха лаппа быраҕыллар. Молодечно көбүөрүгэр тустууктарбыт үһүөн үстүүтэ тустан – кыайыы көтөллөннүлэр!

Өссө гректии-римнии тустууга Амма ыччата спорт маастара Александр Гурьев 55 киилэҕэ чемпион бочуоттаах аатын ылла.

Онон, Арыйаан Тютрин 2, Андрей Бекренев 3, Ньургун Скрябин 4 төгүллээх, Беларусь көҥүл тустууга чемпионнарынан буоллулар. Уолаттарбытын уонна кинилэр тренердэрин бу ситиһиилэринэн эҕэрдэлиибит! Саҥаттан саҥа ситиһиилэри баҕарабыт!

PS: Уолаттарбыт тустууларын видеотын «Дьулурҕан» хаһыат ютуб каналыгар көрүөххүтүн сөп.

Петр ПАВЛОВ.