Универсиада тустуутугар биһигиттэн кимнээх кыттыахтарай?

От ыйын 15-19 күннэригэр Чечня Республикатын киинигэр – Грознайга, Бүтүн Россиятааҕы VIII сайыҥҥы студеннар спортивнай оонньууларын чэрчитинэн көҥүл тустууга күрэхтэһии ыытыллар. Бу күрэхтэһиигэ М.К. Аммосов аатынан Хотугулуу Илиҥҥи федеральнай университет хамаандата кыттыаҕа.

Ол курдук, састаапка киирдилэр: Петр Копылов (57 кг), Александр Авелов (61 кг), Алексей Данилов (65 кг), Айсен Потапов (70 кг), Егор Захаров (74 кг), Денис Максимов (79 кг), Дьулустан Калачев (86 кг), Алексей Ефимов (92 кг), Никита Софронов (97 кг), Никита Хабаров (125 кг).

Хамаанданы тренердэр: Будимир Яковлев уонна Егор Старостин салайан илдьэ барыахтара.

Санатан эттэххэ, аҕыйах хонуктааҕыта Бороҕоҥҥо ыытыллан түмүктэммит Саха сирин норуоттарын VIII спортивнай оонньууларыгар бу састааптан Петр Копылов бастаабыта, Айсен Потапов иккис, Александр Авелов уонна Егор Захаров, Денис Максимов, Никита Софронов бэйэлэрин ыйааһыннарыгар бэһис миэстэлэммиттэрэ.

Программа быһыытынан, бастаан күрэхтэһиини 16-с чыыһылаҕа – 57, 61, 65, 70, 125 кг ыйааһыннаахтар саҕалыыллар. Сарсыныгар киэһэ бу ыйааһыннар – финалыыллар. Оттон хаалбыт ыйааһыннарга быһаарыылаах хапсыһыылар от ыйын 18 күнүгэр буолуохтара. Уолаттарбытыгар ситиһиини баҕарыахха!

«Дьулурҕан».

 

Добавить комментарий

Ваш адрес email не будет опубликован.