Тарскай чемпионата: Саҥа тутуу күрэхтэһиинэн сүрэхтэннэ!

Н.Н. Тарскай кэриэһигэр көҥүл тустууга Саха Республикатын үрдүнэн биирдиилээн уонна хамаанданан бастыыр иһин чемпионат үөрүүлээх аһыллыытыгар Мэҥэ Хаҥалас улууһун баһылыга Н.П. Старостин, СР физическэй культураҕа уонна спорка министрэ И.Ю. Григорьев, СР спортивнай тустууга федерациятын вице-президенэ, Ил Түмэн депутата, олимпийскай чемпион П.П. Пинигин, Олимпиада-76 үрүҥ көмүс призера, спорт үтүөлээх маастара А.Н. Иванов, СР физическэй культураҕа уонна спорка министрин бастакы солбуйааччы Л.Н. Спиридонов, Россия спортивнай тустууга федерациятын эппиэттээх үлэһитэ, Ил Түмэн депутата, спорт үтүөлээх маастра П.П. Юмшанов, Үтүө Дьулуур оонньууларын кыайыылааҕа, спорт үтүөлээх маастара В.Н. Гоголев кыттыыны ыллылар.

Бу чемпионат өссө былырыын, Аллараа Бэстээххэ саҥа аһыллыбыт спортивнай комплекска буолуохтаах этэ. Ону улуус салалтата салгыы туруорсан, бу быйыл бэлэмнээн, тэрийэн ыытарга көҥүл ылбыта кэрэхсэбиллээх.

Мэҥэ Хаҥалас баһылыга Н.П. Старостин бэйэтин эҕэрдэтигэр, Н.Н. Тарскай чемпионата үүммүт саҥа сылга республикаҕа бастакы улахан күрэхтэһии буоларын ыйда. Итиэннэ бу түгэн историяҕа киирэрин этэн туран: “Бу спортивнай комплекска биһиги биир дойдулаахпыт, сахалартан бастакы олимпийскай чемпион, баарыстаах спорка ССРС сүүмэрдэммит хамаандатын чилиэнэ Тимир Алексеевич Пинегин иҥэрдибит. Итиэннэ “Парус” диэн ааты биэрдибит. Тустууну суохтаатыбыт. Барыгытын спорт бырааһынньыгынан эҕэрдэлиибин!” – диэтэ.

Кырдьык да, саҥа спортивнай тутуу улахан күрэхтэһиинэн сүрэхтэммитэ кэрэхсэбиллээх.

Спорт министрэ И.Ю. Григорьев, чемпионат аһыллыбытынан эҕэрдэлээн туран, наҕараадалары туттарда. Ол курдук, “Парус” спортивнай комплекс дириэктэрэ Алексей Варламовка – “Саха республикатын физическэй культураҕа уонна спорка туйгуна” бэлиэни, Дьокуускай куорат 3 №-дээх спортивнай оскуолатын тренерэ Вячеслав Кривошапкиҥҥа – Бүтүн Россиятааҕы судьуйа бэлиэтин туттарда.

Чемпионаты үөрүүлээх аһыыга уонна иккис күн финал иннинээҕи эҕэрдэлэргэ көҥүл тустууга Россия спордун маастардара бэлиэлэр уонна дастабырыанньалар Эльшад Агаевка, Андрей Ароновка, Артур Константиновка, Зафарбек Одинаевка, Иван Оконешниковка, Станислав Свинобоевка, Алексей Некрасовка, Александр Филипповка, Вячеслав Стрекаловскайга, Петр Константиновка, Дьулустан Булатовка, Алексей Захаровка, Айтал Захаровка, Алина Казымоваҕа, Быйаман Яковлевка, Любомир Ашеиҥҥа, Харысхан Николаевка туттарылыннылар.

Олимпийскай чемпион Павел Пинигин, 1960 сыллааҕы Римнээҕи Олимпиада баарыстаах спорка чемпиона Тимир Алексеевич Пинегин сырдык аата үйэтитиллибитигэр махталын биллэрдэ.

Ити курдук, Россия спортивнай тустууга федерациятын көҥүл тустууга штабын начальнига Петр Петрович Юмшанов – саха тустуута салгыы сайдарын туһугар тустуу көбүөрдэрин Дьокуускай куорат 25 №-дээх оскуолатыгар, Нам 1 №-дээх оскуолатыгар, Нам ДЮСШ-гар, Амма, Уус Алдан, Хаҥалас, Ньурба, Үөһээ Бүлүү улуустарыгар үөрдэ-көтүтэ туттарда.

Ити курдук, үбүлүөйдээх чемпионат сүрүн көстүүтүн – көбүөргэ хапсыһыылары тэҥэ, атын үөрүүлээх түгэннэри эмиэ сырдатан, дьоҥҥо-сэргэҕэ биллэрэри наадалааҕынан ааҕабын.

Петр ПАВЛОВ.

Добавить комментарий

Ваш адрес email не будет опубликован.