Тарскай чемпионата: Хамаанданан кимнээх бастыахтарай?

Тохсунньу 8-9 күннэригэр Аллараа Бэстээххэ (Мэҥэ Хаҥалас) саҥа тутуллан үлэҕэ киллэриллибит, олимпийскай чемпион Тимир Пинегин аатынан «Парус» спортивнай комплекска, Николай Николаевич Тарскай кэриэһигэр көҥүл тустууга 2022 сыл Саха Республикатын биирдиилээн уонна хамаанданан бастыыр иһин чемпионата ыытыллар.

Чемпионат эр дьоҥҥо уон ыйааһыҥҥа – 57, 61, 65, 70, 74, 79, 86, 92, 97, 125 кг буолар. Бу күрэхтэһиигэ республика улуустара уонна куораттара бары кыттарга дьулуһаллар. Тоҕо диэтэргит, чуолаан, бу чемпионат түмүгүнэн аны сайын Бороҕоҥҥо ыытыллар Саха сирин норуоттарын VIII спортивнай оонньууларыгар бастыҥнар сүүмэрдэниэхтэрэ. Ол курдук, ыйааһын ахсын 8-тыы күүстээхтэр ахсааннарыгар киирбиттэр – Бороҕоҥҥо кыттар быраабы ылыахтара. Санатан эттэххэ, бу чемпионаты тэҥэ көҥүл тустууга оонньууларга сүүмэрдиир икки күрэхтэһии тэриллиэҕэ. Онно 4-түү бастыҥ көрдөрүүлээхтэр талыллыахтара. Сүүмэрдиир күрэхтэһиилэр саас Горнайга уонна Дьокуускайга ыытыллаллара былааннанар.

Чемпионат кылаабынай судьуйатынан – норуоттар икки ардыларынааҕы категориялаах судьуйа Николай Николаев ананна.

Барыллааһын сайаапка быһыытынан бүгүҥҥү туругунан чемпионакка Виктор Рассадин, Петр Константинов, Дьулус Федотов, Эдуард Григорьев, Уйгулан Иванов, бырааттыы Петр, Алексей Копыловтар, Станислав Свинобоев, Дмитрий Аксенов, Константин Власов, Ньургун Сергин уо.д.а. күүстээх тустууктар күөн көрсөллөрө күүтүллэр. Оттон Арыйаан Тютрин, Андрей Бекренев, Ньургун Скрябин бу күннэргэ Беларусь Республикатын чемпионатыгар кытталларын санатар тоҕоостоох.

Аллараа Бэстээхтээҕи чемпионат биир сүрүн соругунан, бастыҥнар республика сүүмэрдэммит хамаандатын састаабыгар киирэн, үөрэтэр-эрчийэр түмсүүлэргэ, Бүтүн Россиятааҕы уонна норуоттар икки ардыларынааҕы турнирдарга кыттыахтара. Онон чемпионат ураты тыҥааһыннаах буолара күүтүллэр.

Кырдьык, тустууну таптааччылар күрэхтэһиини уу харахтарынан көрбөтөхтөрө ыраатта. Маныаха, билиҥҥи балаһыанньаҕа олоҕуран, чемпионат 50 % көрөөччүлээх буолара быһаарылынна. Хапсыһыылары «Саха» көрдөрөр-иһитиннэрэр хампаанньа телевизорынан быһа көрдөрүөҕэ.

Бу иннинээҕи, 2019 сыллаахха ыытыллыбыт Н.Н. Тарскай чемпионатын кыайыылаахтара: 57 кг – Федор Постников (Чурапчы), 61 кг – Семен Владимиров (Таатта), 65 кг – Петр Павлов (Уус Алдан), 70 кг – Айсен Потапов (Дьааҥы), 74 кг – Константин Власов (Мэҥэ Хаҥалас), 79 кг – Герман Устинов (Амма), 86 кг – Игорь Софронеев (Нам), 92 кг – Василий Винокуров (Нам), 97 кг – Ньургун Сергин (Сунтаар), 125 кг – Сергей Семенов (Нам). Хамаанданан түмүккэ Чурапчы бастакы, Дьокуускай иккис, Уус Алдан үһүс миэстэлэри ылбыттара. Бу сырыыга дьэ хайдах буолар?

Петр ПАВЛОВ.   

2 thoughts on “Тарскай чемпионата: Хамаанданан кимнээх бастыахтарай?

  • 5 января, 2022 в 11:08 дп
    Permalink

    Уус-Алданнар тустууга отбору ааьаллар ду на правах хозяев отбортан босхолоноллор ду?

    Ответ
    • 6 января, 2022 в 2:43 дп
      Permalink

      Син биир атыттар курдук сүүмэрдээһини ааһаллар. Быһа киирбэттэр.

      Ответ

Добавить комментарий

Ваш адрес email не будет опубликован.