Тарскай чемпионата: Бастыҥ бөҕөһүнэн кими ааттыыгын?

Тохсунньу 8-9 күннэригэр Аллараа Бэстээххэ (Мэҥэ Хаҥалас) Николай Николаевич Тарскай кэриэһигэр көҥүл тустууга Саха сирин биирдиилээн уонна хамаанданан бастыыр иһин юбилейдаах 65-с чемпионата ыытыллан түмүктэннэ.

Кырдьык даҕаны бэртээхэй күрэхтэһиини көрдүбүт. Эдэрдэр соһуччу үөртүлэр. Тустууну таптааччылар сэргэхсийдибит. Тустууну суохтаабыт, ахтыбыт эбиппит.

Эрэннэрбитим курдук, чемпионат тула санаабын салгыы суруйабын. Бу сырыыга, уруккуттан этэр санаабын өссө төгүл хатылыыбын. Урут, сэбиэскэй саҕана тустууга кыра да, улахан даҕаны таһымнаах күрэхтэһиилэргэ оҕолорго буоллун, эр дьоҥҥо буоллун, бастыҥ бөҕөстөргө анал бириистэр оонньоноллоро. Бу маннык дьаһал, бөҕөстөрү инники сайдыыларыгар күөттүүрэ, санааларын көтөҕөрө уонна оттон, материальнай өттүнэн даҕаны күүс-көмө, өйөбүл буолара саарбахтаммат. Онон ону сөргүтэргэ баҕарабын.

Н.Н. Тарскай аатынан көҥүл тустууга баар-суох улахан официальнай чемпионаппытыгар анал бириистэри олохтуохха диэн. Холобур, “Чемпионат бастыҥ бөҕөһө”, “Бастыҥ техникатын иһин”, “Эдэр кэскиллээх бөҕөс” о.д.а. анал бириистэри. Биир бэйэм итинник бириистэргэ туһааннаан Виктор Рассадины, Эдуард Григорьевы, Лев Павловы ааттыам этэ. Оттон эһиги?

Бириистэри СР физическэй культураҕа уонна спорка министерствота, СР ыччат дьыалатыгар министерствота уонна СР спортивнай тустууга федерацията туруоруохтарын сөп. Уонна ол олоххо киирэр түгэнигэр, үгэс быһыытынан сылын аайы туттарыллыахтаах, Н.Н. Тарскай чемпионатыгар. Ону эһиги туох дии саныыгыт? Сөптөөх санаа дуу, сыыһа дуу?

Быйылгы чемпионакка, сахалартан уолаттарга бастакынан Советскай Союз чемпионун аатын ылбыт номоххо киирбит биллиилээх бөҕөс Вячеслав Павлович Карпов кэриэһигэр анал бирииһи кини уола Павел Вячеславович тус бэйэтин баҕатынан 65 киилэҕэ олохтообута кэрэхсэниэн эрэ сөптөөх. Онуоха чемпионунан уонна харчынан бириис хаһаайынынан Эдуард Григорьев (Чурапчы) буолла (хаартыскаҕа).

Онон, буолан ааспыт күрэхтэһии түмүгүнэн тустууну таптааччыларга туһаайдахха, “чемпионат бастыҥ бөҕөһүнэн кими ааттыаҥ этэй?” диэн ыйытыкка кими этиэххит этэй?  

Петр Павлов.

Добавить комментарий

Ваш адрес email не будет опубликован.