Тарскай-2023: Вячеслав Карпов аатынан бириис кимиэхэ тиксиэй?

Спорт туонатынан биллибит, олимпиецтар уйалара – Тоҕус томтордоох Чурапчыга көҥүл тустууга Н.Н. Тарскай аатынан республика чемпионата үгэннээн ыытылла турар. Күрэхтэһии түмүгүнэн уон ыйааһыҥҥа кыайыылаахтар уонна хамаанданан бастыҥнар биллиэхтэрэ. Кинилэргэ мэтээллэр, дипломнар уонна кубоктар туттарыллыахтара.

Ону тэҥэ иккис сылын – сахалартан көҥүл тустууга уолаттарга Советскай Союз бастакы чемпиона, тустууга ССРС, хапсаҕайга Саха АССР спортарын маастара, дуобакка спорт маастарыгар кандидат, Д.П. Коркин аатынан Саха Республикатын физическэй культураҕа уонна спорка бириэмийэтин лауреата, Чурапчы улууһун бочуоттаах гражданина Вячеслав Павлович Карпов аатынан, кини дьиэ кэргэнэ олохтообут анал бирииһэ оонньонуоҕа. Бириис, балаһыанньа быһыытынан иккис олимпийскай ыйааһыҥҥа – ол аата, 65 киилэҕэ бастаабыт бөҕөскө туттарыллыа.

Бу ыйааһыҥҥа Европа чемпионатын призердара, республика чемпионнара Эдуард Григорьев (Чурапчы), Николай Охлопков (Сунтаар), Саха сирин норуоттарын спортивнай оонньууларын кыайыылааҕа Георгий Кычкин (Амма), республика чемпиона Петр Константинов (Дьокуускай), Р.М. Дмитриев турнирын кыайыылааҕа Александр Иванов (Уус Алдан) курдук күүстээх тустууктар Чурапчы көбүөрүгэр күөн көрсө сылдьаллар.

Былырыын маннык бириис хаһаайынынан 65 кг чемпиона Эдуард Григорьев (Чурапчы) буолбута. Быйыл В.П. Карпов аатынан анал бириис: кубок уонна 30 тыһ. солк. харчынан бириэмийэ кимиэхэ тиксиэй?     

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *