Тарскай-2023: Ким түмсүүлээх, тэрээһиннээх – ол кыайда!

Үүммүт 2023 сыл – Саха сиригэр физическэй культура тэриллибитэ 100 сыла. Дьэ, бу үбүлүөйү көрсө саҥа саҕаламмыт сылга бастакынан, тохсунньу 6-7 күннэригэр Чурапчыга – көҥүл тустууга Н.Н. Тарскай кэриэһигэр бүтүн Саха сирин үрдүнэн биирдиилээн уонна хамаанданан бастыыр иһин чемпионат ыытыллан түмүктэннэ.

Күрэхтэһии – олимпиецтары иитэн таһаарбыт, спорт туонатынан биллибит, Тоҕус томтордоох Чурапчыга ыытыллыбыта бэйэтэ умнуллубат кэрэ бэлиэ түгэн. Чемпионат, биһиги улуу тренербит Дмитрий Петрович Коркин төрөөбүтэ 95 сылыгар ананан ыытылынна.

Көбүөргэ 23 хамаандаттан барыта 177 бөҕөс тахсан күөн көрүстэ. Кинилэр ортолоругар норуоттар икки ардыларынааҕы кылаастаах 3 спорт маастара уонна 37 Россия спордун маастара кыттан, түһүлгэни киэргэттэ. Мэҥэ Хаҥалас, Сунтаар, Уус Алдан уонна Чурапчы улуустара толору састааптаах хамаанданы аҕалбыттар. Онон бу сырыыга бириистээх миэстэ иһин сүрүннээн кинилэр киирсэллэрэ буолуо диэн сабаҕалааһын үөскээбитэ.

Оннук да буолла. Эрдэттэн бэлэмнэммит, бэйэ дьиэтигэр-уотугар ыытыллар улахан тэрээһиҥҥэ үчүгэйдик кыттарга суоттанан анал үөрэтэр-эрчийэр түмсүүнү тэрийбит, күүстээх састаабы түмпүт Чурапчы хамаандата ситиһиилээхтик кытынна. Ол курдук, көбүөр хаһаайыттара биэс чемпионнаннылар: Дьулус Федотов, Эдуард Григорьев, Олег Фомин, Константин Капрынов, Никита Софронов. Ону тэҥэ үс бөҕөс бириистээх миэстэҕэ таҕыста. Манна даҕатан эттэххэ, 65 киилэ чемпиона Эдуард Григорьев – иккис сылын, сахалартан уолаттарга бастакынан ССРС чемпиона буолбут Вячеслав Карпов аатынан анал бириис хаһаайынынан буолла.

Дьэ, ити курдук, икки күннээх тыҥааһыннаах хапсыһыылар түмүктэригэр бастакы миэстэни дьиэлээхтэр, көбүөр хаһаайыттара – чурапчылар (сүрүн тренер А.Макаров) ыланнар, үөрүүлэрэ үксээтэ. Иккис миэстэни былырыын бастаабыт Мэҥэ Хаҥалас хамаандата (эппиэттээх тренер А.Птицын) ылла. Үһүс бириистээх миэстэҕэ Сунтаар хамаандата (тренер Н.Данилов) таҕыста. Манна, ким түмсүүлээх, тэрээһиннээх – ол ситиһиилэммитин ыйар тоҕоостоох. Тоҕо диэтэргит, кэккэ улуустар бу чемпионакка суолта биэрбэккэ, этэргэ дылы, “сыһыыттан хомуллан кэлэн кытыннылар” диэххэ сөп.

Тустуу куттаах чурапчылар хаһан баҕарар буоларыныы, түһүлгэни кыайа тутан, үчүгэйдик бэлэмнээн уонна тэрийэн ыыппыттарын бэлиэтиир оруннаах. Ол курдук, күрэхтэһии тэрээһинин сонун кэрэ түгэннэринэн – чемпионаты үөрүүлээхтик аһыыга Россия уонна Саха Республикатын гимнэрин тыыннаах куолаһынан ыллаан доллоһутуу, волонтердар үлэлэрин тэрийии, финалга тахсыбыт бөҕөстөрү сыанаҕа анаан хаамтаран киллэрэн билиһиннэрии, кыайыылаахтары наҕараадалааһыҥҥа – чемпионнаабыт уонна миэстэлэспит спортсменнар ааттарыгар улуустарын былааҕын көтөҕүү, Д.П. Коркиҥҥа сүгүрүйэн хамаанда чилиэттэригэр футболка оҥотторуу барыта кэрэтик көһүннэ диэн, тэрийээччилэри хайҕыахха эрэ сөп. Ити көстүүлэри өссө сайыннаран, тупсаран – күрэхтэһии таһымын үрдэтэн, киэргэтэн иһии барыбытыттан ирдэнэр.

Чурапчыларга, Н.Н. Тарскай аатынан Саха сирин көҥүл тустууга биирдиилээн уонна хамаанданан бастыыр иһин чемпионаты үрдүк тэрээһиннээхтик бэлэмнээн ыыппыттарыгар улахан Махтал!

Петр ПАВЛОВ.

Ааптар хаартыскаҕа түһэриилэрэ. 

Добавить комментарий

Ваш адрес email не будет опубликован. Обязательные поля помечены *