Тарскай-2023: Чемпионат үөрүүлээхтик аһылынна

Спорт туонатынан биллибит Чурапчыга, А.И. Федотов аатынан спортивнай комплекска, көҥүл тустууга Саха Республикатын биирдиилээн уонна хамаанданан бастыыр иһин чемпионата үөрүүлээхтик аһылынна.

Быйылгы, сылы аһар бастакы чемпионакка республика 23 хамаандатыттан барыта 177 бөҕөс күөн көрсөр. Чемпионат Саха сиригэр физическэй культура тэриллибитэ 100 уонна биһиги улуу тренербит Дмитрий Петрович Коркин төрөөбүтэ 95 сылларыгар ананан ыытыллар.

Чемпионаты үөрүүлээхтик аһыыга Чурапчы улууһун дьаһалтатын баһылыга Степан Саргыдаев, Саха Республикатын физическэй культураҕа уонна спорка министрин солбуйааччы Гаврил Мохначевскай, Үтүө Дьулуур оонньууларын кыайыылааҕа, спорт үтүөлээх маастара Василий Гоголев, Россия спортивнай тустууга федерациятын эппиэттээх үлэһитэ, спорт үтүөлээх маастара Петр Юмшанов, республика чемпионатын кылаабынай судьуйата Николай Николаев кыттыыны ыллылар.

Бэлиэ түгэн үгэс быһыытынан хамаандалар кэккэлии хааман киириилэринэн саҕаланна. Россия уонна Саха сирин гимнэрин Чурапчы олохтоохторо тахсан ыллаан доллоһуппуттара дьоһуннук көһүннэ. Тыл этээччилэр сүрүннээн, бу түһүлгэҕэ ким үчүгэй бэлэмнээх, ким күүстээх – ол кыайдын диэтилэр. Спорка, чуолаан тустууга сүҥкэн кылааттарын киллэрбит дьоҥҥо наҕараадалар туттарылыннылар.

Биир бэлиэ көстүүнэн, бу чемпионакка Сунтаар, Томпо, Мэҥэ Хаҥалас, Уус Алдан, Таатта, Кэбээйи улуустарын баһылыктара бэйэлэринэн кэлэн, күрэхтэһии хаамыытын көрбүттэрэ, тустуу бүгүҥҥү күннээҕи туругун сыаналаабыттара буолла.

Күрэхтэһии салҕанар…

Петр ПАВЛОВ.

Ааптар хаартыскаҕа түһэриитэ.