Тарскай-2022: Кыайыылаахтары чиэстээтилэр

Аҕыйах хонуктааҕыта Аллараа Бэстээххэ Н.Н. Тарскай кэриэһигэр көҥүл тустууга Саха сирин биирдиилээн уонна хамаанданан бастыыр иһин 65-с чемпионата үрдүк таһымнаахтык ыытыллан түмүктэммитэ.

Билэргит курдук, бастакы миэстэни хамаанданан Мэҥэ Хаҥалас, иккиһи Чурапчы, үсүһү Сунтаар ылбыттара.

Оттон бүгүн, Мэҥэ Хаҥаласка кыайыылаахтары чиэстээһин ыытылынна. Онно чемпионат тэрээһинигэр көхтөөх кыттыыны ылбыттарга, чемпионнарга, призёрдарга, кинилэр тренердэригэр харчынан бириэмийэлэргэ туоһу суруктар, өйдөбүнньүк бэлэхтэр туттарылыннылар.

Үөрүүлээх тэрээһиҥҥэ Мэҥэ Хаҥалас улууһун баһылыга Николай Прокопьевич Старостин, Ил Түмэн депутата Юрий Петрович Баишев кыттыыны ыллылар уонна чемпионат үрдүк таһымнаахтык ыытыллыбытынан – спортсменнары, тренердэри эҕэрдэлээн туран, тэрээһиҥҥэ кыттыбыт дьоҥҥо барыларыгар махтаннылар.

Үөрүүлээҕэ диэн, хамаанда кыттыылаахтара бары бэлиэтэннилэр. Биир кэрэхсэбиллээх түгэнинэн, Мэҥэ Хаҥалас бары нэһилиэктэрин баһылыктара кыттыһан хамаандаҕа диэн ааттаан, 515 тыһ. солк. харчыны туттарыылара буолла. Ону тэҥэ бириэмийэлэммиттэр ортолоругар тренердэр Николай Сивцев, Александр Птицын, судьуйа Аркадий Тастыгин, врач-массажист Дмитрий Шарин уо.д.а. бааллар.

Кэрэ бэлиэ түгэн музыкальнай эҕэрдэнэн доҕуһуолланна.

Санатан эттэххэ, кыайыылаах хамаандаттан – Константин Власов (79 кг) чемпион, Станислав Свинобоев (74 кг) иккис, Айсиэн Винокуров (57кг), Николай Сивцев (70 кг), Софрон Софронов (86 кг) үһүс миэстэ буолбуттара. Оттон Уйгулан Иванов (61 кг), Дьулустан Сивцев (92 кг) уонна Виктор Вавилов (97 кг) – аҕыс күүстээхтэр ахсааннарыгар киирэн, аны сайын Саха сирин норуоттарын спортивнай оонньууларыгар кыттарга, хамаандаларыгар путёвка аҕаллылар.

Петр Павлов.

Виталий Пестряков хаартыскаҕа түһэриитэ.

Добавить комментарий

Ваш адрес email не будет опубликован.