Спортсмен хайдах майгылаах буолуохтааҕый?

Аан дойдуга аатырбыт спортсменнарбытын ылан көрүөххэ. Холобура, быраабылата суох киирсиигэ аан дойду чөмпүйүөнэ Федор Емельяненко этэргэ дылы, сытар ынаҕы туруорбат сытыары-сымнаҕас майгылаах.

Кини бэйэтинээҕэр биир төбөнөн үрдүк, улахан дьону кытта киирсэрэ. Федор иннигэр оҕуһу туруору туппут курдук дьон, сиэри-аһаары, киирсии саҕаланна да тырыта тыытыахтыы көрөн тураллара. Онтон биһиги киһибит рингэҕэ, эбэтэр клеткаҕа киирэн баран, Үрдүк Таҥаратын диэки хантайан көрөрө уонна түөһүгэр иилинэн кэлбит кириэһин сыллыыра, ол кэннэ утарылаһааччытын иннигэр баран холкутук туттан турара. Утарылаһааччыта хаһааҥҥыттан эрэ өстөөҕүн көрбүттүү өтөрү-батары көрөн, хамаанда да иннигэр түһэн кэбиһиэхтии туттан турара. Онтон Федор буоллаҕына, кимиэхэ да өһө суохтуу, умса туттан турара.

Бу маны киирсээччитэ: “Миигиттэн куттанан тоһунна!” – да диэн өйдүөн син. Дьэ, онтон киирсии саҕаланна да, Федор охсон кулуппаайдаабытынан киирэн барар. Аарыма дьону атаҕыттан ылан, өрө баһан таһааран, охторон илиитин эрийэн хачыгыратан да кыайталыыр. Гилетинаҕа да хам ылбыта баар буолар, ону кытта бэринэн канваһы таптайаллар. Аны утарылаһааччылара мээнэ дьон буолбатах, үксүтэ эмиэ “мин эрэ!” диэбит бөҕөстөр.

Дьэ сиэри, аһаары силбиэтэнэн аҕай уруһуйданан киирэллэр, түөстэрин охсунан публикаҕа оонньоон ыстаҥалыыллар. Онтон сотору кута-сүрэ тостубут, киһилии умса туттан турбут Федор, эмискэ киирэн канваһы биир гына төкүнүтэлиир. Соторутааҕыта аҕай салгыны хайыта охсуолаан, сутурҕаан киирбит киһи хотторон, сирэйэ-хараҕа холлон турар буолар. Ол курдук, Федор Емельяненко уонча сылы быһа хотторуута суох сылдьыбыта. Хаһан да мээнэ бэйэтин арбаммат, киһиргэһэ суох дьон өр тулуһаллар.

Боксаҕа аан дойду чемпиона Александр Поветкин эмиэ хаһан да киһиргээбэт. Арай, итии хааннаах илбис тыыннаах, хапхаас омуктарбыт “уруһуйданар” соҕустар. Хабиб Нурмагомедов Конор Макгрегоры кыайан баран, клеткаттан ойон тахсан көрөөччү саалатыгар киирэн айдаан тардыбыта. Конор дьоно тыллара да кыһыыта бэрт буоллаҕа. Уонна Макгрегор даллараҥнаан, киһиргээн да биэрбитэ. Ол иһин уһаабатаҕа, кинини кыайар дьон көстүбүттэрэ.

Хабиб кэнники түспэтийбит, көрсүө быһыыланар буолбут. Кини да биллэҕэ дии. Аһара киһиргиир туһата суоҕун. Тас дойдулары үтүктүмүөххэ наада. Билигин аны Ислам Махачев баар. Эмиэ киһиргэһэ суох байыас. Кини өр тулуһуоҕа. Ислам Махачев соторутааҕыта аан дойду ааттааҕын, Чарльз Оливейроны кыайан үрдүк ситиһиини ылыммыта. Бу омуктар уонна итэҕэллэрэ күүстээх. Киирсиэхтэрин иннинэ Аллахтарыгар үҥэллэр.

Саха спортсменнара эмиэ итэҕэлгитин өрө тутуҥ! Барыта бэйэҕит илиигитигэр!

ОРОДЬУМААН.