Спорт, үлэ бэтэрээнин чиэстээһин

Дьокуускай куорат В.П. Керемясов аатынан 3 №-дээх спортивнай оскуолатыгар Уус Маайа улууһун биир киэн туттар киһитэ, спорт бэтэрээнэ Иван Николаевич Моисеев 65 сааһыгар анаммыт көҥүл тустууга оҕолорго республикатааҕы турнир буолан ааста. Күрэхтэһиини улуус спордун салайааччы Петр Михайлович Суздалов иилээн-саҕалаан, кылаабынай судьуйанан үлэлээн ыытта.

Урукку өртүгэр бэртээхэй тренер, аҕам саастаахтарга Россия чемпиона, аан дойду түһүлгэтин икки төгүллээх кыттыылааҕа, иккиэннэригэр бириистээх миэстэҕэ кыл мүччү биирдии хардыынан тиийбэтэх, үйэтин тухары Уус Маайа оҕолоро эт-хаан өртүнэн чэгиэн-чэбдик дьон буола улааталларыгар күн бүгүнүгэр диэри сыралаһан үлэлии, спорду көҕүлүү сылдьар киһи үбүлүөйдээх сааһын үрдүк таһымнаахтык бэлиэтээһин, чиэстээһин тэрилиннэ.

Күрэхтэһиигэ барыта 12 хамаанда кытынна. Көбүөргэ 130 оҕо таҕыста. Састаап күүстээх. Чурапчы, Мэҥэ Хаҥалас, Горнай элбэх оҕону кытыннарда. Түмүккэ Дьокуускай куорат В.П. Керемясов аатынан 3 №-дээх спортивнай оскуолатын иитиллээччилэрэ 10 ыйааһынтан 7-гэр кыайыыны ситистилэр.

Тэрийээччилэр олохтообут сүрүн бириистэрэ баһыйар өртө бу оскуола оҕолоругар тигистэ. Туһааннааҕынан А.Голиков, Нь.Чемезов, В.Михайлов, Ч.Бурцев, Е.Шевелев, Н.Сафаров, Д.Павлов бэйэлэрин ыйааһыннарыгар бастаатылар. Итини тэҥэ Чурапчыттан Е.Ефимов, А.Слепцов, Горнайтан М.Леонтьев кыайдылар. Манна даҕатан эттэххэ, Россия чемпионатын призера буола сылдьыбыт, билигин дойдутугар Горнайга тренеринэн үлэлии сылдьар П.А. Сивцев иитиллээччилэрэ тахсыылаахтык тустубуттара харахха быраҕыллар.

Күрэхтэһии түмүгүнэн элбэх бэлиэ бириистэр туттарылыннылар. Барыта уонча араас анал бириис оонньонно.

Кэрэхсэбиллээҕэ баар, үбүлүөйдээх И.Н. Моисеев дьиэ кэргэнин аатыттан 10 тыһ. солк. бириис – түһүлгэ кыайыылаахтарын сэрэбиэй тардыыларыгар, 62 киилэҕэ эрэллээхтик бастаабыт, үөһэнэн быраҕан күдээритэр идэлээх Егор Шевелев тарбаҕар бааттааҕын көрдөрөн, сүрүн бириис хаһаайынынан буолла.

Киэҥ нэлэмэн Сахабыт сиригэр бэрт киэҥ сиринэн тайаан сытар кэрэ айылҕалаах Уус Маайа өрүһүн тула былыр-былыргыттан ойо ыстанан Россияҕа, ССРС-ка, аан дойду биллэр спортсменнар: Анатолий Филиппов, Алексей Диодоров, Анатолий Панаев төрөөн-үөскээн тахсыбыттара. Мин санаабар, бэйэлэрин талан ылбыт идэлэригэр олохторун анаабыт бэриниилээх бэтэрээннэр, Иван Николаевич Моисеев курдук дьон үлэлэрин түмүгэр итинник биллиилээх спортсменнар иитиллэн, эрчиллэн тахсаллар.

Федот СОЛОВЬЕВ, Дьокуускай куорат 3 №-дээх спортивнай оскуолатын бочуоттаах дириэктэрэ.

Добавить комментарий

Ваш адрес email не будет опубликован. Обязательные поля помечены *