Ситиһиилээх, кыайыылаах кыттыыны баҕарабыт!

«Азия оҕолоро» норуоттар икки ардыларынааҕы VII спортивнай оонньуулар саҕаланаллара чугаһаата. Бу күннэргэ, спорт көрүҥнэринэн Саха сирин сүүмэрдэммит хамаандалара анал үөрэтэр-эрчийэр түмсүүлэргэ тиритэ-хорута дьарыктана сылдьаллар.

Саха Республикатын физическэй культураҕа уонна спорка миниистирэ Леонид Спиридонов «Триумф» Спорка бэлэмнэнии киинигэр – «Азия оҕолоругар» кыттыахтаах спортивнай тустуу уонна хапсаҕай хамаандаларын спортсменнарын уонна тренердэрин кытта көрүстэ. Манна эдэр спортсменнар оонньуулар иннилэринэ бүтэһик эрчиллиилэрин ыыта сылдьаллар.

Сайыҥҥы куйаас күн көлөһүн сыттаах көбүөргэ эдэр спортсменнар боччумуран туран дьарыктаналлар. Кинилэргэ тренердэр кэрийэ сылдьан эрчиллии хаамыытын салайан биэрэллэр, сүбэлииллэр-амалыыллар, сыыһаларын-халтыларын ыйан биэрэн, көннөрүнэллэригэр ыйаллар.

Сотору, болдьоммут кэмҥэ Леонид Николаевич киирэн кэлээтин кытта, спортсменнар бары биир сиргэ чөмөхтөһөллөр. Бэйэтэ маннык саастан үүнэн-сайдан тахсыбыт, этэргэ дылы, спортсмен олоҕун бүтүннүү этинэн-хаанынан ааспыт миниистир бастатан туран, оҕолору кытта биир-биир илии тутуһарын быыһыгар, эрчиллэр-олорор усулуобуйалара хайдаҕын туоһулаһар.

Мин эмиэ эһиги сааскытыгар сылдьан, 1996 сыллаахха «Азия оҕолоро» норуоттар икки ардыларынааҕы бастакы спортивнай оонньууларга кыттан турардаахпын, — диир Л.Н. Спиридонов. – Онно, тустууга бэйэм ыйааһыммар бастаабытым. Ити мин улахан спорка киирэрбэр бастакы олук этэ. Ол бастакы оонньууну уонна билиҥҥини тэҥниир сыыһа буолуо дии саныыбын. Оччотооҕу тэрээһини уонна билиҥҥи таһым олох атын-атыттар. Эһиги Владивостокка тиийэн «Азия оҕолорун» төрүттээбит Саха сирин чиэһин көмүскүүгүт. Бу улахан эппиэтинэс. Оонньууларга барыта 15 дойду спортсменнара күрэс былдьаһыахтара. Онуоха эһиэхэ ситиһиилээх, кыайыылаах кыттыыны баҕарабын, — диэн туран, көҥүл тустуу хамаандатын уолаттарыгар сабыс-саҥа борцовкалары туттартаата.

Ити курдук, Леонид Спиридонов, «Азия оҕолоругар» кыттар хапсаҕайдьыттары, тустуук кыргыттары, кинилэр тренердэрин кытта көрсөн сэһэргэһэн ылла.

Көрсүһүү, өйдөбүнньүк хаартыскаҕа түһүүнэн түмүктэннэ.

Ол кэнниттэн дьарык салҕанан барда. Оттон спорт миниистирэ салгыы хаалан, хамаанда тренердэрэ: республика 15-гэр диэри саастаахтарга хамаандатын тренерэ, норуоттар икки ардыларынааҕы кылаастаах спорт маастара Кузьма Сивцеви, республика 17-гэр саастаахтарыгар диэри сүүмэрдэммит хамаандатын эппиэттээх тренерэ, Саха сирин уонна Россия үтүөлээх тренерэ Степан Сивцеви кытта дьарык хаамыытын дьүүллэстэ.

Маннык көрсүһүүттэн хамаанда чилиэннэрэ санаалара күүһүрбүтэ, бэйэлэрин күүстэригэр-кыахтарыгар эрэллэрэ улааппыта буолуо диэн бүк эрэниэххэ.

Санатан эттэххэ, «Азия оҕолоро» норуоттар икки ардыларынааҕы VII спортивнай оонньуулар от ыйын 27 – атырдьах ыйын 7 күннэригэр Владивосток куоракка ыытыллаллар. Саха сирин хамаандата спорт 18 көрүҥэр 120 спортсменынан кыттар. Оҕолорбутугар ситиһиилээх кыттыыны баҕарабыт уонна Владивостоктан үөрүүлээх сонуннары кэтэһэбит.

Петр Павлов.

Ааптар хаартыскаҕа түһэриилэрэ.        

Добавить комментарий

Ваш адрес email не будет опубликован.