Сибиир Роккита

Руслан Проводников боксаҕа 2013-2014 сс. WBO версиятыгар Аан дойду чемпиона. Кини 1984 сыллаахха Ханты Мансийскайга, Березовка диэн кыра дэриэбинэҕэ төрөөбүтэ, үөскээбитэ. Манси диэн сахалардааҕар да аҕыйах ахсааннаах омук уола, боксанан кыра эрдэҕиттэн дьарыктанан аан дойдуга тиийэ биллэн аатырбыта.

Руслан оҕо сылдьан уулуссаҕа охсуһар идэлээҕэ. Оскуолаҕа ол туһуттан мөҕүллэрэ. Уолаттары кытта табах тардаллара, бензини сыттыыллара, наркотигы да боруобалыыллара.

Руслан үөрэҕин көтүтэр буолан, учууталлартан элбэхтик мөҕүллэрэ. Төрөппүттэрэ да тиийиммэт түгэммэт уонна «уоттаах утахха» убаммыт буоланнар, уолларын мээнэ болҕомтоҕо ылан бэрийбэт этилэр.

Биир үтүө күн Русланы бокса сексийэтигэр киллэрбиттэрэ. Уолчаан уулуссаҕа охсуһа үөрэммиччэ, санаан көрбүтэ итинник үллүбүт ыарахан эрээри, сымнаҕас боксерскай бэриччээккэнэн охсустахха кинини буруйдаабаттарын билбитэ.

Руслан оҕолортон эрэ уһулуччу киирсэрэ. Бэйэтиттэн аҕа саастаахтары да кыайталыыра. Боксаҕа миэстэлэһэн, юношескай разряды ылан мэлдьи оскуолаҕа мөҕүллэр уол хайҕал диэни билэн, хараҕыттан уу-хаар баспыта. Оскуолаҕа үөрэҕэр мэлдьи борогууллуур уол, туох эрэ соруктаах аҕай барар буолбута.

Күүскэ дьарыктанан Арассыыйа чемпиона буолан, спорт маастарын нуорматын толорбута. Руслан кэргэннэнэн оҕолонон, уон тыһыынча хамнаһа туохха да тиийбэт этэ. «Үп-харчы тиийбэт буолан, кэргэним күһүҥҥү чараас куртканан кыһыны туоруура» — диэн кэпсиир. Оччолорго Арассыыйаҕа харчы иһин, бокса күрэхтэһиитэ мээнэ үөдүйэ илигэ. Руслан ол иһин Америкаҕа барыан саныыра. Ол иһин күүскэ дьарыктанан, саастаахтарын самнарбыта, тэгил дойду тэҥнээхтэрин тиэритэ биэртэлээбитэ. Арассыыйаттан күүстээх боксердары сүүмэрдээн Америкаҕа ыыталларыгар Руслан хапсыбыта. Онно тиийэн профессиональнай боксаҕа аан дойду ааттаахтарын боҕутуннартаабыта.

Саха сирин курдук халыҥ хаардаах Сибиир уолун, аан дойду билбитэ. Акыйаан уҥуор баар норуоттар манси диэн кыра омуктар баалларын, билбэттэр да буоллаҕа. Руслан Проводников бэйэтин биллэрбитигэр, кинини «Сибирский Рокки» диэн ааттаабыттара. Ханнык эрэ Сибиир түгэҕэр кыра дэриэбинэҕэ үөскээбит мэник баппат уолчаан, соҕотохтуу сураҕырбыта, аҥардастыы аатырбыта.

Руслан омук сиригэр киирсэригэр ардыгар ийэтин илдьэ барара. Сибиир түгэҕиттэн ханна да ырааппатах, Москваны да көрбөтөх ийэтэ, Америка аатырбыт куораттарыгар сылдьан киэҥ сиргэ көччүйбүтэ. Уолун кыайыытын, үөрүүтүн тэҥҥэ үллэстибитэ.

Руслан киирсэригэр кэннинэн кэхтибэт, чугуйбат. Биир кэм бастакы нүөмэринэн үлэлиир. Утарылаһааччытын хайдах эрэ кыайдарбын, тоһуттарбын диэн киирсэр. Табыллан сирэйэ-хараҕа иһэлийбитин, кулгааҕа куугунаан, туймаарбытын да иһин, син-биир киирэ турар толлубат, тостубат байыас. Кини көрүҥүнэн саха бааһынайын курдук уол. Утарылаһааччылара мэлдьи киниттэн өндөс, үрдүк уҥуохтаах буолаллар.

Русланы Фрэдди Роуч диэн биллиилээх бокса тренерэ бэлиэтии көрөн ылан, дьарыктаабыта. Профбоксаҕа аан дойду чемпиона Тимати Брэдли диэн, Мэни Пакьяоны кыайбыт боксеры кытта киирсэр чиэскэ тиксибитэ. Руслан Брэдлини хаста даҕаны доргутан, туймаардан рингэҕэ төкүнүппүтэ, ол үрдүнэн судьуйалар нокдауну мээнэ аахпатахтар этэ. Очконан кыайыыны Тимати Брэдлигэ биэрбиттэрэ.

Брэдли бэйэтэ этэринэн: «Сибиир Роккита диэннэрэ охсордоох эр бэрдэ эбит, сыҥаахха табыллыбыппар санаабар сыҥааҕым кэтэхпинэн тахса сыста», — диэбит. Бокса киирсиитин кэнниттэн Брэдлини балыыһаҕа илдьибиттэр этэ.

Руслан төһө да киэҥ сиринэн сылдьан аатырдар, бэйэтин кыра норуотун умнубат, үбүнэн-харчынан өйүүр. Киһи быһыытынан элэккэй, үтүө майгылаах. Кини Сергей Есенин хоһооннорун эҥин ааҕар. Оттон хоһоон ааҕар киһи, ол аата, сырдыкка, кэрэҕэ тардыһар.

Руслан Проводников аҕыйах ахсааннаах кыра омуктартан, муҥутуур үрдүк ситиһиилээх боксер буолар.

Родион Данилов – Ородьумаан.

19.07.2022.

Добавить комментарий

Ваш адрес email не будет опубликован.