“Сахабыт сирин ситиһиилээхтик көмүскүүргэ бэлэммит”

Бу күннэргэ “Триумф” Спорка бэлэмнэнии киинигэр “Азия оҕолоро” норуоттар икки ардыларынааҕы VII спортивнай оонньууларга бэлэмнэнэн, тустууктар уонна хапсаҕайдьыттар анал эрчиллиини бара сылдьаллар. Көҥүл тустууга уолаттарга хамаанда эппиэттээх тренерэ, норуоттар икки ардыларынааҕы кылаастаах спорт маастара Кузьма Сивцевтэн, бэлэмнэнии хаамыытын билиһиннэрэригэр көрдөстүм.

Хамаанда састааба хас да күрэхтэһии түмүгүнэн талылынна. Бу, “Азия оҕолоругар” анаан үс түһүмэхтээх үөрэтэр-эрчийэр түмсүүбүт ыытылла турар. Бастакы улахан дьарык саас буолбута, салгыы Парамоново (Москва уобалаһа) уонна бу бүтэһик сбор “Триумфка” тэрилиннэ. Маныаха бастатан туран, Саха Республикатын физическэй культураҕа уонна спорка миниистирэ Леонид Николаевич Спиридоновка, республикатааҕы оҕо спордун холбоһугун салайааччыта Василий Иванович Егоровка, “Триумф” Спорка бэлэмнэнии киинин дириэктэрэ Михаил Дмитриевич Пахомовка – анал эрчиллэр түмсүүнү тэрийбиттэригэр хамаанда аатыттан махтанабыт! Медицинскэй көрүү, аһылык, усулуобуйа барыта үчүгэй.

Сборга сүрүн састаабы тэҥэ инники эрэллэрбитин эмиэ кытыннардыбыт. Ол курдук, Уус Алдан, Мэҥэ Хаҥалас, Чурапчы, Горнай о.д.а. улуустартан тустуук уолаттар бааллар. Тэрээһиммит эргиччи туһалаах буоларыгар баҕарабыт. Сорох кэккэ уолаттар сотору Минскэйгэ “Медвежонок” турнирга кытталлара былааннанар.

Уолаттарга көҥүл тустуу хамаандатын эрчийиигэ тренердэр Степан Сивцев, Юрий Афанасьев, Павел Павлов, Николай Яковлев, Дьулустан Сивцев сыһыарыллан үлэлии сылдьаллар.

“Азия оҕолоругар” сүрүн утарсааччыларбытынан Иран, Индия, Казахстан курдук, көҥүл тустууга үтүө үгэстээх дойдулар бөҕөстөрө буолуохтара дии саныыбыт. Ону тэҥэ Россия атын регионнарыттан кыттар спортсменнар даҕаны күүстээхтэр. Биһиги, Сахабыт сирин чиэһин, бэйэбит дойдубутуттан төрүттэммит оонньууларга ситиһиилээхтик көмүскүүргэ бэлэммит. “Азия оҕолоро” норуоттар икки ардыларынааҕы спортивнай оонньуу – Азия континенын оҕолорго Олимпиадата буоллаҕа.

Хамаанда от ыйын 28 күнүгэр Владивостокка көтөр. Оонньуу программатын быһыытынан, тустуу үс күн ыытыллар: от ыйын 31 – атырдьах ыйын 1-2 күннэригэр.

-Кузьма Афанасьевич, иһитиннэрииҥ иһин махтал! Ситиһиилээх кыттыыны баҕарабыт уонна Владивостоктан үөрүүлээх сонуннары кэтэһэбит.

PS: Саха сирин көҥүл тустууга сүүмэрдэммит хамаандатын састааба: 38 кг – Эрхан Куличкин (Дьокуускай), 44 кг – Рома Кириллин (Сунтаар), 52 кг – Максим Григорьев (Уус Алдан), 57 кг – Артур Попов (Чурапчы), 62 кг – Толя Иванов (Сунтаар), 68 кг – Дима Павлов (Дьокуускай), 85 кг – Айаал Дьячковскай (Чурапчы).

Петр ПАВЛОВ.

 

Добавить комментарий

Ваш адрес email не будет опубликован.