«Роман Дмитриев дойдута – Эдьигээн» быыстапкаҕа ыҥырабыт!

Республикабыт киин куоратыгар «Строительнай» атыы-эргиэн киинин анал быыстапкалыыр саалатыгар төрдүс төгүлүн «Коркинныы олоруохха. Коркинныы айыахха!» диэн быыстапка үгэннээн үлэлиир. Тэрийээччилэр этэллэринэн, быыстапкаҕа кыттааччы элбээн иһэр. Ол курдук, бэҕэһээҥҥиттэн, бастакы олимпийскай чемпиоммут Роман Михайлович Дмитриев төрөөбүт дойдутуттан – Эдьигээнтэн сыаналаах күндү экспонаттар быыстапкаҕа аҕалыллан туруорулуннулар.   

Эдьигээннээҕи историческай музей дириэктэрэ Сивцева Людмила Егоровна:

-Быйыл биһиги Эдьигээммит төрүттэммитэ 90 сыла! Онон сибээстээн Е.Ярославскай аатынан республикатааҕы музейга балаҕан ыйын 15 күнүттэн биһиги бэйэбит Эдьигээммит туһунан быыстапка туруорабыт. Итиэннэ өссө биир улуу түгэн диэхпин баҕарабын, атырдьах ыйын 31 күнүгэр Саха сирин аар сааргы аатырдыбыт биир дойдулаахпыт Роман Михайлович Дмитриев олимпийскай чемпион буолан дьонун-сэргэтин, республика олохтоохторун барыларын өрөгөй үөрүүтүгэр тиэрдибит күнэ 50 сыла буолла. Манан сибээстээн, «Коркинныы олоруохха. Коркинныы айыахха!» быыстапкаҕа кыттарга сананныбыт. Биһиги быыстапкабыт «Роман Дмитриев дойдута – Эдьигээн» диэн ааттаах.

Эдьигээн оройуона уһук хоту сытар. Улуу биир дойдулаахпыт Роман Дмитриев аҕатын өртүнэн саха, ийэтинэн эбэҥки буолар. Бу кини хайдах уһуйуллан, айыллан таҕыста? Хоту тыйыс усулуобуйаҕа улаатан, Чурапчыга улуу тренер Дмитрий Петрович Коркиҥҥа тиийэн дьарыктанан, Олимп чыпчаалын эрдээхтик дабайда диэн ис тыыннаах, биһиги быыстапкабыт. Онон оройуоммут түҥ былыргы историятын кэпсиир музейнай экспонаттарын аҕаллыбыт.

Холобур, XIX үйэҕэ Сэкэннэй диэн, Эдьигээҥҥэ бүтэһик кинээс үрүҥ көмүс курун көрдөрүүгэ туруордубут. Бу Сэкэннэй, Роман Михайлович чугас аймаҕа. Өссө саха дьахтарын дьабака бэргэһэтин, эмиэ XIX үйэтээҕини дьон сэргии көрүө дии саныыбыт. Улуу киһибит төрүт эбэҥки сиригэр төрөөбүтэ-улааппыта диэн, таба түүтүттэн эбэҥкилэр национальнай көстүүмнэрин, норуот маастара Винокурова Тамара Васильевна оҥоһуктарын аҕаллыбыт. Ону сэргэ билигин Эдьигээҥҥэ түөлбэлээн олорор сахалар, эбэҥкилэр олохторун-дьаһахтарын сырдатар сувенирнай оҥоһуктары быыстапкаҕа туруордубут.

Баһаалыста кэлэн көрүҥ, сылдьыҥ, ыалдьыттаан диэн ыҥырабыт!

Петр ПАВЛОВ.

Ааптар хаартыскаҕа түһэриилэрэ.