Потаповтар – холобур буолар дьиэ-кэргэн

Ыам ыйын 15 күнэ Аан дойдуга – Дьиэ кэргэн күнэ, 1993 сылтан ыла бэлиэтэнэр. Бигэ туруктаах дьиэ кэргэҥҥэ иитиллибит-такайыллыбыт буоллаххына – дьолуҥ. Олоҕуҥ устата үчүгэй иитиилээх, ыарахаттары аһарар, дириҥ билиилээх, сайдыылаах, дойдуга туһалаах, бэриниилээх киһи буолар.

Бу күҥҥэ анаан-минээн республикатааҕы Олимпийскай эрэллэри бэлэмниир кыһаҕа, иитээччи Ноговицына М.Д. ыҥырыытынан, эдэр ыччакка холобур буолар дьиэ кэргэн, Татьяна Иннокентьевна, Виктор Филиппович Потаповтар күндү ыалдьыттарынан буоллулар.

Татьяна Иннокентьевна нуучча тылын учуутала идэлээх, бу кыһаҕа биэс сыл иитээччинэн үлэлээбитэ, ахтылҕаннаах истиҥ көрсүһүү тэрилиннэ. СӨ үөрэҕириитин туйгуна, методист-иитээччи, элбэх хоһоон ааптара, ырыа айааччыта, хас да кинигэлэрдээх “Иэйии кыымнара”, “Олох умсулҕана”, “Кэрэни кэрэхсээн”, “Сырдыгы ыстарбын” о.д.а.

Виктор Филиппович, РФ, СӨ үтүөлээх учуутала, СӨ М.А. Алексеев аатынан педагогикаҕа судаарыстыбаннай бириэмийэ лауреата, РФ норуотун үөрэҕириитин туйгуна, Бүтүн Россиятааҕы «Бастыҥ учуутал» куонкурус кыайыылааҕа, СӨ Президенин  үөрэхтээһиҥҥэ уонна наукаҕа хонтуруол судаарыстыбаннай  сулууспатын « Учуутал албан аата» кыһыл көмүс бэлиэтин хаһаайына, сэттэ төгүллээх Сорос учуутала, Дмитрий Зимин аатынан «Династия» фондатын лауреата, Учууталлар учууталлара, СӨ баһылыга Айсен Николаев учуутала.

Дьэ, маннык ааттаах-суоллаах ыалдьыттарбыт үгүс кэпсээннээх, сүбэлээх буоллулар, олус диэн  туһалаах көрсүһүү ыытылынна.

Биир кэрэ бэлиэ түгэнинэн, Татьяна Иннокентьевна, өссө училищеҕа үлэлиир кэмигэр сылдьан, кыһабыт гимнин суруйбут. “Эрэл гимнэ” кырдьык даҕаны, эдэр спортсменнарга күн аайы күүс-күдэх эбиллэригэр, эт-хаан өттүнэн күүскэ эрчиллэллэригэр, биир иллээх кэргэҥҥэ иитиллэн тахсалларыгар, дойдубут туһугар Чыпчаалга дабайалларыгар диэн ис хоһоонноох гимн суруллан үөрэнээччилэр, устудьуоннар ис сүрэхтэриттэн ыллыыр ырыалара. Саала иһигэр мустубуттар гимни доргуччу ыллаан ньиргиттилэр, бэйэлэрин киэнэ буолан, сүрэхтэригэр чугастык ылыннылар.

Хоһоонньут быһыытынан, тустууга сахалартан бастакы олимпийскай чемпион, үөрэхпит кыһатын аатын сүгэр  Р.М. Дмитриевкэ анаан сахалыы, нууччалыы  хоһооннордоох. Тыла-өһө ылбаҕайа, ааҕааччы тута ылына охсор, дириҥ ис хоһоонунан киэн тутта ааҕар хоһооно. Эбиитин Татьяна Иннокентьевна, бу хоһооҥҥо клип уһулла сылдьарын эттэ, көрдөрдө. Көрсүһүү кэннэ, оҕолор биһиги бастакы бу клиби көрдүбүт диэн үөрүүлэрэ баһаам. Кинигэлэрин училище библиотекатыгар бэлэхтээн, киэҥ эйгэҕэ ааҕыыга таҕыста. Тус бэйэм “Сырдыгы ыстарбын”  хоһооннорун хомуурунньугун сөбүлээн аахтым, темаларынан наардаан суруйбутун кэрэхсээтим, ааҕа олорон хараххар ойуулаан көрөҕүн, турукка киирэҕин. Татьяна Иннокентьевна кэпсии олорон ис иһиттэн сырдыы, сыдьаайа, үтүөнү баҕара олороро, оҕолору олус  астыннарда.

Виктор Филипповиһы, үөрэх эйгэтигэр үлэлиир киһи, тыһыынчанан ааҕыллар үөрэнээччилэрэ, бүтэрбиттэрэ, Саха сиригэр билбэт киһи диэн суоҕа буолуо. “Сүрэҕим сылааһа – оҕоҕо” киниэхэ аналлаах кинигэтэ да ааттанарын  курдук, олоҕун оҕоҕо анаан кэллэ. Биир тыынынан улахан Учуутал туһунан сөҕө ааҕаҕын. Саха оҕото сайдыылаах, дириҥ билиилээх, ханна да сырыттар инники күөҥҥэ сылдьарыгар туһаайан үлэлиир. Төһө да атын эйгэ учуутала буоллар, биһиги кыһабытын кытта ситимнээх курдук, СӨ физика биридимиэтин олимпийскай хамаандатын тренерэ. Иитиллээччилэрин ситиһиилэрэ үгүс, таһыма үрдүк.

Ыалдьыттарбыт дьиэ кэргэн үгэстэрин, бэйэлэрин оҕолорун иитиитин, үөрэхтэрин, билигин тугу үлэлииллэрин сиһилии кэпсээтилэр. Биэс оҕо бары ситиһилээхтик үөрэнэн, үлэлээх, олохторугар миэстэлэрин булуммут дьон эбит.  “Төрүт дьон төрүөҕэ, ытык киһи ыччата” диэн мээнэҕэ этиллибэтин оҕолоро туоһулууллар.

Харда тылы 9-с кылаас биир бастыҥ үөрэнээччитэ Фокинов Алеша (Сунтаар) барыбыт ааппытыттан махтал тылларын анаата, училищебыт туһунан буклет туттарда. Оҕолор илии тутуһан, долгуттулар.

Онон, Дьиэ кэргэн күнүгэр, уопсайбыт иитиллээччилэрэ бастыҥ дьиэ кэргэнниилэри кытта көрсөн дуоһуйуу ыллылар, иитээччилэригэр Маргарита Дмитриевна Ноговицынаҕа махтаннылар.

Татьяна Иннокентьевнаҕа, Виктор Филипповичка чэгиэн туругу баҕарабыт, олоххутун оҕолорго анаабыт үлэҕит умнуллуо суоҕа, сайда-чэчирии туруо!

Варвара НИКОЛАЕВА, Р.М. Дмитриев аатынан республикатааҕы Олимпийскай эрэллэри бэлэмниир кыһа иитээччитэ.

 

 

 

Добавить комментарий

Ваш адрес email не будет опубликован.