Поддубнай-2022: Уолаттарбыт кимнээҕи кытта тусталларый?

Москва. Саҥа тэриллибит тустууга Иван Поддубнай лигатын сэрэбиэйэ оҥоһулунна. Бу саҥа, сонун күрэхтэһиигэ биһигиттэн Арыйаан Тютрин, Андрей Бекренев, Ньургун Скрябин, Виктор Рассадин кытталлар. Лигаҕа Россия бөҕөстөрүн тэҥэ Беларусь уонна Монголия спортсменнара бааллар.

Дьэ, онон сэрэбиэйбитигэр киириэххэ.

57 киилэҕэ 12 бөҕөс күөн көрсөр. Аан дойду чемпионатын боруонса призера, Беларусь чемпиона Арыйаан Тютрин иккис бөлөххө түбэспит. Кини бастаан квалификацияҕа бурят Баир Баяндуевтыын киирсиэҕэ. Кыайыылаах финал чиэппэригэр Россия экс-чемпиона Рамиз Гамзатовтыын (Дагестан) тустуоҕа. Бу бөлөххө өссө Россия, Европа призера Начын Монгуш, Россия эдэрдэргэ кыайыылааҕа Артем Гобаев, Али Алиев турнирын призера Муса Мехтиханов бааллар.

Онон састаап куһаҕана суох диэххэ сөп. Арыйаан бастакы утарсааччытын ааһарыгар саарбахтааһын суох, оттон Гамзатов, Монгуш уонна Мехтиханов – кутталлаахтар. Ол да буоллар, биһиги бэйэбит бөҕөспүтүгэр ыалдьабыт уонна эрэнэбит.

Бу ыйааһыҥҥа үөһэ бөлөххө сэрэйдэххэ Азамат Тускаев уонна Абубакар Муталиев финалга тахсар иһин дьулуһаллара буолуо.

61 кг ыйааһыҥҥа 10 кыттааччы сэрэбиэйи ааспыт. Беларусь Республикатын чемпиона Андрей Бекренев аллараа бөлөххө квалификацияҕа, Муслим Мехтиновтыын тустар буолбут. Муслим – Муса бииргэ төрөөбүт убайа, чеченец, 23 саастаах. Былырыын Улан-Удэҕэ ыытыллыбыт Россия чемпионатын финалыгар А.Магомедовка сабырыйтаран, иккис миэстэни ылбыта.

Бекренев кинини ааһар түгэнигэр салгыы күрэхтэһиигэ Магомед Байтукаевка тахсыан сөп. Чэ, ону көбүөр көрдөрүө. Ханныгын да иһин, сэрэбиэйи ырытан көрдөххө, Андрей бу күрэхтэһиигэ мэтээл иһин киирсэр кыахтаах. Ол барыта бэйэтиттэн тутулуктаах.

Бу ыйааһыҥҥа бастыҥынан Россия, Европа, аан дойду чемпиона Абасгаджи Магомедов ааҕыллар. Сабаҕалааһын да быһыытынан маннык састаапка кини кыайара буолуо.

Салгыы кэлэр 65 киилэҕэ Европа чемпионатын призера, Беларусь Республикатын хас да төгүллээх чемпиона  Ньургун Скрябин тустуутун көрүөхпүт. Кини бастаан тувин Кежик Чымбаны кытта киирсэр. Чымба эчэйии кэнниттэн урукку чөлүгэр саҥа киирэ сатыыр. Билигин ханнык таһымҥа сылдьара биллибэт. Онон биһиги бэйэбит опыттаах бөҕөспүтүгэр улаханнык эрэнэбит. Бу хапсыһыыга хайалара кыайбыта салгыы күрэхтэһиигэ Ибрагим Абурахмановтыын (Дагестан) киирсиэҕэ. Бу уол быйыл Иван Ярыгин аатынан норуоттар икки ардыларынааҕы Гран-при турнирга үчүгэй өйдөбүлү үөскэппитэ. Эдэр талааннаах тустуук.

70 киилэҕэ Иван Ярыгин быйылгы турнирын кыайыылааҕа Виктор Рассадин бастакы эргииргэ сынньанар. Финал чиэппэригэр кини Бугулов-Богатырев хапсыһыыларын кыайыылааҕын кытта киирсиэҕэ. Салгыы күрэхтэһиигэ Таваев-Закуев тустууларыгар хайалара хоппутун кытта көрсөрө буолуо. Бу бөҕөстөрү Виктор кыайталаабыта. Бу да сырыыга кыайарыгар эрэнэбит. Уолбут сүрүн утарсааччылара Курбан Шираев уонна Исраил Касумов аллараа бөлөххө бааллар. Онон хайалара финалга тахсарын бэйэлэрэ быһаарсыахтара. Бу күрэхтэһиигэ, маннык сэрэбиэйгэ Виктор Рассадин хайаан да мэтээл эрэ иһин киирсэр. Киниэхэ биһиги эрэлбит улахан!

Дьэ, сэрэбиэйи кылгастык ырыттахха итинник. Оттон эһиги санааҕыт хайдаҕый? Бүгүн биһиги бириэмэбитинэн киэһэ 17:00 чаастан хапсыһыылар саҕаланаллар.

Санатан эттэххэ, тустууга Поддубнай лигата – коммерческай күрэхтэһии. Кыайыылаахтар ботуччу харчынан бириэмийэлэниэхтэрэ. Ол курдук, олимпийскай ыйааһыннарга бастаабыттар – 1 млн. солк, иккистээбиттэр – 500 тыһ. солк, үһүстээбиттэр – 250 тыһ. солк харчынан наҕараадаланыахтара. Оттон олимпийскайа суох ыйааһыннарга кыайыылаахтар – 500, иккистэр – 250 уонна үһүстэр – 125 тыһ. солк бэлиэтэниэхтэрэ.

Видеотрансляция состязаний во всех стилях https://wrestlingtv.ru/pwl

Вольная борьба

Ковёр В1 – https://wrestlingtv.ru/stream/JwSSK8xbDuX1U850VYJEmQ

Ковёр В2 – https://wrestlingtv.ru/stream/yfYbQaumBsd3UbEaIvyHuQ

Ковёр В3 – https://wrestlingtv.ru/stream/6X0Hlv0Rrj1qXip0C1n75A

Петр ПАВЛОВ.

 

Добавить комментарий

Ваш адрес email не будет опубликован.