Павел Пинигин эдэр бөҕөстөрү көбүөргэ ыҥырар

Дьокуускай. Бүгүҥҥүттэн «Өрөгөй» Спорка бэлэмнэнии киинигэр олимпийскай чемпион Павел Пинигин аатыгар «Саха сирин тимир суоллара» акционернай тэрилтэ бирииһигэр көҥүл тустууга уолаттарга Бүтүн Россиятааҕы аһаҕас турнир саҕаланна.

Түһүлгэҕэ Казахстан, Монголия, Белоруссия, Еврейскэй автономнай уобалас, Забайкальскай кыраай, Ингушетия, Иркутскай уобалас, Бурятия, Приморского кыраай, Амурской уобалас уонна Саха сирин эдэр бөҕөстөрө – барыта 590 спортсмен күөн көрсөр.

Күрэхтэһии үөрүүлээх аһыллыытыгар олимпийскай чемпион, аан дойду үс төгүллээх кыайыылааҕа, спорт үтүөлээх маастара Павел Пинигин, «Саха сирин тимир суоллара» тэрилтэ генеральнай дириэктэрин солбуйааччы Алексей Местников, Саха Республикатын физическэй культураҕа уонна спорка миниистирэ Леонид Спиридонов кыттыыны ыллылар. Кинилэр эдэр бөҕөстөргө дьаныардаахтык дьарыктанан, улахан ааттаах-суоллаах спортсмен буола үүнэллэригэр ситиһиилэри баҕардылар.

Бастакынан күрэхтэһиини 15-гэр диэри саастаахтар саҕалаатылар. Кинилэр барыта 15 ыйааһыҥҥа кыайыылаах аатын ким ыларын быһаарсаллар. Сарсыҥҥыттан 17-гэр диэри саастаахтар тустуохтара.

Тустуу сарсыарда 09:00 чаастан киэһэ 18:00 чааска диэри биэс көбүөрүнэн тигинэччи ыытылынна. Бүгүн, ыйааһын ахсын кыттааччылар үс эргиири туһуннулар. Ким кыайыы үөрүүтүн, ким хотторуу хомолтотун биллэ. Ол эрэн, күүстээхтэр сиидэлэнэн-сиидэлэнэн, бириистээх миэстэ диэки эрдээхтик дьулуһаллар. Билиҥҥитэ ханнык хамаанда бастыҥын этэр эрдэ. Ыалдьыттарбыт даҕаны күүстээх кыттааччылары аҕалбыттар.

Манна даҕатан эттэххэ, күрэхтэһиигэ кыттааччылар икки хотторуу кэнниттэн туоруулларын гына оҥоһуллубут. Ол аата, бачча кэлэн баран, биирдэ хотторон туораан хаалбакка, хас даҕаны хапсыһыыны ыыттыннар диэн санааттан оҥоһуллубут. Ол курдук, кыайыылаахтар А, хотторбуттар Б бөлөххө киирэн тусталлар.

Бырагыраама быһыытынан күрэхтэһии от ыйын 1 күнүгэр диэри салҕанан ыытыллар. 15-гэр диэри саастаахтарга 15 ыйааһыҥҥа быһаарыылаах киирсиилэр өйүүн – бэс ыйын 30 күнүгэр буолуохтара, оттон 17-гэр диэри саастаахтарга кыайыылаахтары от ыйын 1 күнүгэр билиэхпит.

PS: Бастакы күн сорох тустууларын Дьулурҕан хаһыат ютубка каналыгар көрүөххүтүн сөп.

Петр Павлов.

Ааптар хаартыскаҕа түһэриилэрэ.   

Добавить комментарий

Ваш адрес email не будет опубликован.