Парижка тохсус Олимпиадатыгар кыттарга бэлэмнэнэр

Кэлэр Олимпийскай оонньуулар 2024 сыллаахха Париж куоракка буолуохтаахтар. Элбэх биллэр, аатырбыт спортсменнар ити оонньууларга хайаан да кытталларын туһунан хайы-үйэ официальнайдык биллэрдилэр.

Кинилэр ортолоругар Оксана Чусовитина диэн гимнастикаҕа Узбекистан сүүмэрдэммит хамаандатын чилиэнэ, аан дойдуга аатырбыт спортменка эмиэ баар. Урут кини Олимпийскай оонньууларга аҕыс төгүл кыттыбыта. Ол курдук, Оксана Чусовитина 1992, 1996, 2000, 2004, 2008, 2012, 2016 уонна 2020 сылларга буолбут сайыҥҥы Олимпиадаларга бэйэтэ сөбүлүүр көрүҥэр спортивнай гимнастикаҕа кыттыбыта. Күрэхтэһэр сылларыгар барыта үс дойду спорка чиэһин көмүскээбитэ (КГТ, Германия уонна Узбекистан). Онон, кини спортивнай ситиһиилэрэ Гиннес рекордарын кинигэтигэр киирбиттэрэ. Оксана Чусовитина Парижка тиийэн күрэхтэстэҕинэ, урукку көрдөрүүтүн куоһарар кыахтаах.

Олимпийскай оонньуулар устуоруйаларыгар 18 күүстээх спортсменнар араас сылларга 8-тан элбэх төгүл ити оонньууларга кыттан күрэхтэспиттэрэ. Олимпиадаларга саамай элбэхтик кыттыбыт киһинэн, ат спордунан дьарыктаммыт Иан Миллар (Канада) буолар. Кини 10 төгүл кыттан, биир үрүҥ көмүс мэтээллээх. Миллар улахан спорка карьератын 2012 сыллахха түмүктээбитэ. Билигин биллэринэн, 3 киһи Олимпийскай оонньууларга 9 төгүл, 14 киһи (ол иһигэр Оксана Чусовитина эмиэ) 8 төгүл, 39 киһи 7 төгүл, 144 киһи 6 төгүл, 600-тэн тахса киһи 5 төгүл Олимпийскай оонньууларга кыттыбыттара биллэр.

Кинилэртэн үгүстэрэ ордук ат уонна баарыс спордугар, ытыы, эрдээһин (гребля) курдук көрүҥнэргэ элбэхтик кыттыбыттара. Онтон гимнастикаҕа Олимпийскай оонньууларга элбэхтэ кыттыбыттар олох аҕыйахтар.

Оксана Чусовитина гимнастика курдук уустук уонна эдэрдэр эрэ күрэхтэһэр көрүҥнэригэр аҕыста кыттыбыт спортсменка буолан, элбэх киһи интэриэһин тардара өйдөнүллэр.

Кини уруккута советскай спортсменнартан гимнастикаҕа Олимпийскай оонньууларга саамай элбэхтик кыттыбыт киһинэн биллэр. Ити көрүҥҥэ ситиһиилэрэ да баһырхайдар. Ол курдук, аан дойдуга үстэ бастаабыта (1991 – иккитэ; 2003 – биирдэ), Европаҕа чемпионнаабыта (2008), Олимпийскай оонньууларга (1992) уонна Азиатскай оонньууларга (2002) кыайыылааҕынан тахсыбыта. Итини таһынан кини элбэх төгүл призер буолбута.

Бу аатырбыт спортсменка 1975 сыллаахха Бухараҕа (Узбекистан) төрөөбүтэ. Курбанов Бархидор диэн тустуукка кэргэн тахсыбыта. Кинилэр оҕолорун эмтэтэ Германияҕа олоро сылдьыбыттара. Онно, Оксана Германия сүүмэрдэммит хамаандатыгар киирэн,  Олимпийскай оонньуулартан үрүҥ көмүс мэтээли аҕалбыта. Кэлин дойдуларыгар Узбекистаҥҥа төннүбүттэрэ.

Бу эр санаалаах, олоххо дьулуурдаах, спорка талбыт көрүҥэр элбэх сыллар устата олус бэриниилээх, аан дойдуга аатырбыт гимнасткатыгар баҕа санаата туоларыгар баҕарабыт.

Виталий СЛЕПЦОВ.         

Добавить комментарий

Ваш адрес email не будет опубликован.