Олоҕун үйэ аҥардаах кэмин спорка анаата

Боксаҕа ССРС спордун маастара, Саха Республикатын үтүөлээх тренерэ, Уус Алдан улууһун бочуоттаах гражданина, Россия уопсай үөрэхтээһиҥҥэ бочуоттаах үлэһитэ, РФ физическэй культураҕа уонна спорка туйгуна, Дьокуускай куорат физическэй культураҕа уонна спорка управлениетын начальнига Константин Семенович Бурцев бу дьыл от ыйын 30 күнүгэр 65 сааһын туолар.  

-Олоҕум 50 сылын боксаҕа анаабыппыттан, билигин. олохпун сөпкө дьаһаммыппын диэн дуоһуйа саныыбын, — диир Константин Семенович. – Киһи олоҕор улахан суолталаах быһаарыныылары ылынар быыһык кэмнэрэ баар буолаллар, ол эрээри, мин боксаҕа бастакы сыстыым оҕо-оҕо курдук, чэпчэкитик уонна түргэнник, хайдах эрэ буолуохтааҕын курдук табыллыбыта.

1972 cыл күһүн Бороҕонҥо тохсус кылааска үөрэнэ киирбитим. Оччолорго интернакка олорор уолаттар бары күргүөмүнэн кэриэтэ онус кылааска үөрэнэр Мигалкин Валера “модьуйуутунан” боксер буолбуппут. Ити сыл биһиги Василий Бурцев, Аркадий Арсентьев, Саша Сыроватскай, Коля Дедюкин, Проня Заболоцкай уо.д.а уолаттар буоламмыт, Красноярскайтан саҥа институту бүтэрэн кэлбит боксаҕа первэй спортивнай разрядтаах, баскетболист, волейболист киэнэ бэрдэ, спорт бары көрүҥнэригэр дэгиттэр спортсмен, тренер, аҕыс кырыылаах уол оҕото Иван Покопьевич Бочкарев салалтатынан эрчиллиибитин саҕалаабыппыт.

Ити эрэ иннинэ, атырдьах ыйыгар Арҕаа Германия Мюнхен куоратыгар буолбут ХХ Олимпийскай оонньуулар күрэхтэһиилэриттэн, боксер буолар дьылҕалаах буолан эбитэ дуу, тус бэйэм чуолаан бокса олимпийскай турнирын сүрдээҕин интэриэһиргээн көрбүтүм. Онно Сэбиэскэй Сойуус хамаандатыттан миэхэ 51 киилэҕэ диэри ыйааһынҥа киирсибит Борис Зориктуев, 57 уонна 75 киилэҕэ диэри ыйааһыннарга чемпионнаабыт Борис Кузнецов уонна Вячеслав Лемешев чаҕылхай киирсиилэрэ ордук өйбөр хатанан хаалбыттара. Лемешев утарылаһааччыларын барыларын лаппа баһыйан, түөрт киирсииттэн – үһүгэр дьоннорун нокаут охсуталаан, кырдьык уол оҕо барыта эрэ ымсыырар, умсугутар, кини курдук буолуон баҕарар гына киирсибэтэ.

Оттон Борис Кузнецов сүрдээх техничнай, игровой стиллээх боксаны көрдөрбүтэ. Элбэх сыл ааспытын кэннэ бэйэм тренер буолан баран, дьарыктыыр оҕолорбун Астрахань куоракка күрэхтэһиннэрэ илдьэ бара сылдьан оҕо сааһым кумирын көрсүбүтүм – олох туга да уларыйбатах, хайдах Мюнхеҥҥа боксаласпытай да, оннук туругар, олох үчүгэй спортивнай форматыгар сылдьар этэ.

Дьарыкпын саҕалаабыт сылбар маҥнай оройуонҥа бастаабытым, онтон Мохсоҕолооххо тиийэн “Урожай” общество өрөспүүбүлүкэтээҕи Сэбиэтин турнирыгар эмиэ бастаабытым. Дьэ, ити кэмтэн ыла бастакы ситиһиилэрбиттэн кынаттанан, боксанан дьиҥнээхтик үлүһүйэн туран, олоҕум сүрүн дьарыга оҥостон дьаныардаахтык эрчилииһикпин диэн бэйэм-бэйэбэр сыал-сорук туруорбутум диэххэ сөп.

Онус кылааска үөрэнэр сылбытыгар Хабаровскайдааҕы физкультура институтун анал бокса тренерэ үөрэхтээх, боксаҕа спорт маастарыгар кандидат, өрөспүүбүлүкэ чемпиона, Кэптэниттэн төрүттээх Дмитрий Алексеевич Никифоров кэлэн дьарыктаабыта. Биһиэхэ, саҥа улаатан эрэр уолаттарга Дмитрий Алексеевич олох батыһа сылдьар кумирбыт буолбута, тугу этэрин барытын сыыска түһэрбэккэ эҥкилэ суох толорон иһэр этибит. Ол түмүгэр, бары да биллэ эбиллибиппит. Тус бэйэм Намҥа ыытыллыбыт “Урожай” общество күрэхтэһиитигэр иккистээн чемпионнаабытым. Оскуолаҕа үөрэнэр кэмнэрбэр итинник ситиһиилэрдэммитим.

Оскуола кэнниттэн биир сыл сопхоуска үлэлээт да, Ийэ дойдубар ытык иэспин төлүү аармыйаҕа сулууспалыы барбытым. Учебкаҕа сылдьан дивизияҕа кыайаммын, спортивнай ротаҕа түбэспитим. Дьэ, бу манна тиийэммин дьиҥнээхтии улахан бокса эйгэтигэр тахсыбытым. Бу кэмнэргэ араас улахан титуллардаах, бокса уонна спорт эйгэтигэр суон сурахтаах, аан дойду ааттаах боксердарын кытта биир турнирдарга күрэхтэһэн, кинилэр хайдах эрчиллэллэрин, хайдах киирсэллэрин, техническэй приемнарын, тактикаларын көрө сылдьан бэйэм лаппа эбиллибитим, быдан үрдүк таһымҥа тахсыбытым. Оччолорго сэбиэскэй бокса оскуолата аан дойду үрдүнэн саамай күүстээх этэ. Дойдубут сүүмэрдэммит хамаандатын чилиэннэрэ үксэ кэриэтэ ЦСКА, СКА-лар системаларыгар дьарыктаналлара, күрэхтэһэллэрэ, онон аан дойду таһымнаах уолаттары кытары элбэхтэ бииргэ күрэхтэспитим, сбордарга дьарыктаммытым. Читинскай уобалас чемпионатыгар Забайкальскай байыаннай уокурукка биирдэ эдэрдэргэ, иккитэ улахан дьоҥҥо бастаталаабытым, Сэбиэскэй Сойуус Сэбилэниилээх Күүстэрин чемпионатыгар иккитэ кыттыбытым. Бу бириэмэни биир чаҕылхай, умнуллубат түгэннэри бэлэхтээбит олоҕум биир дьоллоох кэрчик кэминэн ааҕабын уонна сыаналыыбын.

Ийэни-аҕаны талбаккын, ол курдук спортсменҥа үчүгэй тренергэ, наставникка түбэһии – дьылҕа хаан оҥоһуута буоллаҕа. 1978 сыллаахха Саха АССР норуоттарын Спартакиадатыгар бириистээх миэстэҕэ түбэһэммин, өрөспүүбүлүкэ сүүмэрдэммит хамаандатыгар киирэр чиэскэ тиксибитим. Ол киирэммин бэйэбэр бастаан тренер быһыытынан, онтон салгыы үөрэх ыларбар, үлэһит киһи буоларбар олохпор олус элбэх үтүөнү оҥорбут, күн бүгүнҥээҥҥэ диэри сүбэһитим-амаһытым, “хааһахха укта сылдьар кырдьаҕаһым” Российскай Федерация үтүөлээх тренерэ Виктор Павлович Щитик илиитигэр түбэспитим мин дьолум диэн сыаналыыбын. Олохпун спорка аныырбар, олоҕум хаамыытын спорт диэки өҕүлүннэрбит киһи кини буолар.

Олох да атын үөрэххэ туттарсар былааннаах эдэр киһини кытта хаста да төхтөрүйэн истиҥник кэпсэтэн, биһиэхэ боксаҕа, тренерскэй сыахха бэйэбит дьоммут, бэйэбит кадрдарбыт олус наадалаахтар диэн өйдөтөр үлэни ыытан, миигин уонна кэлин албан ааттаммыт Пахомов Артур Иннокентьеһы иккиэммитин бэйэтин норуот номоҕор киирбит “копейка” массыынатынан тиэйэн аҕалан, Дьокуускайдааҕы педагогическай училище физкультурнай отделениетыгар “сиэтэн” илдьэн үөрэххэ киллэртээбитэ. Балай эмэ спортивнай ситиһиилэрдээх уонна кэскиллээх спортсменнар буоламмыт куонкурса суох физкультурнай отделение студеннара буола түспүппүт, иккиэн. Кэлин ырыҥалаан көрдөххө, Борис Павлович улахан тренер уонна кыраҕы харахтаах ырааҕы өтө көрөр педагог буолара аҥардас бу түгэнҥэ көстөр эбит. Оччотооҕу өрөспүүбүлүкэ сүүмэрдэммит хамаандатыгар стройдаатахпытына, син балай эмэ элбэх ыччат этибит ээ. Борис Павлович тоҕо эрэ чуолаан биһиги иккиэммитин талан ылан кэпсэппитэ уонна онтун тиһэҕэр тириэрдэн, кэлин иккиэн тренер буолбуппут.

Эһиилгитигэр, 1979 сыллаахха Иркутскай куоракка “Победа” диэн Бүтүн Сойуустааҕы турнирга кыайылааҕынан тахсыбытым. Ити курдук, ситиһиилэр кэлэн испиттэрэ, ордук таһаарыылаахтык 1981 сыллаах сезонҥа күрэхтэспитим. Ити сыл Калининград куоракка “Урожай” ДСО Россия чемпиона, Рига куоракка буолбут ССРС тыа сирин спортсменнарын чемпионатын кыайыылааҕа буолбутум уонна Дьокуускайга Бүтүн Сойуустааҕы турнирга чемпион аатын ыламмын, саха тыа сирин боксердарыттан аан маҥнайгынан ССРС боксаҕа спордун маастарын нуорматын толорбутум. Күрэхтэһэр кэммэр уопсайа «Урожай» республикатааҕы сэбиэтин күрэхтэһиилэригэр алтата чемпионнабытым (1973, 1974, 1982, 1984, 1985, 1986 сс.), иккитэ ССРС тыатын сирин спортсменнарын чемпионатын кыайыылааҕа (1981, 1983), үстэ РСФСР тыатын сирин спортсменнарын чемпионатын кыайыылааҕа (1981, 1983, 1984), иккитэ Саха АССР чемпиона (1983, 1985) буолбутум.

Училищебын бүтэрээри сырыттахпына арай биир сарсыарда уопсай хоспор олордохпуна мап-мааны, ачыкылаах, көстүүмнээх-хаалтыстаах киһи көтөн түһэн: “Андрей Андреевич Протопопов диэммин, Уус Алдан оройуонун спорткомитетын бэрэссэдээтэлэбин, эйиигин ааттаан-суоллаан сирэй кэпсэтэ кэллим”, — диэн соһутта уонна дьэ миигин олох дойдубар үлэлии таһаарар гына былааннах кэпсэтии кэпсэтэ кэлбитин быһатык этэн саайда. Мин дьиҥинэн Дьокуускайга “Урожай” уобаластааҕы сэбиэтигэр инструкторынан үлэлии хаалыахтаах этим даҕаны, Андрей Андреевич тыла-өһө олохтооҕо, эрэннэрбит усулуобуйалара да бэрдэ уонна эдэр киһи дууһатыгар ханнык “тымырдары” таарыйталыахтааҕын чопчу билэр мындыр психолог киһи быһыытынан төрөөбүт дойдубар үлэлии тахсар гына тылбын ылан, илиибитин тутуһан арахсыбыппыт ол күн.

Андрей Андреевич Протопопов сүүрүлээх-көтүүлээх, кэпсэтиилээх-ипсэтиилээх киһи аҕыс кырыылааҕа буолан, уобаластааҕы “Урожай” систиэмэтин иһинэн Уус Алданҥа тренер ставкатын кэпсэтэ охсон, 1985 сыл күһүнүттэн Кэптэнигэ тренер быһыытынан тахсар буолбутум. Ол кэмҥэ Партизан Заболоцкай аатынан сопхуос дириэктэрэ Попов Роман Петрович көҕүлээһининэн Кэптэнигэ республикаҕа тыа сиригэр суох улахан спортивнай саала сопхуос бэйэтин күүһүнэн тутуллан үлэҕэ киирбитэ. Төрүкү спорт өттүгэр ситиһиилэрдээх, элбэх ыччаттардаах дэриэбинэҕэ дьон-сэргэ да сүргэтэ көтөҕүллэн сылдьар кэмэ этэ, спортзалбыт сарсыарда 7 чаастан киэһээ хойукка диэри толору киһи буолар этэ оччолорго, дьахтарыттан оҕотугар диэри олохтоохтор сүрдээҕин спортзалга сылдьар этилэр. Республика, оройуон таһымнаах араас улахан күрэхтэһиитэ барыта Кэптэнигэ буолара, спортивнай олох оргуйан олороро, биир тылынан эттэххэ, сүрдээх сэргэх, олохпор эмиэ биир умнуллубат кэрэ кэрчик кэмэ эбит.

Ол сыл Кэптэни уола барыта боксер буолуон баҕарар курдук буолбута, олус элбэх оҕо дьарыктанан барбыта, группаларга набор барыта толору этэ. Сыыйа-баайа оҕолор араас күрэхтэһиилэртэн үчүгэй түмүктээх кэлэр буолан испиттэрэ, бастаан республиканскай турнирдарга миэстэлэһэр буолбуппут, онтон республика чемпионаттарыгар бириистээх миэстэлэр кэлэр буолбуттара, сотору республика чемпионнара да баар буолбуттара. Ол курдук, Саша Петухов, Ваня Колесов, Гоша Лыткин, Коля Ксенофонтов, Проня Никифоров оҕолорго республика чемпионнара буолбуттара. Саша Петухов 1987 сыллаахха Краснодар куоракка буолбут Россия чемпионатыгар бастаабыта. Эдэрдэргэ республикаҕа Витя Атласов чемпион, Вася Бурцев, Ваня Копырин призер буолбуттара. Ити курдук тренерскэй үлэбэр ситиһиилэр кыралаан кэлэн испиттэрэ, оҕолору дьарыктыыр базам оччотооҕу кэм ирдэбилигэр балай эмэ үчүгэй этэ, дьарыктанар оҕом да элбэх этэ. Ол гынан баран, ол кэминээҕи дойду үрдүнэн уопсай уларыйыылар баран эрэллэрэ биллэн барбыттара, маҥнай “Урожай” ДСО сабыллан хаалбыта, онон биһиги профсоюзтар ВДФСО-лара диэн ааттанар буолбуппут, аны мин ити спортивнай общество тренерэ буолбутум. Сотору буолаат, ВДФСО сабыллыбыта, биһигини республикатааҕы спортивнай оскуола диэн тэрийэн, онно көһөрбүттэрэ. Дьэ, ол кэннэ, бары билэрбит курдук, 1991 сыл бүтүүтэ дойдубут ыһыллыбыта, биһиги хайдах эрэ сир-халлаан икки ардыгар хаалбыт курдук буолбуппут. Бу политическай уларыйыылар, дойду экономическай өттүнэн мөлтөөһүнэ спорт өттүгэр улахан охсууну оҥорбута, ол биһиги үлэбитигэр-хамнаспытыгар тута биллибитэ.

Итинник балаһыанньаҕа Кэптэнигэ олордохпуна, арай Үөрэх министиэристибэтин иһинэн Республикатааҕы физкультурнай-спортивнай холбоһук дириэктэрэ Михаил Егорович Друзьянов телефоннаата: “Константин Семенович, Дьокуускай куоракка үлэлии көһөн киириэххин наада. Республика оҕолорго старшай тренеринэн биһиги эйиигин көрөбүт”, — диэн соһутта. Онон, 1994 сыл ахсынньы 1 күнүттэн Республика оҕолорго старшай тренеринэн үлэбин саҕалаабытым. Ити сүрдээх эппиэтинэстээх үлэҕэ 14 сыл устата үлэлээбитим. Үлэбит балай эмэ үчүгэй түмүктэрдээх, улахан ситиһиилэрдээх буолбута. Бу сылларга республика боксаҕа тренердэрин барыларын түмэн, биир санааҕа киллэрэн, биир хамаанда курдук үлэлээбиппит. 1996-2008 сс. республика оҕолорго сүүмэрдэммит хамаандатын I, II, III, IV “Азия оҕолоро” спортивнай оонньууларга бэлэмниир үлэни салайбытым. Бу сылларга улахан ситиһиилэри аҕалбыт 1979 сылтан саҕалаан 1988 сылга диэри төрөөбүт сыллаах уолаттарбыт: Георгий Балакшин, Макар Малина, Николай Дмитриев, Илья Иванов, Алексей Иванов, Василий Сыроватскай уо.д.а. сиппиттэрэ-хоппуттара, мин илиим иһинэн киирэн ааспыттара. Билигин ити ииппит уолаттарым үксэ бэйэлэрэ тренердэр, балачча айымньылаахтык үлэлии-хамсыы сылдьаллар. Олортон биирдэстэрэ, Илья Иванов мин дойдубар Уус Алданҥа тахсан үлэлээбитэ ыраатта, сүрдээх таһаарыылаахтык үлэлии сылдьар. Республика старшай тренеринэн үлэлээбит кэммэр мин хамаандабар дьарыктаммыт уолаттар саха боксаҕа историятыгар – Европа, аан дойду чемпионаттарыгар, Олимпийскай оонньууларга тиийэ киирсибит саамай чулуу көрдөрүүлээх көлүөнэ этэ диэтэхпинэ, ким да улаханнык мөккүспэтэ буолуо дии саныыбын. Бу үлэм үрдүктүк сыаналанан Саха Өрөспүүбүлүкэтин үтүөлээх тренерэ үрдүк аата миэхэ иҥэриллибитэ.

Ол үлэлии сырыттахпына, Борис Павлович Щитик уонна Дьокуускай куорат боксаҕа федерациятын аатыттан Валерий Пурбуевич Доржиев куорат спорка Управлениетын салайарга көрдөспүттэрэ. Ону ылынан, 2007 сыл күһүн мэрияҕа үлэлии кэлбитим, ол эрээри, республика оҕолорго старшай тренеринэн 2008 сыллаах “Азия оҕолоро” оонньууларга Саха сирин хамаандатын бэлэмниир циклбын толору үлэлиибин диэн эрдэттэн кэпсэтиилээх буолан, совмещайдаан син биир үлэлии сылдьыбытым. Ити эппиэтинэстээх улахан күрэхтэһиибит кэнниттэн эрэ дьэ, Дьокусскай куорат дьаһалтатыгар спорка уонна физизическай культураҕа Управлениетын начальнигынан букатын көспүтүм уонна күн бүгүнҥэ диэри үлэлии олоробун.

Маҥнайгы сылларбар ардыгар боксабар төннүөх санаалар кииртэлээн ылаллар этэ, онуоха Виктор Павлович Щитик өрүү уоскутардыы этэр этэ: “Үлэлээн киирэн бардаххына, спортивнай азарт уһуктуоҕа, мантан олох да барыаххын баҕарбат буолуон”, — диэн. Онтуката эмиэ кырдьык буолан таҕыста, быйыл бу үлэбэр үлэлээбитим 15-с сылын туолар. Бу сыллар тухары баһаам үлэ ыытылынна, олортон аҕыйах бэлиэ түгэннэри ахтан ааһыахха сөп.

Бастакы үлэм улахан ситиһиитинэн 2009 сыллаахха Дьокуускай куорат хамаандата Манчаары оонньууларыгар сүүрбэттэн тахса сыл буолан баран, уопсай түмүккэ бастаабыппыт буолбута. Саха сирин норуоттарын спортивнай оонньууларын түмүктэринэн билигинҥэ диэри иннибитин биэрбэккэ сылдьабыт. Биир саамай умнуллубат ситиһиибинэн 2009 сыллаахха куорат хамаандата республикаҕа волейболга 31 сыл буолан баран бастаабыта буолар. Бу ситиһиини биһиги 2008 сыллаахха волейбол бэриниилээх фанаттарын мунньан, сүбэлэһэн сүрдээх мөккүөрдээх балаһыанньаҕа кэккэ сөптөөх быһаарыныылары ылыммыппыт түмүгэр кэлбит кыайыы диэн сыаналыыбын. Бу 15 сыл үлэлээбитим тухары син элбэх кыайыыны ситиспиппит буолуо даҕаны, ол күрэхтэһии кэнниттэн убайдар, 1978 сыллаахтан кыайыы кэтэһэн кэлтэй буолбут ветеран волейболистар кэлэн сирэй махтаныылара, билигин даҕаны сүрэхпэр баарга дылы.

Саамай күүстээх уонна элбэх сыллаах үлэбинэн игровой көрүҥнэргэ урукку өттүгэр аҕыйахтыы хамаанда киирсэрин көрөн баран, хайдах эрэ ньыма булан маассабас өттүнэн сайыннарыахха наада эбит диэн баҕа санаам билигин туолан олоххо киирбититтэн дуоһуйуубун ааҕынабын. Сыта-тура толкуйдаан баран мини-футболтан саҕалыырга быһаарынан, 2-3 лигаларынан күрэхтэһии ыытар буолбуппут, онтон күрэхтэһии итинник форматын волейболга, баскетболга, кэлин хоккейга туттубуппут. Ол түмүгэр билигин балаҕан ыйыттан саҕалаан ыам ыйа бүтүөр диэри хас субуота, өрөбүл аайы куорат чемпионатын туурдара буола тураллар. Билигин бу игровой көрүҥнэргэ барытыгар аны ветераннар лигалара тэриллэн, аҕа саастаах спорду сөбүлээччилэр сүрдээх көхтөөхтүк дьарыктаналлар, күрэхтэһэллэр.

Бу хамсааһын физкультуранан уонна спордунан дьарыктаныыга нэһилиэнньэни хабыыга төһүү тирэх буолла. Онон билигин иллэҥ спортзал диэн куорат үрдүнэн букатын суох, куорат анал спортзаллара да буоллун, үөрэх тэрилтэлэрин да спротзаллара бука бары арендаҕа былдьаһыктар, Дьокуускай куорат спортивнай инфраструктурата бука барыта нэһилиэнньэ туһугар ньиргиччи үлэлии турара биһиги бука бары улахан ситиһиибит буолар диэн бэлиэтиэххэ наада. Муҥутаан бу пандемия иннинээҕи сылга куорат волейболга чемпионатыгар 140-тан тахса хамаанда кыттыбыта, мини-футболга 70-тан тахса, баскетболга 40-тан тахса хамаанда, оннооҕор кэлин сайдан иһэр көрүҥҥэ – хоккейга 20-тэн тахса хамаанда кыттыбыта – бу мин санаабар Уһук Илин регионҥа суох көрдөрүү диэн сыаналыыбын. Биһиги бу күрэхтэһиилэрбит чуолаан куорат эрэ олохтоохторун хаппаттар, күрэхтэһиилэрбит Дьокуускай куорат аһаҕас чемпионата диэннэр, ким да кыттарын хааччахтаабаппыт, ол иһин арыый чугас уонна баҕалаах улуустар – Нам, Хаҥалас, Горнай, Мэҥэ-Хаҥалас, Уус Алдан, Чурапчы, Таатта, Амма о.д.а. улуустар хамаандалар эмиэ кыттыыны ылаллар. Онон спордунан уонна физкультуранан нэһилиэнньэ маассабайдык дьарыктаныытыгар улахан хамсааһыны таһаардыбыт диэн сахалыы сэмэйдик испитигэр астынабыт.

Мин олохпор үйэ аҥаарын спорка анаатым, онно спортсмен, тренер уонна спорт тэрийээччитэ быһыытынан ситиһиилэрбэр дьылҕабар махтанарым диэн, олоҕум хайа да кэмнэригэр дьылҕа-хаан ыйааҕынан аттыбар баар буола түспүт көмө-тирэх, сүбэлээн-амалаан, ыйан-кэрдэн наставник буолан сылдьыбыт убайдарбар, аҕа табаарыстарбар. Бу дьон ахсааныгар элбэх киһини ахтыахпын баҕарабын – Бороҕонҥо үлэлиир кэммиттэн Андрей Андреевич Протопоповтан саҕалаан Владимир Пантелеймонович Слепцову, Иннокентий Михайлович Захаровы, республика таһымыгар үлэлиир бириэмэбэр Виктор Павлович Щитигы, Валерий Пурбуевич Доржиевы, Михаил Егорович Друзьяновы, Дьокуускай куорат спордун салайар кэммэр спорт хайысхатын курируйдуур мэр солбуйааччыта Юрий Петрович Баишевы аатталыахпын баҕарабын. Бу үтүө-мааны дьоммор тус бэйэм үйэлэр-саастар тухары махталым муҥура суох.

Сурунна уонна бэчээккэ бэлэмнээтэ Иван КОПЫРИН.

 

2 thoughts on “Олоҕун үйэ аҥардаах кэмин спорка анаата

  • 30 июля, 2022 в 12:29 дп
    Permalink

    Здравствуйте, Константин Семёнович! Я сам спортсмен и не мало раз защищал город у нас поддержки очень мало финансовом плане… Почему в городе для спортсменов очень мало поддержки во всех видах спорта кто родился в Якутске ???например в улусах там поддерживают главы предприниматели и тд им участки авто жеребёнка а у нас пример 40тыс за 5 лет игры народов игры манчаары думаю несправедливо…я бы за улус пошел бы выступать но прописки нету улусной да и работаю тут раньше помню участки выдавали а щас нет… У нас много спортсменов кто приехал с улуса там родились и у них выбор за улус выступать а мы родились тут и выбора нет поддержки ноль потому что мы городские а им выдают министерства и улус…. Я думаю надо поднять вопрос главе города Григорьеву уже нет терпение!!! выдавать участки кто занимал места на международном мировых уровнях за 10 лет и сделать список сколько таких кто именно родился в Якутске!!!Чтоб было видно везде!!! Как думаете ????

    Ответ
    • 30 июля, 2022 в 2:18 дп
      Permalink

      Представьтесь пожалуйста. Полное имя фамилия, вид спорта, достижения…

      Ответ

Добавить комментарий

Ваш адрес email не будет опубликован.