Ньурбаҕа – Спорт министиэристибэтин күннэрэ

Ньурба улууһугар ахсынньы 1-2 күннэригэр – Саха Өрөспүүбүлүкэтин спорка уонна физическэй култуураҕа министиэристибэтин күннэрэ ыытылла тураллар. Бэлиэ түгэн чэрчитинэн, хас да көрүнҥэ ыалдьыттарбыт маастары-кылаастары тэрийэн ыыттылар. 

Ол курдук, Ньурбатааҕы оҕо спортивнай оскуолатыгар – норуоттар икки ардыларынааҕы кылаастаах спорт маастара, Беларусь өрөспүүбүлүкэтин үтүөлээх маастара, 2001 сыллааҕы аан дойду чемпиона, “Киһи килбиэнэ” бэлиэ хаһаайына, Арассыыйаҕа уонна СӨ олимпийскай хамсааһын сайдыытыгар өҥөтүн иһин Кулаковскай аатынан судаарыстыбаннай бириэмийэ хаһаайына, көҥүл тустууга Саха сирин сүүмэрдэммит хамаандатын сүрүннүүр тренерэ Герман Степанович Контоев – оскуола тустууга иитиллээччилэригэр аһаҕас уруок ыытта.

Мини-футболга, Өрөспүүбүлүкэтээҕи мини-футбол анал спортивнай оскуолатын тренерэ Сарыал Дмитриевич Явловскай маастар-кылаас ыытта.

Оттон волейболга маҥнайгы категориялаах судьуйа, “Кыайыы 50 сыла” Спорт дыбарыаһын тренерэ Ефремов Аркадий Федосиевич ыытта.

Ньурба улууһугар ыытыллар Саха Өрөспүүбүлүкэтин спордун уонна физическэй култууратын министиэристибэтин күннэрин чэрчитинэн, мини-футболга ыалдьыттар, ол эбэтэр, спорт уонна культура министиэристибэтин хамаандата уонна Ньурба улууһун спордун эйгэтин үлэһиттэрин хамаандата доҕордуу түһүлгэҕэ күөн көрүстүлэр.

Бу түгэни Спорт уонна физическэй култуура миниистирэ Леонид Николаевич Спиридонов түбүктээх үлэттэн быыс булан, сэргээн сэҥээрэн көрдө. Оонньууга биир дойдулаахпыт, СӨ Ил Дарханын сүбэһитэ, биллиилээх  боксер, общественнай, политическай деятель Георгий Русланович Балакшин Ньурба хамаандатыгар оонньоото. Кинилэр кыайыылара хотуулара диэн сүрдээх буоллаҕа. Чэ, быһата саха норуотун аан дойдуга ааттаппыт, планета саамай күүстээх дьоно күн бэҕэһээ кэлэн мааны ыалдьыт буоллулар диэтэхпинэ омун буолбат – кинилэр бу доҕордуу көрсүһүү таһымын, үөрүүтүн өссө үрдэттилэр.

Сайыына САВВИНОВА.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *