Николай Волков аата үйэтитиллэр

Республикаҕа көҥүл тустууну тэрийээччилэртэн биирдэстэрэ, Саха АССР үтүөлээх тренерэ, педагогическай наука кандидата, Бүлүү улууһун, Балаҕаччы нэһилиэгин бочуоттаах гражданина Николай Николаевич Волков аатынан турнир буолан ааста. Кыра саастаах уолаттартан саҕалаан үс бөлөххө арахсан туһуннулар.

Абый, Анаабыр, Горнай, Кэбээйи, Дьокуускай, Хатас, Хаҥалас, Сунтаар, Ньурба, Үөһээ Бүлүү, Бүлүү хамаандаларыттан барыта холбоон 253 эдэр бөҕөс икки көбүөрүнэн күөн көрүстэ. Ол курдук, дьокуускайдары тренердэр Николай Яковлев, Степан Соркомов, Үөһээ Бүлүүттэн Сергей Слепцов, Ньурбаттан Роман Окоемов салайан илдьэ кэлбиттэр. Күрэхтэһии түмүгүнэн Дьокуускай, Булуу, Ньурба оҕолоро күүстээхтэрэ көһүннэ. Саҥа саҕалааччылар бааллара киһини үөрдэр.

Биир тылынан, үчүгэй тустуу буолан ааста. Бары үөрдүбүт, оҕолор тусталларыттан, элбэхтэриттэн. Маннык буоллаҕына, саха тустуута инникилээх, кэскиллээх эбит диэххэ. Баҕалаах оҕолор элбэхтэр эбит. Кинилэри сөпкө тутан эрчийиэххэ, өйүөххэ дии саныыбын.

Күрэхтэһиини тэрийээччилэр: Бүлүү улууһа, Василий Румянцев аатынан спортивнай оскуола, Н.Н. Волков төрөөбүт Балаҕаччы нэһилиэгэ, аймахтара, чугас дьоно. Хас биирдии чемпионнар, призердар мэтээллэринэн, грамоталарынан, харчынан бириистэринэн наҕараадаланнылар. Итини тэҥэ бастыҥ тустууктарга анал бириистэр туттарылыннылар.

Балаҕаччыттан нэһилиэк баһылыга Афанасий Васильев кэлэн эҕэрдэлээтэ. Итиэннэ хас ыйааһын ахсын үһүс миэстэлэргэ тиксибиттэргэ бириистэри туруорда. Бастаабыттарга бириистэри Бүлүү улууһун дьаһалтата, Бүлүү куоратын спорка тэрилтэтэ, спортивнай оскуола коллектива туттардылар. Оттон биһиги, улуус спорка тэрилтэтэ анал бириистэри анаатыбыт.

Санатан эттэххэ, Николай Николаевич Волков үтүө аатын үйэтитиигэ Саха сирин Ил Дарханын дьаһалынан анал хамыыһыйа тэриллибитэ. Төрөөбүт Бүлүүтүгэр быйыл күһүн научнай-практическай конфренция ыытыллыбыта. Бүлүү куоратын биир саҥа уулуссатыгар Николай Николаевич аата иҥэриллибитэ. Бүлүүтээҕи педагогическай коллеждка бастыҥ спортсмен-студеҥҥа 10 тыһ. солк. стипендия ананна. Ону тэҥэ биллиилээх биир дойдулаахпыт аатын үйэтитиигэ атын элбэх үлэлэр күүтүллэллэр. Ол курдук, Бүлүү биир спортивнай тутуутугар Н.Н. Волков аатын иҥэрэргэ диэн былааннаан турабыт. Өссө бюст оҥотторуохтаахпыт. Ону эһиил Саха сиригэр физкультурнай хамсааһын 100 сылын чэрчитинэн олоххо киллэрэр соруктаахпыт.

Гаврил ЕВСЕЕВ, Бүлүү улууһун физическэй культураҕа уонна спорка управлениетын начальнига.

 

Добавить комментарий

Ваш адрес email не будет опубликован. Обязательные поля помечены *