Наҕараадалааһын хайдах буолуой?

Манчаары аатынан спорт сахалыы көрүҥнэрин «Модун» киинигэр 2006-2007 сс. төрөөбүт уолаттар Н.Н. Тарскай аатынан көҥүл тустууга Саха сирин үрдүнэн биирдиилээн уонна хамаанданан бастыыр иһин күрэхтэһиилэрэ ыытылла турар.

Түһүлгэҕэ 17 хамаандаттан барыта 239 эдэр бөҕөс күөн көрсөр. Кинилэр 11 ыйааһыҥҥа күрэс былдьаһаллар.

Бу күрэхтэһии наҕараадалааһынын туһунан эттэххэ, кыайыылаах хамаандаларга Уу спордун көрүҥнэригэр республикатааҕы оскуола (дириэктэр П.П. Черкашин) харчынан бириис олохтоото. Ол курдук, бастаабыт хамаанда 50, иккистээбит 30, үһүстээбит 20 тыһ. солк. харчынан наҕараадаланыа. Оттон ыйааһыннарыгар бастаабыттарга уонна иккис-үһүс буолбуттарга Тустуу сайдыытын фондата (аан дойду икки төгүллээх чемпиона, Ил Түмэн депутата Виктор Лебедев) эмиэ харчынан бириистэри анаата. Бастаабыттар 7-лии, иккистээбиттэр 4-түү, үһүстээбиттэр 2-лии тыһ. солк. харчынан бириэмийэлэниэхтэрэ. Ону тэҥэ бастыҥ тренердэр эмиэ бэлиэтэниэхтэрэ.

Итини таһынан түһүлгэ түмүгүнэн «Бастыҥ бөҕөскө» анал бирииһи Н.Н. Тарскай биир дойдулаахтара – Уус Алдан физическэй культураҕа уонна спорка управлениета (начальник К.В. Давыдов, И.С. Ноговицын), «Кыайыыга дьулуурун иһин» анал бирииһи “Өрөгөй” Спорка бэлэмнэнии киинэ (дириэктэр М.Д. Пахомов), оттон “Кыайыыга дьулуурун иһин” диэн икки бирииһи Р.М. Дмитриев аатынан Олимпийскай эрэллэри бэлэмниир училище (дириэктэр С.С. Чердонов) туруордулар. Ити курдук, үчүгэй үлэлээх судьуйалар – Республикатааҕы оҕо спордун холбоһуктаах оскуолатын (дириэктэри солбуйааччы М.И. Варламов) бириистэринэн наҕараадаланыахтара.

Финаллар:

42 кг Никита Элясов (Чурапчы) – Эрхан Куличкин (Дьокуускай)

45 кг Уйусхан Халгаев (Чурапчы) – Толя Николаев (Чурапчы)

48 кг Миша Осипов (Ньурба) – Рома Кириллин (Сунтаар)

51 кг Сеня Сивцев (Уус Алдан) – Алеша Фокинов (Сунтаар)

55 кг Витя Иванов (Сунтаар) – Максим Григорьев (Уус Алдан)

60 кг Айкар Марков (Мэҥэ Хаҥалас) – Костя Слепцов (Мэҥэ Хаҥалас)

65 кг Боря Иринеев (Дьокуускай) – Сергей Петухов (Уус Алдан)

71 кг Алеша Захаров (Горнай) – Ариан Оконешников (Чурапчы)

80 кг Артем Афанасьев (Дьокуускай) – Адам Николаев (Ньурба)

92 кг Володя Басов (Чурапчы) – Жаксалык Асамов (Дьокуускай)

110 кг Вася Охлопков (Томпо) – Марат Темербаев (Дьокуускай).

Сарсын күрэхтэһии, программа быһыытынан 11:00 чаастан саҕаланар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *